Menu

Author Archives: Admin3

Video - E fundit, superjahti që prek tokën shqiptare për të paktën 500 mijë litra naftë “falas”

Video qe shikoni me poshte eshte bere para pak minutash ne Portin e Sarandes. Siç duket dhe ne pamje, nje superjaht, i cili merr te pakten 500 mije litra nafte. Arsyeja e ardhes se ketyre jahteve nuk eshte turizmi, por çmimi prej 50 lekesh per liter qe jua lejoj ligji shqiptar. Ky ligj eshte bere me qellim favorizimin e turizmit. Por ne te vertet, keto mjete luksoze sheikesh e pasanikesh prekin ujrat tona vetem per t’u furnizuar “falas”, me çmimin 50 lek per liter, te cilin nuk e gjejne ne asnje vend te botes.

Nderkohe qe keta pasanike “qarkullojne” naften e importuesve shqiptar, konsumatoret e blejne me afersisht  160 lek per liter, ose fermeret qe e kane perfituar nga skeman e subvensionit, me 87 lek per liter.
Alert.al

 

Biznesmeni e filantropi Lazim Destani: Ka ardhur koha të ridimensionojmë remitancat, qeveritë duhet të gjëjnë mekanizmat

Në aktivitetin për Ditën Ndërkombëtare të Remitancave, i mbajtur në Tiranë, por edhe me pjesëmarrës të ftuar nëpërmjet platformave “online”, ishte i ftuar dhe Anëtari i Këshillit Koordinues të Diasporës, njëkohësisht dhe President Nderi i Dhomës së Biznesit të Diasporës, Z.Lazim Destani. Filantropi dhe biznesmeni i njohur nga Tetova tha gjatë fjalës së tij se, ky është një rast i mirë për të reflektuar mbi ndikimin e reimtancave në zhvillimin ekonomik. “Roli dhe kontributi i diasporës shqiptare, gjithmonë ka qenë dhe vazhdon të jetë i jashtëzakonshëm për zhvillimet e përgjithshme në vendet tona. Ndërsa, kur është fjala te zhvillimi ekonomik i vendeve tona, remitancat përbëjnë mbase burimin kryesor”, tha Destani gjatë fjalës së tij, duke shtuar se, “në gjirin e diasporës sonë ka shumë profesionistë të aftë që e kanë dëshmuar veten në menaxhimin e resurseve të tilla”.


Më poshtë, mund të gjeni fjalën e plotë të Z.Destani.
“Ndihem i nderuar të jem i pranishëm në ngjarjet si kjo, që lidhen me diasporën, pasi për një periudhë të gjatë edhe vet jam pjesë e saj.
Është një rast i mirë që sot,në Ditën Ndërkombëtare të Remitancave, të reflektojmë mbi ndikimin e remitancave në zhvillimin ekonomik e shoqëror.
Roli dhe kontributi i diasporës shqiptare gjithmonë ka qenë dhe vazhdon të jetë i jashtëzakonshëm për zhvillimet e përgjithshme në vendet tona. Ndërsa kur është fjala te zhvillimi ekonomik i vendeve tona, remitancat përbëjnë mbase burimin kryesor.
Në të kaluarën remitancat kanë qenë në nivele më të ulëta dhe janë përdorur kryesisht për konsum nga familjet, ndërsa sot ato janë në nivele shumë më të larta. Prandaj është shumë e rëndësishme që ky kapital të kanalizohet, duke i gjetur rrugët dhe mekanizmat për ta bërë atë sa më efektiv, si për familjet ashtu dhe për ekonominë e vendit dhe shoqërinë në përgjithësi.

Lazim Destani

Në takime të ndryshme me afaristë të suksesshëm në diasporë, kemi diskutuar rreth idesë për themelimin (nga ana e Diasporës) e një Fondi për Investime në vendet tona. Mendojmë se, kjo do të ishte një mundësi shumë e mirë për ridestinimin e remitancave në investime direkte kapitale.
Si një formë tjetër për ridestinimin e remitancave mund jenë dhe mekanizmat e garancioneve qeveritare. Përmes kësaj forme, qeveria mund të motivojë partneritet me bankat europiane për zhvillim, si BERZH (Londër) apo Banka e Investimeve Europiane (Luksemburg), si dhe me banka të tjera për zhvillim në vendet perëndimore. Ekspertët e fushës (bankier investiv në tregun e kapitalit) do t’i menaxhonin këto fonde që paraqesin bazë për garancione, për kredi të buta apo edhe investime për ngritje biznesesh.
Në gjirin e diasporës sonë ka shumë profesionistë të aftë që e kanë dëshmuar veten në menaxhimin e resurseve të këtilla. Investimet prioritare mund të jenë në degë të shumta, si teknologjia e informacionit, digjitalizimi, motivimi i eksportit, bujqësia, e të tjera.
Një mundësi shumë e mirë do të ishte edhe krijimi i kushteve nga Institucionet e shtetit për të ofruar politika të mirëfillta për zhvillimin e turizmit duke bashkëpunuar me kompani të mëdha turistike nga Gjermania si dhe nga vendet tjera europiane.
Për realizimin e këtij synimi, pra për ta kanalizuar dhe për ta shumëzuar këtë potencial kaq të vlefshëm të remitancave, roli i shtetit është gjithsesi i pazëvendësueshëm.Në këtë drejtim mendoj se institucionet shtetërore mund të bëjnë shumë, duke krijuar mekanizma e platforma të favorshme investuese e duke hartuar politika që nxisin ridestinimin e remitancave drejt investimeve.
Ekspertët e fushës së zhvillimit ekonomik, drejtues të dikastereve apo institucioneve financiare, me siguri që i njohin mirë këto mekanizma. Ndërsa jam i bindur se burime financimi gjenden plot kur të krijohen mekanizmat dhe instrumentet e duhura.

