Një ngarkesë me pije energjike “Red Bull” është bllokuar në Pikën e Inspektimit Kufitar në Kapshticë dhe është kthyer në vendin e origjinës, pasi nuk përmbushte kërkesat ligjore për import në Shqipëri.
Sipas Autoritetit Kombëtar të Ushqimit, gjatë kontrolleve rutinë në kufi, trupa inspektuese konstatoi se ngarkesa me peshë totale 6,480 kilogramë kishte mangësi të theksuara në dokumentacion.
Nga verifikimet rezultoi se subjekti importues dispononte vetëm faturën e blerjes së produktit, ndërsa mungonin dokumente thelbësore që garantojnë sigurinë dhe gjurmueshmërinë e tij, si certifikata e origjinës (EUR.1), certifikata e cilësisë, certifikata e konformitetit dhe certifikata e analizës së produktit.
Për këtë arsye, në zbatim të ligjit “Për ushqimin”, AKU vendosi bllokimin e menjëhershëm të ngarkesës dhe kthimin e saj në origjinë, duke ndaluar hyrjen në tregun vendas.
Sipas institucionit, kontrollet në pikat kufitare do të vijojnë me të njëjtin intensitet, me qëllim parandalimin e futjes në vend të produkteve që nuk përmbushin standardet e sigurisë ushqimore.
Autoriteti Kombëtar i Ushqimit thekson se mbetet i angazhuar në mbrojtjen e shëndetit të konsumatorëve dhe garantimin e sigurisë ushqimore në çdo hallkë të zinxhirit tregtar.
