Menu

Author Archives: Admin1

Kur sallata jeshile është e freskët?

Sallatat e përbëra nga zarzavatet me gjethe jeshile kanë vend në çdo vakt të ditës, duke filluar që nga baza për sallata të ndryshme e deri tek të qenurit një përbërës për lëngje të pasura në vlera. Për fat të keq, këto zarzavate shpesh prishen në momentin kur i nxirrni nga rafti. Dhe nëse nuk dëshironi që ato të prishen brenda një kohe të shkurtër, ndiqni mëposhtë këshillat për të ruajtur freskinë e tyre për një kohë më të gjatë.

Zgjidhni gjithmonë produktin më të freskët

Kur jeni duke bërë pazar, bëni një kontroll të plotë të produktit dhe zgjidhni vetëm marulet që janë të freskëta.

Zgjidhni më të fortat

Jo të gjitha zarzavatet janë të barabarta. Për shembull, zarzavatet delikate si rukola dhe spinaqi kanë një kohë më të shpejtë prishjeje.

Nëse jeni duke kërkuar për opsione me jetëgjatësi më të madhe, zgjidhni ato që janë më të forta, si për shembull lakra jeshile.

Largoni lagështirën

Një truk i thjeshtë për të shpëtuar sallatën është që me anë të një peshqiri të largoni prej saj lagëshitnë. Ky hap i thjeshtë është vërtetuar se ndihmon në parandalimin e prishjes.

Ruajeni në një enë hermetike

Ju mund të përdorni një enë plastike hermetike për t’i shtuar jetëgjatësinë sallatës jeshile.

Sigurohuni që frigoriferi po punon me temperaturën e duhur

Meqenëse frigoriferi juaj do të bëjë pjesën më të madhe të punës, sigurohuni që temperatura të jetë nën 4 gradë Celsius.

Përdorni sirtarët e poshtëm të frigoriferit

Mbani frutat dhe perimet tuaja në sirtarët e poshtëm, sepse ato janë për të çliruar larguar gazin dhe lagështinë që përshpejton prishjen. (Agroweb)

Qendra Alert/Alert.al

Uragani Ian godet Kubën, Florida përgatitet për erëra të forta dhe përmbytje

Uragani Ian goditi Kubën perëndimore me forcën e një uragani madhor të martën, dhe la rreth 1 milion njerëz pa elektricitet. Në vazhdim, ai u drejtua drejt shtetit amerikan Florida, ku në ndërveprim me ujërat e ngrohtë të Gjirit të Meksikës pritet të shndërrohet në një furtunë me pasoja katastrofike të kategorisë 4. Në Kubë, uragani Ian preku tokë në provincën Pinar del Rio, ku ishin ngritur 55 vendstrehime dhe ishin evakuar 50 mijë persona. Aty ishte sjellë edhe personeli i emergjencave për të mbrojtur rajonin më të njohur të këtij vendi për prodhimin e duhanit. Qendra Kombëtare e Uraganëve në Shtetet e Bashkuara njoftoi se Kuba pati pasoja “domethënëse nga erërat dhe stuhia”, kur uragani goditi me shpejtësi ere deri në 205 kilometra në orë.

Uragani Ian pritet të bëhet edhe më i fuqishëm mbi Gjirin e Meksikës, duke arritur deri në 209 kilometra në orë ndërsa i afrohet bregut jugperëndimor të Floridas, ku 2.5 milionë njerëz janë urdhëruar të evakuohen. Erëra të forta të stuhisë tropikale priteshin në të gjithë gadishullin të martën, ndërsa ato pritej të arrinin forcën e uraganit të mërkurën, kur syri i stuhisë pritet të arrijë tokën. Dëmet pritet të shkaktohen në një zonë të gjerë të Floridas, pasi erërat e stuhisë shtriheshin në një rreze deri në 185 kilometra nga epiqendra. Nuk ishte ende e qartë se ku do të prekë saktësisht tokë uragani. Trajektorja e tij e saktë do të përcaktojë se sa e rëndë do të jetë përmbytja për Gjirin e Tampas, tha shkencëtari për uraganët, Brian McNoldy, nga Universiteti i Majamit. Nëse uragani do të zhvendoset më në jug të gjirit, kjo do t’i pakësonte dëmet shumë, tha ai.