Sigurisht që ka edhe shumë mundësi dhe modele të tjera për t’i rritur sa më shumë prurjet nga diaspora dhe për t’i bërë ato sa më efektive.
Tani, ne kemi dhe Dhomën e Biznesit të Diasporës në Tiranë, e cila është një urë lidhëse për të ndihmuar të gjitha investimet.
Pa e zgjatur më shumë, uroj që diaspora të jetë sa më e përfshirë në zhvillimin ekonomik të vendeve tona, dhe të jemi sa më të organizuar e të bashkuar sepse kështu jemi më të fuqishëm”.
Alert.al

Dita e Remitancave, Majko:Të krijojmë model për ti dhënë hov zhvillimit ekonomik

Në Tiranë po mbahet takimi në Ditën Ndërkombëtare të Remitancave, duke vlerësuar këtë kontribut, mirëmenaxhimi i remitancave në dobi të familjeve të vendit si edhe formalizimi i kanaleve të dërgimit të tyre në atdhe, objektiva kryesore këto dhe të Strategjisë Kombëtare të Diasporës.

Në fjalën e tij ministri i Shtetit për Diasporën Pandeli Majko tha se, deri tani remitanca është konsideruar vetëm një e ardhur dhe kaq, duke theksuar nevojën e një modeli të dobishëm, një alfabeti të ri ekonomik, pasi remitancat tejkalojnë dhe investimet e huaja në vend.

“Mendoj që takimi i sotëm është i një rëndësie të veçantë. Arsyetimi mbështetet tek Strategjia Kombëtare e Diasporës, është në një moment të rëndësishëm të aplikimit të vet. Është ndër sektorët e rrallë të Republikës së Shqipërisë që brenda 4 viteve është strategjia e dytë që aplikohet për diasporën dhe marrëdhëniet e shtetit shqiptar me Diasporën. Ajo që dëshiroj të nënvizoj është tema e remitancave që deri tani është konsideruar si një e ardhur dhe vetëm kaq. Modelet e dobishme që po shohim në shumë vende të botës tregojnë se bëhet fjalë për një alfabet të ri ekonomik kur flitet për remitancat. Aktualisht për Republikën e Shqipërisë përfaqësojnë të ardhurën më të madhe që shteti shqiptar merr. Ato tejkalojnë dhe investimet e huaja apo investime të natyrave të tjera të brendshme. Bëhet fjalë për një të ardhur që shkon në kufijtë e 1 miliardë dollarëve”, tha ministri Majko.

Ai përmendi dhe Bankën e Diasporës si një pikë e marrëveshjeve të firmosura mes Shqipërisë dhe Kosovës.

Fjala e plotw e ministrit Majko

Pandeli Majko

“Ju përshëndes të nderuar pjesëmarrës. Mendoj që takimi i sotëm është i një rëndësie të veçantë. Arsyetimi mbështetet tek Strategjia Kombëtare e Diasporës, është në një moment të rëndësishëm të aplikimit të vet. Është ndër sektorët e rrallë të Republikës së Shqipërisë që brenda 4 viteve është strategjia e dytë që aplikohet për diasporën dhe marrëdhëniet e shtetit shqiptar me Diasporën. Ajo që dëshiroj të nënvizoj është tema e remitancave që deri tani është konsideruar si një e ardhur dhe vetëm kaq. Modelet e dobishme që po shohim në shumë vende të botës tregojnë se bëhet fjalë për një alfabet të ri ekonomik kur flitet për remitancat. Aktualisht për Republikën e Shqipërisë përfqësojnë të ardhurën më të madhe që shteti shqiptar merr. Ato tejkalojnë dhe investimet e huaja apo investime të natyrave të tjera të brendshme. Bëhet fjalë për një të ardhur që shkon në kufijtë e 1 miliardë dollarëve. Gjithsesi mendoj që mos të bëhem më ekspert se ekspertët dëshiroj të vlerësoj dhe nënvizoj faktin se BSH me INSTAT ka disa vjet që ka futur në konceptin e raportimit vjetor çështjen e diasporës. Sidomos BSH i ka dhënë një cilësi të veçantë këtij momenti për të cilin ka vlerësimin më të veçantë duke nisur nga guvernatori dhe gjithë stafi që ka në dispozicion. Unë dëshiroj të vlerësoj aktivitetin e sotëm, nuk dëshiroj të eci me logjikën se ne anëtarët e qeverisë i dimë gjërat më mirë. Aktualisht çështja që po diskutohet sot në ditën e remitancave kërkon ekspertizë të nivelit të veçantë. Për shkak të COVID jemi detyruar që të realizojmë komunikime të natyrave të tilla. Shpresoj që vitin që vjen aktiviteti të zhvillohet në kushte të ndryshme dhe të jemi të ulur në një tavolinë të rrumbullakët si përfaqësues të institucioneve të ndryshme edhe ndërkombëtare. Çështja e remitancave, angazhimi për to është ende në hapat e parë. Mendoj se jemi vonë po duke thënë këtë nuk përbën justifikim, po nxitje për të ecur më shpejt në trajtimin e të ardhurës më të madhe që zotëron sot kombi shqiptar dhe që quhet remitancë, dhe nuk kam fjalën vetme për shtetin shqiptar po dhe nivelin e lartë të migrimit në territore shqiptare jo vetëm në Shqipëri, por në Mal të Zi, Kosovë, Preshevë, Maqedoni. Përbën një moment tepër delikat që ka nevojë të diskutohet. Nënvizoj se në një nga marrëveshjet që është firmosur mes Repubikës së Shqipërisë dhe Kosovës është vendosur dhe një pikë për ngritjen e Bankës së Diasporës si angazhim i përbashkët, por janë projekt të së ardhmes. E rëndësishme është se zëri i profesionistëve vlen të dëgjohet më shumë se zëri i politikës dhe ne kemi nevojë për zërin e profesionistëve për tu ballafaquar më sfidat kryesore ku nuk diskutohet mungesa e financave, parave nëse flasim në gjuhë të thjeshtë, po mënyra e menaxhimit të tyre. Aktualisht remitancat përdoren vetëm për ndërtim, arsim dhe shëndetësi, në një kohë që shumë shtete të tjerë që kanë qenë në kushte të Shqipërisë kanë ndërtuar modele që i kanë dhënë hov zhvillimit ekonomik të vendit duke e kthyer nga marrës të remitancave në të kundërt. Mendoj se është një proces që ka vetëm 2 vjet që ka filluar dhe me mbështetjen e BSH. Prandaj dëshiroj që duke ju përshëndetur t’ia lë fjalën ekspertëve. Ju faleminderit!”

