Menu

Ekonomi

ERE: Nga 1 nëntori, ja me sa do të paguhet energjia elektrike

Enti Rregullator i Energjisë ka njoftuar se duke filluar nga data 1 nëntor deri më 31 dhjetor do të aplikohet çmimi 44 lekë për kilovat mbi fashën 800 KW.

“Për të gjithë konsumatorët familjarë që furnizohen nga Shërbimi Universal (FSHU sh.a.). ERE ka detyrimin të reflektojë çmimet e energjisë së konsumatorëve fundorë të shërbimit universal, kostot e furnizimit sipas kostove të burimit të sigurimit të energjisë.

Vendimi i Brodit të ERE-s nr. 242 datë 23.09.2022, i ndryshuar me vendimin e Bordit nr.254 datë 07.10.2022, qëndron në fuqi për muajt nëntor – dhjetor 2022, dhe këto çmime mbeten të aplikueshme, ashtu si përcaktuar në vendim, për periudhën 1 nëntor 2022 – 31 dhjetor 2022.

Siç theksuar dhe më parë nga vendimmarrja e ERE-s, çmimi i furnizimit me energji elektrike për konsumatorët që konsumojnë mbi fashën e konsumit 800 KW, do të mbetet objekt rishikimi periodik, bazuar në kërkesën FSHU sh.a., vendimet e Asamblesë së KESH sha, si dhe vlerësimet e ERE-s, nëpërmjet të cilave do të vlerësohen ndryshimet në çmimin e shitjes se energjisë elektrike për konsumatorët fundorë të shërbimit universal”, thuhet në deklaratën e ERE.

Kjo fashë e re do të prekë të gjithë ato familje të cilat harxhojnë më shumë se 800 KW në muaj dhe do të duhet të pagujanë çdo kilovat të kaluar mbi këtë kufi me 44 lekë për kilovat. Ndërkohë, deri më tani nuk ka ardhur asnjë reagim nga qeveria të cilët në muajin tetor e kthenë mbrapsht këtë vendim.

Qendra Alert/Alert.al

Ukraina akuza Rusisë: Vonesa të qëllimshme në eksportet e grurit

Kievi ka hedhur akuza ndaj Rusisë se ka vonuar më shumë se 165 anije mallrash, që janë nisur drejt porteve ukrainase për t’u furnizuar me grurë, sipas një marrëveshjeje që është ndërmjetësuar nga Kombet e Bashkuara dhe Turqia.

Inspektorët rusë “kanë vonuar me qëllim inspektimet e anijeve”-ka thënë Ministria e Jashtme ukrainase përmes një deklarate më 24 tetor.

“Si rezultat, më shumë se 165 anije janë bllokuar afër Ngushticës së Bosforit, dhe ky numër po vazhdon të rritet çdo ditë”.

Anijet e mallrave që bartin grurë dhe ushqime tjera, në dhe nga portet ukrainase, duhet të inspektohen nga ekipet e organizuara prej Qendrës së Përbashkët të Koordinimit, një grup i krijuar sipas marrëveshjes së nënshkruar nga Ukraina dhe Rusia, nën ndërmjetësim të OKB-së dhe Turqisë. Marrëveshja është nënshkruar pasi ka pasur shqetësime se bllokimi i grurit ukrainas mund të kontribuojë në krizë globale ushqimore.

Ministria e Jashtme ukrainase ka thënë se ka arsye për të besuar se vonesat janë të motivuara politikisht dhe se janë duke kërcënuar sigurinë ushqimore të miliona njerëzve. Rusia ka kërcënuar më parë me tërheqje nga marrëveshja, e cila i garanton Moskës eksportimin e produkteve të veta të grurit.

Marrëveshja duhet të vazhdohet muajin e ardhshëm. Ministri i Jashtëm rus, Sergei Lavrov ka thënë më 24 tetor, se Moska i ka kërkuar OBK-së të dhëna për destinacionin final të eksporteve të grurit ukrainas. Sipas tij, “përditësimet” e nevojshme për të shmangur zhbllokimin, do të varen nga koha kur Rusia siguron këtë informacion.

