Menu

Aktualitet

I ikën postbllokut të policisë në Vlorë, më pas përmbyset me makinë, dy të plagosur nga aksidenti

Një ngjarje e rëndë, por që fatmirësisht pa viktima ka ndodhur sot pasdite në Vlorë. Një automjet i cili po ndiqej nga Policia është përplasur dhe përmbysur në Vlorë.

Policia ishte duke ndjekur një makinë në rrethana ende të paqarta, ndërsa kjo e fundit po bënte manorva të rrezikshme. Makina fillimisht u ka shpëtuar policëve, por më pas u përplas me një mjet tjetër dhe ngeli ‘kokë poshtë’.

Si pasojë është përplasur me një makinë tjetër dhe është përmbysur. Nga përplasja e fortë kanë mbetur të plagosur dy persona, një prej tyre rëndë. Ngjarja ka ndodhur në lagjen “10 korriku”, ndërsa mësohet se shoferi i makinës nuk i ka ndaluar postbllokut të policisë.

.(ne perditesim)

 

Asnjë humbje jete nga koronavirusi dhe 12 raste të reja në 24 orët e fundit

Shqipëria nuk ka regjistruar asnjë viktimë nga COVID-19 në 24 orët e fundit. 12 raste të reja ka pasur në po kaq orë, prej të cilave 6 në Tiranë, 2 në Durrës  dhe nga 1 në Shkodër, Kavajë, Mirditë e Kuçovë.

Lajmi i mirë është se 19 qytetarë e kanë fituar betejën sot, ndërsa në spitale vijojnë të marrin trajtim 21 pacientë, 6 prej të cilëve në terapi intensive. Shqipëria në këtë muaj ka regjistruar shifra të ulëta nga COVID-19 ashtu si vendet e rajonit.

NJOFTIMI NGA MSH

Ministria e Shëndetësisë dhe Mbrojtjes Sociale ju bën apel qytetarëve të vijojnë të zbatojnë me përpikmëri rregullat për parandalimin e COVID19: Vendosni maskën mbrojtëse në çdo ambient të mbyllur dhe kudo ku nuk mund të ruhet distancimi fizik, kujdesuni për higjenën vetjake dhe vetëizolohuni kur dyshoni se jeni të prekur nga COVID19.

Situata e COVID19 në 24 orët e fundit është si vijon:
Janë kryer 2,916 testime, nga të cilat kanë rezultuar pozitivë 12 qytetarë. Rastet pozitive të konfirmuara janë identifikuar në këto bashki:  6 raste në Tiranë, 2 raste në Durrës, 1 rast në Shkodër, Kavajë, Mirditë, Kuçovë.

Aktualisht po marrin trajtim spitalor 21 pacientë, nga të cilët 6 pacientë janë në terapi intensive.
Në 24 orët e fundit nuk ka asnjë humbje jete me Sars-Cov2 pozitiv.

Në 24 orët e fundit janë shëruar 19 qytetarë, duke e çuar numrin e të shëruarve në 129,826 që nga fillimi i epidemisë.

Ministria e Shëndetësisë dhe Mbrojtjes Sociale u drejtohet qytetarëve të mos neglizhojnë asnjë shenjë të sëmundjes dhe të kontaktojnë për çdo dyshim me mjekun e familjes, për të kryer testimin si dhe për ndjekjen dhe trajtimin ambulator në banesë. Telefononi në numri 127 të Urgjencës Kombëtare për çdo emergjencë apo referim në spital.

Statistika (12 Qershor 2021)

Raste të reja ditore        12
Të shëruar në 24 orë      19
Të shtruar në spitale      21
Humbje jete në 24 orë   0
Testime ditore                2,916

Testime totale            754,759
Raste pozitive             132,449
Raste të shëruara        129,826
Raste Aktive                  170
Humbje jete                  2,453

Shpërndarja gjeografike e rasteve aktive sipas qarqeve:

Shkodër       51
Tiranë          44
Berat             22
Elbasan        14
Lezhë           12
Durrës          7
Korçë           6
Gjirokastër  5
Dibër             3
Fier                2
Vlorë              2
Kukës           1

alert.al/

Tritoli me dron te kantina e Lefter Kokës, profesori i Kriminalistikës: Të huajt në alarm për ne! Në rrezik SPAK-u dhe BKH

Biznesi i ish-ministrit të Mjedisit, Lefter Koka, sulmua me një metodë të padëgjuar më parë në Shqipëri, sasi tritoli e lëshuar nga ajri. Autorët përdorën  dron të mbushur me eksplozivë, mbi tarracën e godinës 3-katëshe, por për profesorin e kriminalistikës, Ervin Karamuço nuk është befasi.