Alert.al

A mundet një qen të dallojë ngjyrat?

Dr. Gerta Dhamo*

A jeni bërë kurioz ndonjëherë se çfarë ngjyrash shikon qeni juaj? Më herët shumica e veterinerëve mendonin se qentë shikonin bardhë e zi dhe në fakt, shumica prej nesh mendojnë ende se qentë nuk mund t’i shikojnë ngjyrat. Por kjo është vetëm pjesërisht e vërtetë.

Qentë kanë një spektër vizioni ku ata mund të shohin hijen e blusë, të verdhës dhe grisë. Por ndërkaq nuk mund të krahasohet vizioni i tyre me atë të njeriut, sepse njerëzit shikojnë një spektër më të gjerë ngjyrash.

Kuptimi i shikimit të qenit

Për shkak të disa arsyeve biologjike që qentë kanë dhe një karakteristikë e tillë i referohet faktit se, ato kanë vetëm dy tipe të qelizave të receptorëve të ngjyrës, krahasuar me njeriun që ka tre, bota e një qeni është kryesisht më pak e ndritshme sesa e njeriut. Ngjyrat që qentë shohin, i ngjajnë disi botës ku vetëm bluja dhe e verdha përjashtohet dhe pjesa tjetër e saj është grija. Megjithëse ka ndryshime në hijen e grisë, të verdhës dhe blusë, shikimi i tyre nuk është i aftë të perceptojë të kuqen, lejlanë, rozën dhe jeshilen. Ata kanë një shikim dikromatik që i lejon të shohin vetëm tre ngjyra.

Sidoqoftë, nuk duhen nënvlerësuar aftësitë e tyre, përkundrazi, qentë kanë aftësi më të mirë të shohin gjërat në errësirë dhe janë të aftë të zbulojnë lëvizjen më lehtë sesa njeriu. Përveç kësaj, qentë janë më efikasë në kuptimin e hijeve të ndryshme të grisë. Fusha e tyre e gjerë e shikimit i lejon ata të shohin gjëra (objekte) në 240 gradë,  krahasuar me këndin 180 gradë tek njeriu. / UBGreen.al

*Departamenti i Moduleve Klinike, Fakulteti i Mjekësisë Veterinare, UBT

Alert.al

Prindërimi, një detyrë e vështirë, që është ç'orientuar në kohët e sotme!!!