Qendra Alert/Alert.al

Banka Botërore: Shqipëria me rritjen me të ulët ekonomike, rezulton edhe pas Kosovës

Projeksioni i Bankës Botërore parashikon që rritja e çmimeve do të godasë më fort Shqipërinë se vendet e tjera të rajonit. Sipas Bankës Botërore, ekonomia e vendit tonë vitin e ardhshëm do rritet me vetëm 2.3%, më e ulëta në krahasim me 5 vendet e tjera të rajonit. Ngadalësimi i ekonomisë gjithashtu vë në pozitë të vështirë edhe shtresat e varfëra në vendin tonë. Indikatori i Bankës Botërore për popullsinë në rrezik varfërie tregon Shqipëria është më e rrezikuara, vetëm pas Kosovës. “Shqipëria duhet të bëjë kujdes me politikat fiskale. Ka kaluar disa sfida, si pandemia dhe tërmeti dhe sërish po vazhdon rritjen. Kjo është diçka pozitive, por tani është një moment i vështirë, ku duhet të ketë në balancë subvencionet dhe borxhin publik. Ne vëmë theksin që vendi menjëherë duhet të ktheje sytë nga arsimi dhe të investojë sa më shumë në këtë drejtim”.

Banka Botërore iu përgjigj edhe pyetjeve në lidhje me fashën 800 Kw që pritet implementohet si dhe për Bordet e Transparencës

“Në një periudhë afatshkurta janë në rregull, por në afatgjatë, nëse vazhdojnë të qëndrojnë atëherë shtrembërojnë tregun. Sa i përket fashash, mendojmë se është diçka pozitive në aspektin që shpërndan kostot dhe nuk e lë barrën të gjithën tek qeveria”.

Sipas institucionet ndërkombëtar, Shqipëria duhet të bëjë shumë kujdes me buxhetin e vitit të ardhshëm, pasi borxhi publik është në nivele të larta. Financimi i tij me eurobonde dhe interesa të tjera bëhet edhe më i vështirë në kushtet kur normat e interesit po rriten me shpejtësi në tregjet ndërkombëtare.

Qendra Alert/Alert.al

Shoqatat kundër paketës fiskale: Bizneseve u janë shtuar kostot me 50%

Gjatë një konference, Shoqatat e Biznesit kanë kundërshtuar paketën fiskale të vitit 2023. Pjesëmarrës në konferencë ishin Dhoma e Tregtisë dhe Industrisë Tiranë, Shoqata e Prodhuesve të Birrës, Ndërtimit, Riciklimit, Eksportuesve.

Nikolin Jaka, Kryetari i Dhomës së Tregtisë dhe Industrisë tha se “nisur nga situata ekonomike që po kalon vendi, e ndikuar nga kriza globale, sipërmarrësit prodhues, industria agropërpunuese, ndërtimi po përballen me rritje të kostove me mbi 50 për qind”.

Ndonëse bizneset po përballet me një situatë të vështirë, shoqatat e sipërmarrësve ankohen se “Paketa fiskale është fokusuar në shumëfishimin e gjobave. Në asnjë shtet nuk ka gjoba 10 apo 20 fish më të larta se Europa dhe rajoni”.

Jaka tha se bizneset kërkojnë që të ulet ngarkesa fiakale, të zbatohet ligji i amnistisë fiskale, të hiqet tvsh për pajisjet për prodhimin e energjisë, të hiqet kufiri i tvsh për importin e makinerive. Bizneset kërkojnë që të krijohet nje fond garancie deri në 5 vjet, me interesa jo më të lartë se 1 për qind për 1 vit.

Industria e birrës e ka kundërshtuar propozimin për unifikimin e akcizës së birrës. Jaka tha që duhet të rishikohet drafti i akcizës së birrës, pasi dëmton industrinë dhe është një vendim i pastudiuar mirë. Stefan Pinguli nga Shoqata e prodhuesve tha se në Shqipëri 53 për qind është birrë importi. Nëse do të miratohet unifikimi i akcizës, kur taksat janë dyfish, atëherë falimentimi i industrisë vendase është i sigurt. “Në një kohë qe duhet të merremi me uljen e pullës fiskale, merremi me akcizën”, shtoi ai.

Teksa dhe industria e qumështit po kalon një situatë të vështirë për shkak të rritjes së kostove, Jaka kërkoi mbështetje direkte për fermerët për qumështin, me 10 lekë për litër. Një tjetër kërkesë lidhet me heqjen e tvsh-së për sojën, mineraleve dhe vitaminave për kafshë, reduktimi i tvsh-së për misrin e grurin që përdoret për kafshë.

Biznesi kërkon që të hiqet taksa e pasurisë për ndërmarrjet prodhuese dhe që kanë sipërfaqe të mëdha, të hiqet taksa e dherave të ndërtimit, të hiqet taksa e qarkullimit te karburantet për ndërtimin. Po për sektorin e ndërtimit, Shoqata e ndërtuesve ka kërkuar që taksa e ndikimit në infrastrukturë, të llogaritet mbi koston e ndërtimit dhe jo mbi çmimet e shitjes. Për ndërtimin të hiqet taksa 3 për qind për sektorin e ndërtimit, pasi sipas Shoqatës së ndërtuesve të drejtën për strehim e ka qeveria shqiptare dhe jo bizneset.