“Kanë qenë të pritshme. Agjencitë ligjzbatuese të huaja kanë kohë që kanë vënë alarmin për Shqipërinë, për organizimin shumë të strukturuar të grupeve kriminale, qoftë në aspektin financiar ato janë fuqizuar shumë, por edhe në një element të ri, që është rritja e kapaciteteve profesionale të tyre. Do të thotë se ata janë të aftë të përdorin dron, mina me telekomandë, të përdorin të gjithë atë lloj teknologjie, e cila është shumë e shtrenjtë. Është e shtrenjtë sepse nuk lë gjurmë”, shprehet profesori i kriminalistikës, Ervin Karamuço.

A janë të gatshme autoritetet tona policore të provojnë dhe gjejnë autorët e këtyre atentateve të sofistikuara?

“Policia jonë nuk është gati për të provuar të tilla atentate, pra për t’i provuar dhe gjetur autorët sepse mjetet që janë në përdorim janë teknikisht të pagjurmueshme. Kjo ka sjell një sfidë të madhe, një sfidë të re. shprehet profesori Karamuço.

Për Karamuçën, kjo mënyrë e sofistikuar mund të jetë një rrezik për sigurinë kombëtare në vazhdim.

“Mund të përdoren edhe në sulmet ndaj institucioneve publike, autoriteteve të caktuara, ndaj drejtuesve të këtyre institucioneve. Pse jo, edhe gjykatave, të cilat po përballen përditë me krimin, SPAK-un, BKH-në, etj.”, shton Karamuço.

Rastet e para të atentateve me dronë e kanë gjenezën në konfliktin Izrael-Palestinë.

“Droni është futur këtë dhjetë vjeçarin e fundit, madje ka pasur më shumë tentative nga grupet fundamentalist islamike për t’i përdorur. Kanë filluar fillimisht midis zonave të konfliktit midis Izraelit dhe Pelestinës, me anë të dronit dhe pastaj ka pasur disa tentative edhe në Francë”, përfundon profesori i kriminalistikës, Ervin Karamuço.

Karamuça mendon se njëfarë parandalimi për përdorimin e dronëve dhe rreziqeve prej tyre duhet të filloj me disa lloje, të cilët duhet të regjistrohen. Bëhet fjalë për lloje që janë të fuqishëm dhe komandohen në distanca të mëdha. /TvReport/

Ministri Çuçi bën bilancin e aksionit në bregdet: Kemi shembur 35 objekte, 5 persona u arrestuan

Në gjashtë ditët e para të operacionit “Bregdeti Ynë” janë shembur 35 objekte në Ksamil, Sarandë e Velipojë. Ministri i Brendshëm, Bledi Çuçi, thotë se ky operacion është vetëm ‘fillimi i fundit të marrëzisë për të ndërtuar pa leje’. Ndërkohë në 10 raste kanë qenë vetë ndërtuesit që i kanë shembur objektet pa leje.