Qendra Alert/Alert.al

Grupet e interesit letër Biden, për sigurinë ushqimore

Organizata prej 150 personash i kanë dërguar një letër Presidentit amerikan Biden. Në fokus të shqetësimit të tyre ishte negocimi i projektligjit të fermës, i lidhur me sigurinë ushqimore. Çdo 5 vjet, Kongresi riautorizon Projektligjin e Fermës, një pjesë e gjerë e legjislacionit që prek çdo pjesë të sistemit tonë ushqimor. Ky projektligj përfshin veprimet për të reduktuar pabarazinë ekonomike, për të kapërcyer ndarjet racore në vend, për t’i dhënë fund urisë, për t’u përballur me krizën klimatike, për të përmirësuar ushqimin dhe sigurinë ushqimore, për të mbrojtur dhe mbështetur fermerët, punëtorët dhe komunitetet.

Në letër thuhet: Siguroni furnizimin tonë ushqimor, pasi mijëra njerëz në vendin tonë vdesin çdo vit nga sëmundjet e shkaktuara nga ushqimi dhe miliona të tjerë sëmuren nga patogjenët në mish, shpendë, prodhime dhe ujë të pijshëm. Dështimet e fundit të sigurisë ushqimore kanë nxjerrë në pah boshllëqet në rrjetin tonë të sigurisë ushqimore që i vendos konsumatorët në rreziqe të papranueshme nga patogjenët. Projektligji juaj i fermës duhet të bëjë më shumë për të trajtuar patogjenët që kanë origjinën në fermat e fabrikës dhe për ta bërë furnizimin me ushqim në SHBA të sigurt për të gjithë.

President Biden, organizatat e nënshkruara ju bëjnë thirrje që të kërkoni një projektligj transformues për fermat që pasqyron plotësisht këto vlera dhe që ju mund të jeni krenar për ta nënshkruar. (FoodSafety)

Qendra Alert/Alert.al

Përfitimet shëndetësore nga Botox-i

Fanatikët e Botox -it e pëlqejnë për vetitë e tij kundër rrudhave. Por, studiuesit besojnë se injeksionet mund të kenë një përfitim tjetër. Nuk është vetëm depresioni. Shkencëtarët gjermanë mendojnë se mund të ndihmojë edhe pacientët me çrregullim të personalitetit, të cilët shpesh vuajnë nga depresioni, shkruan DailyMail.

Botox-i funksionon duke relaksuar muskujt e fytyrës për të zbutur vijat dhe rrudhat. Studiuesit pretendojnë se të njëjtat efekte, të cilat zgjasin për tre muaj, janë përgjegjëse për çdo përfitim të shëndetit mendor. Sipas teorisë së studiuesve, parandalimi i njerëzve nga vrenjtja e fytyrës, duke ngrirë muskujt e ballit i ndalon marrësit të përjetojnë humor negativ aq intensivisht.

Ekipi në Shkollën Mjekësore të Hanoverit tha se Botox-i ‘mund të ketë një rol’ në trajtimin e sëmundjeve mendore.

Dr. Axel Wollmer, një psikiatër në Universitetin Semmelëeis dhe autor i vjetër i studimit tha se Organizata Botërore e Shëndetësisë vlerëson se numri i njerëzve që vuajnë nga depresioni është afërsisht 280 milionë. “Trajtimet e krijuara si psikoterapia ose ilaçet kundër depresionit nuk funksionojnë mjaftueshëm për rreth një të tretën e pacientëve, kështu që ekziston nevoja për të zhvilluar opsione të reja trajtimi, dhe këtu mund të kenë një rol injeksionet”-deklarojnë studiuesit. (DailyMail)

Botox ‘may banish the blues’ | Daily Mail Online

Qendra Alert/Alert.al

Edicioni i parë i Festivalit të Inovacionit Agro-ushqimor

Nga 3 deri më 8 tetor zhvillohet Edicioni i parë i Festivalit të Inovacionit Agro-ushqimor, një ngjarje e organizuar për trajnimin dhe këshillimin në sektorin e agro-ushqimit. Ideja e organizimit të këtij festivali, i cili do të zhvillohet online nëpërmjet një platforme të dedikuar me qasje krejtësisht të lirë, buron nga nevoja për të vënë të interesuarit në sektorin agro-ushqimor në kontakt me realitetet që krijojnë risi: Universitetet, qendrat kërkimore, industritë dhe profesionistët.