Nga Blerta Brati Kika*

Nisur nga ngjarjet e fundit, nje adoleshent aksidenton nje vajze…..
Prindërimi, një detyrë e vështirë, që është ç’orientuar në kohët e sotme!!
Kërkoni nga vetja, para së të kërkoni nga fëmija!
Mos u habisni me sjelljet e tij, ai është pasqyra juaj!
S’mund të jetoni rininë tuaj të pajetuar, në periudhën e prindërimit!
Edukimi i fëmijes tuaj, është vlerë për të, për ju, për ne, për shoqerinë!
Pamja klasike e roleve të prindërve është si më poshtë: Babai konsiderohet kryefamiljar, ai punon dhe siguron familjen. Mamaja është përgjegjëse për shtëpinë; ajo kujdeset për fëmijët, kujdeset për ta, i edukon, … … Fëmija, nga ana e tij, ruan një vizion më klasik të vendit të prindërve të tij.
Mamaja: Çfarë roli në jetën e fëmijës? Të jesh nënë mund të mësohet dita ditës. Nëna është shumë shpesh figura qendrore në jetën e fëmijës, kontakti i tij i parë me botën…. Nga lindja në adoleshencë dhe madje edhe më tej, amësia ju lejon të krijoni lidhje të forta me fëmijën tuaj.
Të jesh “një nënë e mirë” do të thotë të dëgjosh fëmijën tënd, të dish ta sigurosh, t’i japësh vetëbesim, të jesh bashkëpunëtor me të, por gjithashtu do të thotë të vendosësh kufij (duke e ndëshkuar kur është e nevojshme)), Mësoji “lirinë “(liria e mendimeve / autonomisë së tij, toleranca etj,), jini të shqetësuar për të …
Në adoleshencë, veçanërisht nëse keni qëndrime prindërore që demonstrojnë ngrohtësinë tuaj, dëgjimin tuaj dhe një mendje të hapur, adoleshenti juaj do t’ju respektojë, do t’ju besojë dhe do ta lejojë veten të ndikohet nga ju. Së pari dhe më e rëndësishmja, është që ju të pranoni që fëmija juaj të jetë një person i ndryshëm nga ju.
Një prind duhet të dijë për shëndetin; rregullat për një dietë të mirë, ritmet dhe higjenën e jetës, monitorimin mjekësor…
Edukimin: Karriera në shkollë, të mësuarit në shtëpi, aktivitete jashtë kurrikulës …
Ndaj mos harroni se:
të respektoni dhe dëgjoni fëmijën tuaj;
edukojeni të jetë një model i mirë në sjellje;
kujtoni se fëmijët janë të gjithë të ndryshem;
jeni i durueshëm, inkurajues dhe mirëkuptues me fëmijën tuaj;
vendosni rregulla të qarta dhe precize per sjellje tq pranueshme;
disiplinoni fëmijën tuaj ne një mënyrë pozitive, pa qenë shumë të ashpër;
mësoni më shumë për të ndryshimet, fazat e zhvillimit të një fëmije;
kërkoni ndihmë kur keni nevojë dhe ju duhet;
merrni pak kohë për të, sepse është në interesin më të mirë të fëmijes tuaj të ketë prindër të mirë, te pergjegjshem dhe te gezuar.
*Mjeke Mikrobiologe
Alert.al

Për Maqedoni, nga 1 korriku hiqet Roaming me vendet fqinje

Ministri për Punë të Jashtme i Maqedonisë së Veriut, Bujar Osmani, përmes profilit të tij të FB-së ka bërë të ditur se roamingu nga Maqedonia e Veriut, duke nisur prej me 1 korrik nuk do të vlejë për vendet si: Shqipëria, Kosova, Sërbia, Bosna&Hercegovina dhe Mali Zi. bonzo.info

 

Cilësia dhe kontrabanda e pesticideve, rreziku për fermerët, konsumatorët dhe zhdukjen bletëve

Nga Rudina MUÇA*

Fermerët e mbjellin tokën, por në fund të sezonit nuk e kanë të sigurt prodhimin. Fermeri dhe konsumatori shqiptar shumë herë mbesin të zhgënjyer nga prodhimi shqiptar. E ndërsa fermeri nuk është i kënaqur me sasinë e prodhimit bujqësorë, kosnumatori i frikësohet cilësisë. Shumë prodhime shqiptare në momentin që dërgohen për eksport në vende të ndryshme të BE-së rezultojnë se, kanë përqindje të lartë të mbetejve kimike.

Po përse prodhimet shqiptare mbingarkohen me pesticide?

Kërkesa e lartë për perime gjatë gjithë vitit ka bërë që në vendin tonë të shtohen sipërfaqet me të mbjella në sera. Gjatë periudhës së pranverës dhe verës fermerët ankohen për llojin e sëmundjes që e ka emrin “Tuta e domates”, ose siç njihet ndryshe, krimbi i serës. Sipas tyre, kjo sëmudje vë në rrezik prodhimin, pasi insekticidet që duhet ta eleminojnë krimbin e domtës duket se janë të pafuqishme përballë insektit milimetrik.

Besnik Qerreti, fermeri nga Lushnja, para 6 vitesh erdhi nga Italia. Në tokën e tij ai ngriti disa sera, në të cilat kultivon perime si, domate, speca dhe kastraveca. Në serat e tij, Besniku investoi 156 milion lekë të vjetra, ndërsa thotë se, shumë herë është në prag falimetimi.

“Do të falimetoj. Shumë herë jam në rrezik të madh dhe nuk e dimë se me çfarë preparatesh spërkasim prodhimin tonë. Një vit më parë jam detyruar që domatet t’i hedh në kanal, nuk i shita dot pasi mi hëngri krimbi. E spërkata domaten më shumë se 5 herë dhe përsëri nuk e shpëtova dot prodhimin. Kjo serë më nxori me humbje, nuk mora as paratë që hodha në të”, tha fermeri Besnik Qerreti.