Reagimi i plotë i ministrit Çuçi:
“Plot 35 objekte me strukturë betoni dhe metalike të ngritura pa leje janë shembur në Ksamil, Sarandë e Velipojë në vetëm 6 ditët e para të operacionit “Bregdeti Ynë”. Ndërkohë Policia e Shtetit ka arrestuar 5 persona, ka shpallur 1 në kërkim dhe disa të tjerë i ka proceduar penalisht që prej nisjes së këtij operacioni, i cili është veçse fillimi i fundit të marrëzisë për të ndërtuar pa leje dhe për të zaptuar territor sipas dëshirës. Lajm i mirë që për 10 objekte kanë qenë vetë ndërtuesit e paligjshëm që i kanë shembur dhe po vetë i kanë hequr inertet. E gjithë vija bregdetare nga Velipoja në Ksamil do të pastrohet njëherë e mirë nga çibanët e ngritur prej babëzisë për të fituar në kurriz të zbatimit të ligjit e mbrojtjes së mjedisit. IKMT dhe Policia e Shtetit do ta shtrijnë këtë operacion edhe në zona të tjera për ta çliruar përfundimisht bregdetin nga shkelësit e ligjit, të cilët kurrsesi nuk do t’i ikin përgjegjësisë për këto ndërtime”

alert.al/

Rufeja vret tufën me 250 krerë bagëti në një fshat të Mirditës

Rrufeja ka vrarë rreth 250 krerë bagëti në një stan në fshatin Zaj të njësisë administrative Selitë të Mirditës. Ngjarja është regjistruar pasditen e 11 qershorit në stanin e quajtur “Veni Valmor”. Rreth orës 17:30 në zonën ku ndodhet stani ka pasur rrebesh shiu i cili është shoqëruar me bubullima e vetëtima.

Bagëtitë e imëta, dele, dhi, keca e shqerra ishin në pronësi të shteteses Prena Buruku. Fatmirësisht ka shpëtuar çobani. Dëmi ekonomik i shkaktuar është i konsiderueshem, ndërsa bagëtitet e ngordhura janë ende në mal. /RTVora/

Mbyllet protesta, maturantët: “Të ulet pikësimi për testin e Matematikës! Nesër përsëri tek ministria...”

Për rreth 2 orë e gjysëm maturantët e Tiranës kanë protestuar sot duke kërkuar rivlerësim të testit të fundit, atij të matematikës, të cilit iu nështruan dje. Maturantët kërkuan gjithashtu ulje të tavanit të pikëve, teksa paralajmëruan se nëse nuk plotësohen kërkesat do të protestojnë sërish nesër. Ashtu siç paralajmëruan, maturantët janë mbledhur para Ministrisë së Arsimit, ndërsa kanë bllokuar “Rrugën e Durrësit”. Pasi janë ulur në rrugë, maturantët kanë lëshuar në kor thirrjen; “Duam drejtësi!”.

Maturantët kërkojnë që të ulet pikësimi për testin e Matematikës, i cili u zhvillua dje ndërkohë që ata pretendojnë se në këtë provim pati pyetje jashtë programit mësimor. “Uljen e pikësimit, provimi ishte i vështirë, pasi ishte një test universitar. Kjo është mënyra jonë. Do vazhdojmë të rrimë këtu deri sa të na plotësohen kërkesat”, tha një maturant.

Për shkak të protestës, është bllokuar ky aks rrugor, ndërsa drejtuesit e mjeteve kanë devijuar. Protesta ka përfunduar pas qëndrimit për disa minuta para godinës QSHA-së. Sipas tyre, nuk përjashtohet dhe mundësia e bojkotimit të provimit të fundit të maturës shtetërore.

Protesta në Durrës

Maturantët janë ngritur në protestë jo vetëm në Tiranë. Një protestë nga maturantët e shkollave të Durrësit po zhvillohet para Drejtorisë Rajonale parauniversitare në Durrës.

Ata kërkojnë një rivlerësim të testit ku të ulet tavani i pikëve sepse kishte ushtrime që ishin në nivelin maksimal dhe kufiri 10 është vetëm 7 pikë, ndërkohë kishte ushtrime më shumë pikë të cilat kalonin çdo pritshmëri.

“Ne kemi dy vite online duke marrë parasysh dhe kushtet në të cilat ne kemi mësuar, kanë qenë tepër të vështira. Ne kërkojmë mbështetjen tuaj, sepse nga këto provime varet e ardhmja jonë që me 3 vite punë na u shemb për 2 orë e gjysmë”, shprehen maturantët.

Me pankarta “Nga Turi tek Sindi”, duke kujtuar dilemën e testit të vitit të kaluar të letërsisë me varkën, maturantët e Durrësit kanë kërkuar zgjidhje.