Secila nga 6 ditët e festivalit do t’i kushtohet një sektori të ndryshëm të ekosistemit agro-ushqimor italian, bujqësisë, mbarështimit, përpunimit, shpërndarjes, konsumit dhe startup-eve dhe do të ndahet në tre momente: Në mëngjes, të rezervuar për trajnim, ekspertët e kërkimit shkencor dhe universitar do të paraqesin rezultatet e tyre të fundit, pasdite do të jetë koha e risive të kompanive agro-ushqimore dhe startup-eve, ndërsa mbrëmja do t’i kushtohet krijimit të marrëdhënieve midis pjesëmarrësve nëpërmjet tryezave virtuale. Fjalimet do të transmetohen në live streaming, gjithashtu do të jetë e mundur të ndërveprohet me folësit dhe pjesëmarrësit e tjerë në bisedë edhe nëpërmjet sondazheve dhe sesioneve.

Me 25 mijë njerëz të përfshirë, Festivali “Food Hub” ka ndërtuar komunitetin më të madh agro-ushqimor në Itali, me qëllim të nxitjes së rritjes profesionale të të gjithë operatorëve dhe realiteteve të sistemit nëpërmjet shpërndarjes së përmbajtjes cilësore dhe informacionit. Ky event ka si qëllim për të transformuar Festivalin e Inovacionit agro-ushqimor në një ngjarje vjetore kushtuar të gjithë të interesuarve, që nga studentët e universitetit tek operatorët e biznesit ushqimor. (IlFattoAlimentare)

Qendra Alert/Alert.al

Vala e re e emigracionit, aplikimet për azil u dyfishuan

Pasi ranë në vitin e pandemisë dhe mbetën të ulëta në 2021-n, aplikimet për azil nga shtetasit shqiptarë në vendet e Bashkimit Europian kanë filluar të rriten sërish me rikthimin e lëvizjes pa kufizime. Sipas të dhënave të Eurostat, në 7 muajt e parë të vitit u regjistruar gati 5800 kërkesa për azil nga shtetasit shqiptarë në një nga vendet e Bashkimit Europian. Në krahasim me të njëjtën periudhë të një viti më parë, shifra është dyfishuar, duke dëshmuar për një tendencë të re të rigjallërimit të emigracionit. Megjithatë, në krahasim me vitet e mëparshme numri i azilantëve mbetet i ulët, edhe për faktin se tashmë shumë persona po ikin me kontrata pune, apo të tjerë nuk regjistrohen më si azilantë ndaj është e vështirë të identifikohet numri i saktë i personave që po largohen nga vendi.

Eurostat nuk i raporton më të dhënat për Mbretërinë e Bashkuar, që nga dhjetori 2020, pas daljes së saj nga BE.  Por, të dhënat zyrtare të Autoriteteve Britanike tregojnë se rreth 4729 shqiptarë kanë hyrë në mënyrë të paligjshme në vendin e tyre dhe janë regjistruar si azilkërkues gjatë periudhës janar-qershor 2022, një shifër që është sa 80% e të gjithë kërkesave për azil në 27 shtetet e tjera të Bashkimit Europian, duke e çuar në total shifrën e aplikimeve në mbi 10 mijë. Kërkesat për azil vetëm në 6 muajt e parë të 2022-t janë më të larta se gjithë viti 2021, kur ishte shënuar dhe numri më i lartë rekord deri tani.

Numri më i lartë i azilantëve nga Shqipëria në vendet e BE u regjistrua në vitin 2015, kur një valë masive emigracioni nisi në vend. Në periudhën janar-korrik 2015 u shënuan gati 34 mijë kërkesa ndërsa për gjithë atë vit numri iu afrua 70 mijë. Më pas ritmi ra gradualisht, ndërsa në vitin pandemik u shënua niveli më i ulët i dekadës së fundit. Megjithatë, tendenca për të ikur u rigjallërua sërish pas pandemisë.