Besnik Qerreti, fermer

Fermerët janë dëshmitarë të cilësisë së imputeve bujqësore. Ministria e Bujqësië dhe Zhvillimit Rural, në faqen e saj zyrtare ka publikuar listën e plotë të PMV-ve për 2021. Në këtë listë mendohet se, cilësia e imputeve bujqësore është e kontrolluar dhe nuk ka abuzime. Ndërkohe e vërteta është ndryshe. Fermerët thonë se, dy vite më parë “Tutën e domatës” e elemionin me një insekticid që në Shqipëri kishte etiketën e plehut EC Fertilizers. “Domaten e kam spërkatur me një tjetër ilaç Silikon Mix, është i pazëvëndësueshëm. Mjaftonte një herë ta spërkasje domaten dhe shpëtoje prodhimin. Por nuk e dimë se përse e hoqi shteti, ai ilaç nuk gjendet më në treg”, vijon Qerreti.

Helmet e rrezikshme nga sera përfundojnë në tryezën tonë. Importuesit e imputeve bujqësore kërkojnë të bëjnë biznes me shëndetin e konsumatorit. Hedhja në treg e “Silikon mix”, të kamufluar si pleh tregon se sa i pasigurtë është fermeri dhe konsumatori. Ky insekticid mund të luftonte sëmundjen e domates, por Ministria e Bujqësië dhe konsumatori ishin drejt një helmi të panjohur, në etiketë nuk shënohet lënda aktive që lufton insektin e domates.

Për të shpëtuar të mbjellat, fermerët shumë herë u drejtohen pesticideve kontrabandë që shiten nën banaqet e farmacive bujqësore. Pesticidi “Methomyl 90 sp” edhe përse është i ndaluar të përdoret nga fermerët dhe të tregtohet nga farmacitë bujqësorë, përsëri prodhimet bujqësore spërkaten më të.

Por sa i rrezikshëm është ky pesticid? Toksikologët thonë që ky helm merr dhe jetë njerëzish.

“Ky preparat deporton lehtë në orgaznizëm dhe degradimi i tij shkon deri në 21 ditë. Është një preparat me toksicitet të gjërë. Mund të deportojë në organizëm nga të gjitha rrugët, përmes lëkurës, traktit tretës, duarve, të gojës ndojëherë edhe përmes frymëmarrjes. Është një preparat që degradohet me shumë vështirësi. Mund të qendrojë në organizëm pa u prishur struktura e tij. Efekti toksik është i menjëhershmë nësë doza e madhe përthithët me njëherë të bllokon rrugët e frymëmarrjes, pra insuficence resperatore. Kjo të sjell vdekje të shpejtë. Po ashtu, prek edhe sistemin kardiovaskular, të shkakton hipertension. Ky preparat gjihashtu, nëse qendron gjatë mund të japë ankth e të dëmton nervat. Pra probleme të mëdha mendore”, thotë mjeku toksikolog, Prof. Dr. Zihni Sulaj.

Prof. Dr. Zihni Sulaj, mjek toksikolog

Për imputet bujqësore që nuk mbrojnë mjedisin, prodhimin dhe konsumatorin, gjithashtu denoncmet vijnë edhe nga fermerët që kanë ullishte. Fermerët thonë se, ulliri preket nga sëmundja e kalbëzimit dhe e krimbit. Ata tregojnë, se gjatë sezonit që kjo pemë preket nga sëmundja që vë në rrezik prodhimin, detyohen që ta spërkasin mbi 6 herë.

“Historia e pesticideve të skaduar në vendin tonë ka filluar herët. Më kujtohet që në vitin 2014 kam blerë një ilac që kish skaduar në 2011. E kam spërkat ullirin me atë helm mbi 7 herë dhe me shumë vështirësi e munda kalbëzimin. Cilësia e pesticideve nuk ka ndryshuar, tani thjesht fshijnë datën e skadencës. Nuk dimë se çfarë të bëjmë. Ne që jemi nga Berati, imputet bujqësore i blejmë në Greqi dhe i fusim fshehurazi me çantë në doganë. Këtë e bëjmë për të mbrojtur prodhimin tonë dhe fermerët”, – tha fermeri nga Berati, Mariglen Hoxha.

Imputet bujqësore që vënë në rrezik jetën e bletës

E ndërsa fermërët kujdesën për prodhimin në tokën e tyre, pesticidet e vrasëse vënë në rrezik të gjithë bimësinë. Sipas një vlerësimi të publikuar në vitin 2018 nga vlerësuesit shkencorë të Bashkimit Evropian, përdorimi i disa insekticideve vë në rrezik jetën e bletëve. Saktësisht, bëhet fjalë për insekticidet neonicotinoid. Në vitin 2018 familja e këtyre pesticideve me një urdhër të ish-Ministrit të Bujqësisë Niko Peleshi tentoi që insekticidet që vënë në rrezik jetën e bletës të hiqen nga lista e PMB-ve. Urdhër-ndalimi, përdorimi dhe tregtimi ishte për inseticidet që që si lëndë aktive kanë: Fenazaquin, Bifenthrin, Neonicotnidet, Clothianidin, Thiamethoxam, Imidacloprid.

“Ne ndalojmë përdorimin e këtyrë 6 lëndëve vepruese. Sipas studimeve të Bashkimi Evropian e të Komisionit Evropian, pasi mendohet se janë dëmtuesit kryesorë të bletëve. Siç e dini dhe ju më mirë se unë, ky është shqetësim jo vetem shqiptarë, por mbarë botëror”, tha ish-ministri i Peleshi (https://bujqesia.gov.al/peleshi-ndalojme-pesticidet-qe-demtojne-kolonite-e-bleteve/). Ky urdhër ndalimi u firmos më 31 maj të 2018.