Gjiroskatër

Maturantët e Gjirokastrës i bashkohen protestës për provimin e matematikës, në përmbajtje të të cilit kishte pyetje nga tema të cilat nuk i kishin zhvilluar fare ose mjaftueshëm.
Maturantët kanë kërkuar uljen e tavanit të pikëve dhe rivlerësim të testit. Sipas tyre, testi ishte i kopjuar keq nga Cambridge teksa thonë se përmbajtja e testit nuk përkon me atë që kanë mësuar në shkollë.

“Provimi ishte skandaloz, i një niveli të papërshkrueshëm. Asnjëri nga neve nuk ishte i përgatitur për një nivel të tillë vështirësie, as me të gjitha mundësitë që kishim për të mësuar gjatë vitit. Nuk jemi të përgatitur për një të tillë transformim. Ka pasur gjithmonë manovrime në vështirësinë e provimit. Nuk kemi qenë të përgatitur. Edhe provimi i anglishtes i cili i ka paraprirë këtij provimi ishte i një niveli skandaloz. Varionte drejt C1, C2. Nuk besoj që ka pasur një nxënës që nuk ka ndjerë vështirësi. Ushtrimet janë marrë fotokopje nga tekstet e Cambridge, janë kopjuar në një mënyrë skandaloze, as përmbajtja e tyre nuk përkon me tekstet tona. Çfarë duhet të bëjmë

ne, a është e drejtë të penalizohemi për gjëra që nuk i kemi mësuar?

Fier
Edhe maturantët e Fierit janë hedhur sot në protestë në shenjë kundërshtie për testin e Matematikës, i cili u zhvillua dje. Ata pretendojnë se testi ishte me pyetje të vështira që nuk i përmbante programi mësimor. Nxënësit u mblodhën para Drejtorisë Arsimore të Fierit, ndërsa u shprehën të indinjuar dhe të shqetësuar pasi teza nuk i përmbahej nivelit të premtuar.

Ata paraqiten disa pika të cilat përfshinin dhe një rishikim te sistemit te pikëve dhe vlerësimit për maturantet. Përtej zhgënjimit shumë të rinj u shprehen se dëshironin një te ardhme dhe te kishin mundësi punësimi në vendin e tyre.

Korçë
Rreth 30 maturantë të shkollave të mesme të Korçës, si dhe shkollave të tjera të fshatrave, kanë protestuar paraditen e sotme te drejtoria rajonale e arsimit parauniversitar Korçë.
Shkak i protestës sipas tyre është bërë provimi i matematikës që u zhvillua një ditë më parë, provim i cili sipas tyre ka qenë i nivelit shumë të vështirë. Nxënësit thanë se prej një viti pjesën më të madhe të mësimit e kanë bërë online dhe më pak të alternuar, ndaj dhe për këtë arsye ata kanë pritur një test tjetër jo vetëm në lëndën e matematikës por edhe në provimet e tjera të maturës shtetërore.
Protesta të tilla të ngjashme janë zhvilluar edhe në shkollat e tjera të mesme të juglindjes së vendit.

Elbasan

Edhe maturantët e Elbasanit i janë bashkuar protestës së bashkëmoshatarëve të tyre dhe kanë paralajmëruar se nuk do të tërhiqen nga kërkesat e bëra publike derisa të shohin notat e tyre përfundimtare për testin e tyre.
Këtë të shtunë ata u mblodhën në shenjë proteste ndaj tezës së provimit të matematikës, e cila sipas tyre kishte nivel shumë të lartë vështirësie, me pyetje të përkthyera keq nga teza të Cambridge si dhe pa lidhje me modelin që iu është dhënë gjatë këtij viti nga ministria.
Maturantët e Elbasanit janë shprehur të vendosur për të arritur objektivin e tyre dhe kanë paralajmëruar se të dielën do të mblidhen në protestën me përmasa kombëtare në kryeqytet në orën 11:30. Sikurse kolegët e tyre edhe maturantet e Elbasanit paralajmërojnë se nëse MAS nuk ul tavanin e pikëve maksimale do të bojkotojnë dhe provimin e lëndës me zgjedhje të Maturës Shtetërore.
Protesta e maturantëve të Elbasanit u zhvillua në qendër të këtij qyteti!