INSTAT prej dy vitesh po e shtyn zhvillimin e Censit, i cili do të jepte një panoramë të saktë që ka mbetur aktualisht në Shqipëri. Zyrtarisht në vend ka gati 2.8 milionë banorë, njësoj sa kur u zhvillua Censi i fundit në 2011-n, ndonëse mesatarisht migracioni neto luhatet në rreth 20-50 mijë persona në vit dhe shtesa natyrore e popullsisë është minimale, madje në vitin e pandemisë kaloi negative.

Kërkesat për azil në Europë

Sipas Eurostat, në qershor 2022, 65 645 aplikantë për azil për herë të parë (qytetarë jo të BE-së) aplikuan për mbrojtje ndërkombëtare në Shtetet Anëtare të BE-së, 66% më shumë krahasuar me qershorin 2021 (39 515) dhe 4% krahasuar me majin 2022 (63 105). Rritja nga maji në qershor 2022 mund t’i atribuohet kryesisht rritjes së aplikantëve për herë të parë nga Tunizia (+990 persona; ose +82%), Turqia (+850; ose +31%) dhe Pakistani (+645; ose +22). %).

Në qershor 2022, kishte edhe 6 190 aplikantë të mëvonshëm (persona që riaplikuan për azil pasi ishte marrë një vendim për një kërkesë të mëparshme) me rritje 2% krahasuar me qershorin 2021 dhe një rënie me 1% krahasuar me majin 2022.

Në qershor 2022, sirianët ishin grupi më i madh i personave që kërkonin azil (8 600 aplikantë për herë të parë). Ata u pasuan nga afganët (7 705), venezuelianët (4 705), kolumbianët (3 840) dhe turqit (3 625).

Në mars 2022, pati një rritje të madhe të azilkërkuesve ukrainas për herë të parë (nga 2 370 në shkurt në 12 885 në mars) për shkak të agresionit ushtarak të Rusisë kundër Ukrainës. Megjithatë, shifrat u ulën në 1 295 dhe 975 përkatësisht në maj dhe qershor 2022. (Monitor)

Qendra Alert/Alert.al

Simptomat e diabetit tek fëmijët, shkak edhe covid-19

Etje e tepërt, humbje peshe ndërsa vazhdoni të hani normalisht, sasi e shtuar urine: Këto nuk janë simptoma për t’u nënvlerësuar sepse ato mund të jenë shenja të një sëmundjeje që duhet të njihen dhe trajtohen menjëherë.

Ky është diabeti i fëmijëve, i cili është në rritje midis të rinjve, sipas ekspertëve nga spitali pediatrik Gaslini në Genova, edhe për shkak të pandemisë Covid-19.

Një problem në rritje

Ekspertët e qendrës rajonale të referencës për diabetin pediatrik në Liguria, që i përkasin Gaslini, rekomandojnë që familjet t’i kushtojnë vëmendje simptomave që duken të parëndësishme, të cilat në të vërtetë mund të jenë tregues të një forme të diabetit të tipit 1, diabetit të fëmijëve, rastet e të cilit kanë qenë në rritje në kohët e fundit. Një diagnozë e hershme, e cila zhvillohet përmes një analize të thjeshtë gjaku, lejon përjashtimin e sëmundjes ose fillimin e trajtimit në kohën e duhur, për të shmangur rrezikun e ndërlikimeve.

Sot, në fakt, janë në dispozicion lloje të reja të insulinave që mbrojnë nga rreziqet e krizave hipoglikemike, si dhe infuzorët e gjeneratës së fundit gjithashtu të pajisur me detektorë të glukozës në gjak që lejojnë fëmijët me diabet të kenë një jetë normale dhe të qetë.

Shenjat që nuk duhen neglizhuar

Diabeti mellitus i tipit 1 është një sëmundje autoimune, tipike e fëmijërisë, e cila kërkon marrjen e insulinës zëvendësuese. Nuk është gjithmonë e lehtë të vërehet, prandaj ekspertët rekomandojnë që të mos anashkalohen simptomat tipike: poliuria (prodhimi i shtuar i urinës), polidipsia (etja e shtuar) dhe humbja e peshës. Fëmija gjithashtu mund të jetë i lodhur dhe nervoz. Këto simptoma duhet të raportohen gjithmonë tek pediatri.