Pro Amnistisë, por duhet e mirëstudiuar

Biznesi është pro një amnistie fiskale, por kërkon që hartohet një ligji i mirëstruktuar i amnistisë, që të jetë vlerë për ekonominë. “Ky ligj duhet të gjejë instrumenttat e duhur që sipërmarrja informale të humbasë çdo shpresë për të vijuar në informalitet. Dhoma dhe shoqstat e biznesit presin ngritjen e një grupi pune me ekspertë të përbashkët”.

Paketa

Projektpaketa fiskale e vitit 2023 nuk sjell ndryshime thelbësore në ligjet e tatimeve përveçse i rrit se tepërmi penalitetet për disa kategori dhe veprime të bizneseve dhe unifikon akcizën për industrinë e birrës dhe pijeve alkolike.

Një ndryshim në ligjin e procedurave tatimore synon dhjetëfishim të gjobave për mos- lëshimin e faturave për furnizim, pagesë apo pranim të mallrave apo shërbimeve në rastet e parashikuara në germën a, të pikës 3 të nenit 123 për tatimpaguesit e tatimit mbi fitimin korporativ. Sipas ndryshimeve të propozuara, “për tatimpaguesit e tatimit mbi fitimin korporativ ishte 150,000 lekë, bëhet 1,500,000 lekë.” Ndryshimet parashikojnë rritjen e penaliteteve për tatimpaguesit entitete për mosdeklarim të punonjësve dhe fshehje të pagës. Në legjislacionin aktual penaliteti është 100% të detyrimit dhe kontributit të llogaritur për të gjithë tatimpaguesit.

Qendra Alert/Alert.al

 

Qeveria, masa për kursimin e energjisë elektrike në vend

Ambientet e jashtme të institucioneve publike, rrugët ndërqytetase kryesore dhe dytësore, objektet e kulturës, monumentet dhe shatërvanet do të jenë në errësirë çdo ditë pas orës 20:00.

Këto janë disa nga masat e përshkruara në aktin normativ që u depozitua sot në Kuvend. Po ashtu nënvizohet se gjatë verës, kondicioneri nuk duhet të gradohet në temperaturë më të ulët se 27 gradë Celsius, ndërsa gjatë dimrit nuk duhet të jetë më i lartë se 21 gradë.

Në projektligj, thuhet se klientët jofamiljare publike zbatojnë masat e nevojshme për reduktimin e konsumit të energjisë elektrike të godinave.

Ky akt normativ do të jetë në fuqi për aq kohë sa zgjat periudha e gjendjes së emergjencës në furnizimin me energji elektrike dhe nuk është i zbatueshëm për institucionet e ofrimit të shërbimeve shëndetësore, shkollat, kopshtet, komisariatet e policisë dhe institucionet e ekzekutimit të vendimeve penale.

Dokumenti detyron klientët buxhetorë të reduktojnë konsumin e energjisë elektrike të godinave të tyre, në masën 15%, krahasuar me muajin përkatës të një viti më parë, ndërsa në të kundërt do të gjobiten:

“Mosarritja e përsëritur në dy muaj e masës së kursimit të energjisë nga institucioni, shoqëria apo ndërmarrja konsiderohet shkelje administrative dhe dënohet me gjobë, në masën 50 000 lekë. Masa administrative i vendoset titullarit të institucionit, administratorit të shoqërisë apo ndërmarrjes, që ka përgjegjësi administrimi pronën përkatëse”.

lnstitucioni që ngarkohet për zbatimin e këtij akti normativ është Ministria e Infrastrukturës dhe Energjisë, ndërkohë që me vendim të Asamblesë së Përgjithshme të OSHEE-së është ngritur struktura e posaçme “Task-Forca e Energjisë.

Qendra Alert/Alert.al

 

Shtyhet plani i ndihmës shtetërore për mbështetjen me grante për bizneset e reja të gjelbra në Tiranë

Plani i dhënies së ndihmës shtetërore nëpërmjet skemës së granteve mbështetëse për sipërmarrësit që krijojnë biznese të gjelbra ose biznese ekzistuese të cilat tentojnë të shndërrohen në biznese të gjelbra shtyhet deri në 2023.

Projekti për sipërmarrjet që ushtrojnë aktivitet në territorin e Bashkisë së Tiranës ka nisur zbatimin nga 2020 dhe parashikohej të mbyllej në 2022.