alert.al/

 

Dhanë Tokën e Kishës për pallat në Tiranë, nën akuzë zyrtari, prokuroria heton lejen e ndërtimit

Një leje ndërtimi në zonën e “Liqenit të Thatë” në Tiranë, ka çuar në një përplasje ligjore kompaninë e ndërtimit “AL KONSTRUKSION GBI” dhe fondacionin “Nxënësit e Jezusit”. Leja e ndërtimit të një kompleksi pallatesh 3 deri në 4 kate prek edhe pronën e fondacionit “Nxënësit e Jezuesit” si dhe atë të shtetases Zoje Brahja. Nga hetimet e kryera, ka rezultuar se leja ndërtimore është dhënë me shkelje duke e mbivendosur sheshin e ndërtimit me 123 metra katror në sipërfaqen e tokës të fondacionit “Nxënësit e Jezusit”.

Për këtë shkak është marrë si i pandehur dhe dërguar në gjykatën e kryeqytetit, Agron Sanxhaku, me detyrë specialist topograf në zyrën e kadastrës në Bashkinë Tiranë. Sanxhaku, akuzohet nga prokurori çështjes, Ervin Karanxha, për akuzën e “Shpërdorimit të detyrës”, pasi sipas hetimit, me azhonimin e gent-planit që mban datën 26 Maj 2019, nuk ka paraqitur të dhëna të sakta bazuar në gjendjen faktike në terren të dy pasurive të konfirmuara nga Zyra e Hipotekës Tiranë.

Leja e ndërtimit mban datën 9 gusht 2019, për llogari të kompanisë “AL KONSTRUKSION GBI” që administrohet nga biznesmeni Ismaili, duke shtrirë sheshin e ndërtimin plot 123 metra mbi sipërfaqen e tokës së Zoje Brahja dhe fondacionit “Nxënësit e Jezusit”. “…Konkretisht marrja e pronës nga firma “Al- Konstruksion GBI”, është bërë nëpërmjet paraqitjes se rrethanave të rreme dhe lejes së ndërtimit të dhënë nga Bashkia Tiranë…”-thuhet në dosjen hetimore të prokurorisë.

Punonjësit e zyrës së Kadastrës së Bashkisë Tiranë, që kanë hartuar dhe miratuar gent-palanin e datës 26 Maj 2019, mbi të cilin është miratuar leja e ndërtimit në 9 gusht 2019, kanë vepruar hapur në shkelje ligjit, e konkretisht në shkelje të urdhëresës së datës 4 dhjetor 2017 të Kryetarit të Bashkisë Tiranë.

“…nëse do ishte kryer ky veprim sipas kësaj urdhërese të Kryetarit të bashkisë Tiranë, do rezultonte mbivendosje e pasurive të paraqitura nga subjekti ndërtues “Al- Konstruksion GBI” Sh.p.k, me pasurinë  e shtetases Zoje Brahja. Ne këto rrethana nuk do të ishte miratuar gent-plani dhe as leja e ndërtimit, pa bërë saktësimin e pasurive objekt.

Ky veprim i paligjshëm ka sjelle pasoja në dëm të shtetases Zoje Brahja, te cilës i është përfshirë padrejtësish një pjesë nga pasuria e saj, brenda këtij gent- plani, ku po zhvillohet leja e ndërtimit nga subjekti ndërtues “Al- Konstruksion GBI” Sh.p.k….”-thuhet në dosjen e prokurorisë. Në ketë mënyrë provohet lidhja shkakësore midis veprimit dhe pasojës së ardhur në rastin konkret.