Përndryshe, brenda disa javësh ekziston rreziku i dekompensimit të përgjithshëm me ketoacidozë diabetike me vështirësi në frymëmarrje, dhimbje barku dhe të vjella dhe tek vajzat edhe me infeksione vagjinale. Ketoacidoza e neglizhuar mund të çojë në koma.

Më shumë raste me Covid-19

Ekspertët vërejnë se diabeti i fëmijëve, rastet e të cilit në qendrën në fjalë janë dyfishuar, mund të ketë lidhje me një problem të nën-diagnozës. Me fjalë të tjera, shqetësimi është kthyer nga familjet drejt problemeve të tjera, domethënë ndaj simptomave që lidhen me Sars-Cov-2 dhe, në rast dyshimi, shumë kanë preferuar të presin, sesa ta sjellin fëmijën për një vizitë ashtu si për të mos e ekspozuar veten ndaj rrezikut të Covidit.

Vonesat diagnostike, në rastin e diabetit 1, mund të çojnë në një përkeqësim të situatës, me komplikime shumë të rënda.

Ky problem ndodh më shpesh te vajzat sesa te djemtë. Shkaqet janë të panjohura, por në bazë ekziston një mekanizëm autoimuniteti, në të cilin trupi prodhon antitrupa që sulmojnë strukturat e veta.

Qendra Alert/Alert.al

Akrilamidet, BE po përgatitet të vendosë kufij dhe sanksione për kompanitë

Në vitin 2023, masat evropiane për praninë e akrilamideve në ushqim do të ndryshojnë. Kjo ndodh pas rreth 20 vjetësh nga studimet e para, që treguan rrezikun që shkakton kjo substancë tek shëndeti i njeriut, e cila formohet në shumë ushqime të gatuara (duke filluar me biskota, snacks, patate të skuqura dhe kafe), për shkak të reagimit që ndodh midis sheqernave dhe aminoacideve në kushtet e lagështisë. Pothuajse të gjithë prodhuesit e përfshirë do të duhet të modifikojnë recetat, të respektojnë rregullat dhe të shmangin arritjen e pragut maksimal të lejuar.

Deri tani ka patur një tolerancë ekstreme. Kompanitë duhej të bënin gjithçka që ishte e mundur për të ulur nivelet dhe për t’u lidhur me vlerat e referencës të përcaktuara në vitin 2018 (pra, u zbatua parimi ALARA, nga As Loë As Raesonably Achievable). Sipas analizave të kryera vitet e fundit, përqendrimet e akrilamideve varionin nga 50-7 mijë ppb, në varësi të recetave, kushteve të gatimit dhe mbi të gjitha të llojit të miellit të përdorur. Disa kanë sasi shumë të mëdha asparagine, një nga aminoacidet që më lehtë shkakton akrilamide, si dhe fruktozë, e cila është më reaktive se glukoza dhe sheqernat e tjera. Sigurisht, ka edhe ujë, i cili është thelbësor në mënyrë që enzimat që katalizojnë reaksionin të mund të veprojnë në maksimum.

Akrilamidet u përkufizuan nga Agjencia Ndërkombëtare për Kërkime mbi Kancerin (IARC) e OBSH-së si një kancerogjen i mundshëm që në vitin 1994 (klasa 2A) dhe sipas studimeve më të fundit, nëse merret në mënyrë kronike, mund të dëmtojë edhe fibrat nervore dhe kështu të rrisë rrezikun e sëmundjeve si Alzheimer. Megjithatë, të dhënat janë ende mjaft konfuze, siç doli në një meta-analizë e fundit, botuar në Frontiers in Nutrition në vitin 2022 dhe në lidhje me 31 studime që përfshijnë mbi 1 milion njerëz. U pa një lidhje midis një sasie mesatare prej 23 mikrogramësh në ditë të akrilamideve për një periudhë mesatare prej rreth 15 vjetësh dhe llojeve të shumta të kancerit duke përfshirë ato të zgavrës orale, stomakut, ezofagut, prostatës, pankreasit, tiroides e të tjerë. (IlFattoAlimentare)

Qendra Alert/Alert.al

 

Efektet negative nga përdorimi i cigareve elektronike

Studiuesit kanë dalë në përfundim se përdorimi i cigareve elektronike mund të shkaktojnë një valë të re kanceri në 10 vitet e ardhshme. Studiuesit në Institutin Francis Crick (FCI) thonë se ndërsa cigaret elektronike janë më të sigurta se pirja e cigareve, rreziqet afatgjata për shëndetin janë ende të paqarta.