Ministri i Bujqësisë i asokohe Niko Peleshi gjatë një diskutimi me bletërritësit në vitin 2018

Sipas bletërritësve, ky urdhër ndalimi nuk u respektua kurrë. Ata thonë se, insekticidet me lëndë aktive që vënë në rrezik bletët janë në treg. Këto impute bujqësore, gazetarët e Qendrës ALERT i gjetën në listën e PMBV-ve të 2021. Inskticidet që vënë në rrezik bletën janë të pranishme në çdo farmaci bujqësore. Ato hidhen në treg me emrin tregtar: Confidor SL 200, Confidor WG 70, Dantop 50 WD, Imidamex 70 WG.

Bletarët thonë se, çdo vit në periudhën  e pranverës dhe verës humbin familje bletësh, sipas tyre spërkatje e pemëve me helmet e rrezikshme shkurton jetën e bletës. Pikërisht në periudhën e pranverës, atëherë kur bleta gjen nektarin në këtë sezon, fermerët për të shpëtuar prodhimin e tyre marin jetë bletësh. “Nuk e dimë çpo ndodh me bletët. Për bletarin, stina më e vështirë mendohet të jetë dimri, ndërkohë po shohim që familjet e bletëve na ikin dhe në pranverë. Helmet po vënë në rrezik bletët, po prodhojmë më pak mjaltë. Ndërsa jeta e mbretëreshës është shkurtuar. Bletët, pasi marrin nektarin e pemëve të spërkatura me ilaçet vrasë kthehen në zgjua, aty infektohet më pas vdes e gjithë familja”, tha Danjel Basha.

Në tjetër shqetësim për bletërritësit është cilësia e preparateve që duhet të luftojnë sëmundjet që prek bletën.

Daniel Basha, bletërritës, Elbasan

“Varroa, është një nga sëmundjet më të rrezikshme për bletët. Kam provuar të gjitha llojet e preparateve nuk më japin efikasitet. Shoh që më vdesin çdo ditë bletë. Gjithashtu kemi provuar dhe medikamente popullore përsëri nuk ka efekt. Ministria e Bujqësisë, para se të lidhë kontratë, se cilat preparate do të futen në Shqipëri, duhet të sigurohet për efektshmërinë e tyre. Kjo sjellje e institucioneve që duhet të mbrojnë fermerin lë për të dëshiruar. Ferma ime është në rrezik, mund ta humbas atë jo prej neglizhes time si betar, por prej neglizhencës së shtetit”, përfundoi bletari Danjel Basha.

Analizimi për imputet bujqësore të falsifikuara dhe jo cilësore duhet të bëhet nga institucioni që ka në dorë shëndetin e shqiptarëve, pra nga Ministria e Bujqësisë dhe Zhvillimit Rural.

*Autorja e shkrimit është gazetare me ekseriencë disavjeçare në media të shkruara dhe elektronike, si dhe ka qenë pjesë e emisioneve televizive investigative. Aktualisht, është pjesë e departamentit të informacionit në televizionin Top Channel.

 

 

Ky botim u prodhua me mbështetjen financiare të Ambasadës së Shteteve të Bashkuara në Tiranë dhe Partnereve. Permbajtja e tij është përgjegjësi vetëm e autorit të shkrimit dhe e Qendrës Alert, si dhe nuk pasqyron domosdoshmërisht pikëpamjet e Ambasadës së Shteteve të Bashkuara në Tiranë dhe Partnerëve.

QENDRA ALERT / ALERT.AL

Fëmijët në çerdhe e kopshte? Drejtoresha Zhaneta Beqiri sqaron mënyrat e regjistrimit, afatet dhe prioritetet - Video

Është pikërisht periudha e regjistrimeve në çerdhet e Tiranës, por edhe në të gjithë Shqipërinë. Për këtë arsye, shumë prindër kanë paqartësi se, si do të regjistrojnë të vegjlit e tyre në çerdhe e kopshte, dokumentacioni që duhet, procedurat, afatet etj. Drejtoresha e Përgjithshme Çerdheve dhe Kopshteve të Tiranës, Znj.Zhaneta Beqiri, në një intervistë dhënë për emisionin “7 pa 5” në Vizion Plus, ka spjeguar procedurën dhe afatet. Regjistrimet, sipas saj, në çerdhe kanë nisur ditën e hënë dhe përfundojnë të premten më 11 qershor. Kjo periudhë është e vlefshme për të gjithë ata fëmijët që kanë mbushur 6 muaj apo i mbushin edhe në ditët e muajt në vijim.

Në të gjitha çerdhet e Tiranës janë ngritur komisionet e regjistrimit, ku prindrit duhet të çojnë dokumentacionin e kërkuar, dy certifikata, personale dhe familjare të fëmijës, si dhe dy vërtetime pune. Kjo e fundit duket se i ka konfuzuar paksa prindrit, ndërkohë që Znj.Beqiri e spjegon në këtë mënyrë përse duhen vërtetimet e punës për të dy prindrit. “Së pari, kërkesa për frekuentimin  e çerdheve është shumë e madhe. Për shkak të veçorive ndryshe të çerdheve, për shkak të kapaciteteve më të vogla, sepse një bebe do kujdes më të madh, vëmendje më të madhe, kushte për ushqim e fjetje më specifike se ata që janë më të rritur e frekuentojnë kopshtet, numrit më të vogël të bebeve në grupe, atëherë prioritet iu jepet fëmijëve që kanë të dy prindrit të punësuar, gjë që vërtetohet nëpërmjet këtyre dokumenteve. Kjo nuk do të thotë se nuk pranohen apo nuk regjistrohen edhe ata me njërin prind në punë, por gjithçka bëhet sipas prioriteteve”, tha Beqiri.