“…Nga ana tjetër është cënuar rëndë prona e fondacionit “Nxënësit e Jezusit”. Topografi Agron Sanxhaku, e dinte mjaft mirë se prona, ku po jepej leja është në konflikt, e dinte se azhornimi i bërë nga ana e tij, ka cënuar tokën e Kishës si dhe banorët e zonës, duke i futur ata në konflikt me njëri-tjetrin, pasi pas dhënies së lejës kanë ardhur edhe pasoja të rënda”-thotë prokuroria.

alert.al/

Emrat/ Aksidenti në aksin Elbasan-Peqin, kush janë të plagosurit dhe viktima

Një aksident me pasojë vdekjen ka ndodhur mbrëmjen e së premtes në aksin rrugor Elbasan-Peqin.

Mësohet se rreth orës 21:20 në fshatin Lazaren janë përplasur një kamioçinë dhe mjeti tip “Ford”. Për pasojë, nuk ka mundur t’u mbijetojë plagëve pasagjeri që ndodhej në mjetin tip ” Ford”.

Mësohet se viktima është punonjës policie, ndërsa të plagosur kanë mbetur gjashtë persona të tjerë që ishin pasagjerë në dy mjetet.

Të plagosurit janë, Adem Senja, 53 vjeç, Nazmi Hysa, 60 vjeç, Gezim Baku, 60 vjeç, Marius Hysa, 30 vjeç, Kudret Hasa, 27-vjeç dhe Maksim Ranxha 50-vjeçar. Ndërsa viktima është Ardjan Xhaja, polic i burgut të Peqinit.

Rrethanat e aksidentit nuk dihen ende, grupi hetimor ndodhet po punon për zbardhjen e shkakut të aksident.

 

Shehaj: Basha ka treguar se nuk mund të fitojë ndaj Ramës

Agron Shehaj, i cili mori mandatin e deputetit në zgjedhjet e 25 prillit dhe që kandidon për postin e Kreut të PD në zgjedhjet e 13 qershorit, tha në emisionin “Zonë e Lirë” se Lulzim Basha ka treguar se nuk mund të fitojë në zgjedhje përballë Edi Ramës.

Shehaj tha se krahas fenomeneve të shit-blerjes së votave, përdorimit të parave të krimit, administratës publike apo institucioneve shtetërore në fushatë, PD gaboi me politikat që ndoqi gjatë opozitarizmit dhe në fushatë.

“Gabuam me djegien e mandateve, gabuam me bojkotimin e zgjedhjeve vendore, gabuam me fushatën sepse nuk u thamë njerzve të vërtetën.

Sot shqiptarët presin të dëgjojnë mbi luftën ndaj korrupsionit, që është problemi më i madh që kanë shqiptarët. Nga korrupsioni buron varfëria, papunësia, pra korrupsioni është e keqja e madhe.

PD i duhet një lider që i çon drejt fitores dhe fitorja vjen duke bindur shqiptarët për të votuar Partinë Demokratike”, tha Shehaj.

I pyetur mbi shpalljen non grata të ish-Kryeministrit Sali Berisha nga DASH, Shehaj tha se ai është një vendim politik i SHBA.

U gjet i vrarë, shefi i anti-drogës e la pistoletën në shtëpi/ Kush e nxori në pritë

Mediat malazeze kanë zbardhur detaje të reja nga hetimet që po bëhen lidhur me ekzekutimin e Rudolf Elezoviçit, i cili u zhduk në datë 27 maj dhe 2 ditë më parë u gjet i pajetë buzë lumit Buna.

Elezoviç pistoletën e shërbimit e kishte lënë në shtëpi përpara se të dilte, ku hetuesit dyshojnë se shkoi në një takim me një person të panjohur dhe më pas telefonoi familjen duke i njoftuar se po shkonte në Shkodër dhe se do të kthehej shpejt.

Pak ditë më parë në mediat malazeze u aludua se shefi i anti-drogës në Ulqin mund të ishte i përfshirë në trafikun e drogës, por kolegët e tij e rrëzojnë këtë pretendim.

Elezoviç konsiderohej “një polic i guximshëm, i ndershëm, i gatshëm të përballej me kriminelët më mizorë” citojnë mediat e vendit fqinj qarqet policore.

Dy vendet, Shqipëria dhe Mali i Zi vijojnë hetimet për të zbardhur autorët e vrasjes së zyrtarit të anti-drogës.