Profesor Charles Swanton, shkencëtar klinik në FCI, thotë se avullimi përbën një kërcënim potencial për shëndetin e njerëzve.

“Unë nuk mendoj se mund të themi se cigaret elektronike janë domosdoshmërisht një opsion i sigurt për të lënë duhanin. Mund të jetë më e sigurt, por kjo nuk do të thotë se nuk ka potenciale rreziku”, tha ai.

“Ne nuk e dimë me siguri se avullimi nuk do të shkaktojë kancer të mushkërive dhjetë vjet nga tani.”

Studiuesit në FCI kryen studime për të kuptuar pse disa nga personat e diagnostikuar me kancer të mushkërive në Mbretërinë e Bashkuarm një në tetë pacientë janë jo duhanpirës, ​​pavarësisht se duhani është një nga shkaqet kryesore të sëmundjes. Ata përdorën studime mbi njerëzit dhe minjtë mbi të cilët matën ekspozimin ndaj grimcave të ndotjes së blozës në ajër që mund të shkaktojnë rritjen e qelizave kancerogjene në mushkëri. Provat e tyre sugjerojnë se rruga që shkakton tumoret tek jo-duhanpirësit është e ndryshme nga ato të shkaktuara nga pirja e duhanit, e cila mendohet se shkakton një mutacion të drejtpërdrejtë në ADN që mund të rezultojë në kancer. Gjetjet e tyre sugjerojnë se irrituesit si: ndotja e ajrit shkakton inflamacion, i cili më pas pasohet nga një proces shërimi që “zgjon” qelizat e fjetura që mund të shkaktojnë mutacione kanceroze dhe studiuesit shqetësohen se avullimi mund të shkaktojë të njëjtin proces.

Qendra Alert/Alert.al

TikTok përballet me gjobën miliona dollarë

TikTok mund të detyrohet t’i paguajë një gjobë 29 milionë $ agjencisë britanike të mbrojtjes së të dhënave, pasi platforma e shpërndarjes së videove nuk ka mbrojtur, por ka shpërndarë e përpunuar të dhënat private të të miturve të shumtë që e përdorin.

Hetimi i autoritetit britanik zbuloi se platforma ka shkelur ligjet e vendit me mbledhjen e përpunimin e të dhënave të fëmijëve nën 13 vjeç pa miratimin e të prinderve.

Ajo gjithashtu nuk ka vepruar në mënyrë të saktë e transparente me të dhënat, ndërsa ka përpunuar “një kategori të veçantë të dhënash” pa arsyet ligjore për ta bërë.

Por TikTok nuk do të jetë i detyruar të paguajë gjobën pasi ka marrë vetëm një “njoftim objektivi” nga rregullatori britanik për zbulimet.

Shkeljet e privatësisë së TikTok llogaritet se kanë ndodhur prej majit 2018 deri në korrik 2020.

“Ne duam që fëmijët tanë të mësojnë nga eksperienca në botën dixhitale por me mbrojtjen e duhur të të dhënave të tyre. Kompanitë e shërbimeve dixhitale kanë detyrë ligjore të mbrojnë të dhënat dhe TikTok nuk e ka bërë këtë,” tha komisioneri britanik i informacionit John Edwards. Edwards shtonte se përveç TikTok, agjencia po heton dhe rreth 50 shërbime të tjera online që dyshohet se kanë shkelur rregullat e mbrojtjes së të dhënave të fëmijëve.

Rregullatori financiar britanik paralajmëronte klientët e TikTok kundër “influencuesve” që jepnin “këshilla” për të luajtur në bursat e aksioneve, për të ashtuquajtura “investime” në kriptovaluta apo ‘forex trading’.

TikTok faces $29M fine in UK for ‘failing to protect children’s privacy’ | TechCrunch

Qendra Alert/Alert.al