Ndryshe nga kopshtet, ku regjistrimet bëhen në fillim shtatori, çerdhet e kanë në këtë periudhë afatin zyrtar, por normalisht ka dhe gjatë gjithë vitit. Kjo, pasi sipas Znj.Beqiri, nëse një fëmijë lind tani, padyshim që pas 6 muajsh i lind e drejta të frekuentojë çerdhen e që në atë moment, prindwrit mund të paraqiten pranë Drejtorisë së Çerdheve e Koshteve, dorëzojnë dokumentacionin e duhur dhe fëmija nis frekuentimin.

Ndërsa për kopshtet, që vitin e kaluar ka pasur një risi. Fëmijët që mbushin 3 vjeç kalojnë në Kopsht. Dhe, për të lehtësuar procedurat, Drejtoria e Çerdheve dhe Kopshteve të Tiranës nuk iu kërkon më prindërve dokumentacionin nga e para, pasi ato gjenden në dosjet e fëmijëve që në çerdhe. “E kemi nisur që vitin e kaluar e kështu do vazhdojë edhe këtë vit e në vazhdim. Fëmijët që frekuentojnë çerdhen i kalojmë automatikisht në Kopsht. Vetëm se, prindrit duhet të shprehin interesin e tyre për kopshtin ku duan, gjithmonë brenda njësisë apo zonave që iu takon dhe nuk kanë asnjë nevojë për dokumenta tjera shtesë apo pa kaluar para një komisioni. Fëmija që ka mbushur 3 vjeç frekuenton çerdhen deri më 31 gusht dhe në 1 shtator kalon në Kopsht”, theksoi Drejtoresha e Përgjithshme e Çerdheve dhe Kopshteve.

Alert.al

Puro "Qunto" të personalizuara me imazhin e Skënderbeut, për kampionin e karatesë. Filantropi Lazim Destani pret në selinë e tij, Enver Idrizin

Biznesmeni i njohur dhe filantropi Lazim Destani, priti në selinë e tij në Dyseldorf kampionin botëror të karatesë Enver Idrizi, në shenjë mirënjohjeje për kontributin e tij jovetëm në sport, por në ngritjen e vlerave të kombit shqiptar.

Me këtë rast Z.Destani, duke vleresuar rolin dhe kontributin kombëtar te kampioni botëror Enver Idrizi e ka ftuar si mysafire spacial ne rezidencën e tij, duke i dhënë dhe një pako speciale si surprizë.

Qëllim i kësaj pritje të Enver Idrizit nga ana e Lazim Destanit ishte për t’i bërë një surprizë, pasi një sërë suskesesesh dhe mirënjohjesh që ju ishin ndarë gjatë këtij viti Enver Idrizit nga insititucione kombetare dhe personalitete të larta, si nga Kosova ashtu edhe nga Shqiperia e Maqedonia e Veriut dhe së funmi në Kroaci i është dhënë titulli “Legjenda e të gjitha kohërave e karatesë”.

Me këtë rast, Lazim Destani, duke vleresuar rolin dhe kontributin kombëtar të Enver Idrizit, sipas të cilit, ai e ngritur imazhin e kombit tonë drejt sensiblizmit të çeshtjes së Kosovës dhe asaj mbarëshqiptare në arenen nderkombëtare. Prandaj edhe dhuratat për kampionin botëror nga biznesmeni i njohur shqiptar Lazim Destani ishte një kuti me cigare puro, prodhim i limituar me imazhin e me Skënderbeut.

Marka e purove “Qunto” është në pronësi të aktorit Blerim Destani. Ky i fundit, ka prodhuar 100 kuti të personalizuara me figurën e Skdnërbeut dhe një nga këto babai i tij ia dhuroi kampionit të karatesë, Enver Idrizi.

Ka qenë vetë Idrizi ai që e ka zbuluar surprizën. “Sot mora një dhuratë shume interesante dhe të çmuar për mua. Një pako me cigare puro të limituar të markës QUNTO, markë e aktorit të njohur Blerim Destani, djali i Lazimit. Kjo kuti, ku çdo cigare mban me imazhin e Skënderbeut, është prodhuar enkas për Z.Destani nga djali i tij, pronar i markës “Qunto”. Familja Destani është një familje bujare, patriotike dhe humane, që ka bërë dhe bën shumë për trojet shqiptare. Zoti e bekoftë këtë familje bashkë me tre djemtë e tij shembullor, Nazifin, Blerimin dhe Selimin, të cilët janë bërë shembull për gjithë shqiptarët në Gjermani dhe Perëndim”, shkruan Enver Idrizi.

Alert.al

Ushqim i sigurt tani për një të nesërme të shëndetshme! 420 mijë njerëz vdesin çdo vit nga ushqimi i kontaminuar

Dita Botërore e Sigurisë Ushqimore që festohet në çdo 7 Qershor synon të tërheqë vëmendjen dhe të frymëzojë veprime për të ndihmuar në parandalimin, zbulimin dhe menaxhimin e rreziqeve që vijnë nga ushqimi, duke kontribuar në sigurinë ushqimore, shëndetin e njeriut, prosperitetin ekonomik, bujqësinë, aksesin në treg, turizmin dhe zhvillimin e qëndrueshëm. Tematika e këtij viti, “Ushqim i sigurt sot për një të nesërme të shëndetshme”, thekson se prodhimi dhe konsumi i ushqimit të sigurt ka përfitime të menjëhershme dhe afatgjata për njerëzit, planetin dhe ekonominë. Njohja e lidhjeve sistematike midis shëndetit të njerëzve, kafshëve, bimëve, mjedisit dhe ekonomisë do të na ndihmojë të plotësojmë nevojat e së ardhmes. Duke njohur barrën globale të sëmundjeve të transmetuara nga ushqimi, të cilat prekin individë të të gjitha moshave, veçanërisht fëmijë nën 5 vjeç dhe persona që jetojnë në vende me të ardhura të ulëta, Asambleja e Përgjithshme e Kombeve të Bashkuara shpalli në 2018, që çdo 7 Qershor do të jetë Dita Botërore e Sigurisë Ushqimore. Në vitin 2020, Asambleja Botërore e Shëndetësisë miratoi një rezolutë për të forcuar përpjekjet globale për sigurinë e ushqimit për të zvogëluar barrën e sëmundjeve të transmetuara nga ushqimi. OBSH dhe Organizata e Ushqimit dhe Bujqësisë e Kombeve të Bashkuara (FAO) së bashku lehtësojnë respektimin e Ditës Botërore të Sigurisë Ushqimore, në bashkëpunim me Shtetet Anëtare dhe organizatat e tjera përkatëse. Siguria e ushqimit është një përgjegjësi e përbashkët midis qeverive, prodhuesve dhe konsumatorëve. Të gjithë kanë një rol për të luajtur në zinxhirin “nga ferma në tavolinë”, për të siguruar që ushqimi që konsumojmë është i sigurt dhe i shëndetshëm. Përmes Ditës Botërore të Sigurisë Ushqimore, OBSH punon për të futur sigurinë e ushqimit në agjendën publike dhe për të zvogëluar barrën e sëmundjeve që vijnë nga ushqimi globalisht. Siguria e ushqimit është punë e të gjithëve.

***

Pse është e rëndësishme përmirësimi i sigurisë ushqimore?

Aksesi në sasi të mjaftueshme të ushqimit të sigurt është thelbësor për mbajtjen e jetës dhe promovimin e shëndetit të mirë. Sëmundjet e transmetuara nga ushqimi janë zakonisht me natyrë infektive ose toksike dhe shpesh të padukshme për syrin e thjeshtë, të shkaktuara nga bakteret, viruset, parazitët ose substancat kimike që hyjnë në trup përmes ushqimit ose ujit të kontaminuar. Siguria e ushqimit ka një rol kritik për të siguruar që ai të mbetet i sigurt në çdo fazë të zinxhirit ushqimor – nga prodhimi te korrja, përpunimi, ruajtja, shpërndarja, deri në përgatitjen dhe konsumimin. Me rreth 600 milion raste të sëmundjeve të transmetuara nga ushqimi çdo vit, ushqimi i pasigurt është një kërcënim për shëndetin e njeriut dhe ekonomitë, duke prekur në mënyrë disproporcionale njerëzit e pambrojtur dhe të margjinalizuar, veçanërisht gratë dhe fëmijët, popullatat e prekura nga konflikti dhe migrantët. Rreth 420000 njerëz në të gjithë botën vdesin çdo vit pasi kanë ngrënë ushqim të kontaminuar dhe fëmijët nën moshën 5 vjeç mbajnë 40% të barrës së sëmundjes që rrjedh nga ushqimi, me 125 000 vdekje çdo vit. Dita Botërore e Sigurisë Ushqimore në 7 Qershor synon të tërheqë vëmendjen dhe të frymëzojë veprim për të ndihmuar në parandalimin, zbulimin dhe menaxhimin e rreziqeve që vijnë nga ushqimi, duke kontribuar në sigurinë ushqimore, shëndetin e njeriut, prosperitetin ekonomik, bujqësinë, hyrjen në treg, turizmin dhe zhvillimin e qëndrueshëm. Organizata Botërore e Shëndetësisë (OBSH) dhe Organizata e Ushqimit dhe Bujqësisë e Kombeve të Bashkuara (FAO) së bashku lehtësojnë respektimin e Ditës Botërore të Sigurisë Ushqimore, në bashkëpunim me Shtetet Anëtare dhe organizatat e tjera përkatëse. Kjo ditë ndërkombëtare është një mundësi për të forcuar përpjekjet për të siguruar që ushqimi që hamë është i sigurt, siguria kryesore e ushqimit në agjendën publike dhe për të zvogëluar barrën e sëmundjeve që vijnë nga ushqimi globalisht.

Marrë nga faqet e OBSH dhe OKB

Qendra Alert – Alert.al