Në vendimin e Ministrisë të Financave të botuar në Fletoren Zyrtare, përcaktohet se afati i zgjatjes u mor pas kërkesës së Bashkisë së Tiranës për shtyrjen e afatit të Autorizimit të Ndihmës Shtetërore për vitin 2023.

Bashkia e Tiranës është autoriteti përgjegjës për zbatimin e projektit “Mbështetje Financiare (grant) për biznese të reja të gjelbra, të cilat bazohen në një model ekomiqësor ose biznese ekzistuese të cilat tentojnë të shndërrohen në biznese “të gjelbra”, duke futur elemente gogreen në to”.

Vendimi përcakton se efektet financiare të këtij projekti do të përballohen nga fondi për programin “Mbështetje për zhvillimin ekonomik” të parashikuar në buxhetin e bashkisë Tiranë për vitin 2021–2023.

Plani i ndihmës shtetërore në formën e granteve synon rritjen e konkurrencës dhe përmirësimin e disa ndërmarrjeve të vogla dhe të mesme në treg.

Baza ligjore e njoftimit të planit është miratuar me vendimin e Këshillit Bashkiak të Tiranës në fund të dhjetorit 2019 “Për miratimin e programit buxhetor afatmesëm 2020–2022 dhe detajimin e buxhetit të Bashkisë së Tiranës për vitin 2020” në programin “Mbështetje për zhvillimin ekonomik”.

Vendimi i Bashkisë së Tiranës përcaktonte se brenda datës 31 mars të çdo viti, duhet të paraqesë raport për impaktin e ndihmës shtetërore gjatë vitit paraardhës financiar. Raportet e zbatimit duhet të përmbajnë informacion të detajuar mbi shpenzimet e bëra dhe produktet e arritura. Të gjitha për zbatimin e skemës duhet të ruhen deri në dhjetë vjet, pasi ndihma e fundit individuale të jetë dhënë në kuadër të kësaj skeme.

Kostot që do të mbulojë ndihma shtetërore, do të jenë, si: kostot e investimit në asete të prekshme dhe të paprekshme, kostot e parashikuara të pagave, në lidhje me punësimin e krijuar drejtpërsëdrejti nga projekti i investimit, të përllogaritura gjatë një periudhe dyvjeçare, vendet e punës të jenë të krijuara në mënyrë të drejtpërdrejtë nga projekti i investimit, investimi do të konsiderohet si kosto e pranueshme, pra në asete të prekshme dhe/ose të paprekshme për ngritjen e një ndërmarrjeje të re apo zgjerimin e një ndërmarrjeje ekzistuese, për të diversifikuar prodhimin e një ndërmarrjeje me produkte të reja shtesë ose një ndryshim rrënjësor në procesin e përgjithshëm të prodhimit të një ndërmarrjeje ekzistuese.

Vlera totale e fondit, për 2 vitet e mëparshme ishte 36 mln lekë. Vlera e fondit për secilin vit ishte 12 mln lekë, ku çdo përfitues mbështetej me grant të drejtpërdrejtë në shumën 500,000 lekë. Intensiteti i ndihmës do të jetë 80% të kostove të pranueshme. (Monitor)

Qendra Alert/Alert.al

Raporti i KE: Shqipëria me ecurinë më të dobët ekonomike në rajon

Shqipëria dhe Serbia janë dy shtetet e rajonit, që kanë pasur ngadalësimin më të lartë të ekonomisë në tremujorin e dytë të vitit, sipas raportit të fundit të Komisionit Europian për vendet kandidate dhe potencial kandidate.

Sipas raportit, rimëkëmbja ekonomike në Ballkanin Perëndimor vazhdoi të zbutet në tremujorin e dytë të 2022. Megjithëse ngadalësimi ishte më i butë se në tremujorin e parë dhe rritja mbeti në përgjithësi e lartë. PBB-ja e rajonit u zgjerua me 4.2% me bazë vjetore, krahasuar me 4.8% në tremujorin e mëparshëm. Ngadalësimi u shkaktua kryesisht nga një ecuri më e dobët në Shqipëri dhe Serbi.

Në Shqipëri, rritja reale e PBB-së u ngadalësua në 2.2% nga 6.5% në tremujorin e mëparshëm, për shkak të tkurrjes së investimeve dhe konsumit publik. Pjesërisht kjo shpjegohet dhe nga baza e lartë në të njëjtën periudhë të një viti më parë. Megjithatë, konsumi privat dhe eksportet kanë mbetur të forta dhe kanë qenë nxitësit kryesorë të rritjes.

Në Serbi, rritja vjetore e prodhimit u ngadalësua në 3.9%, nga 4.3% në tre muajt e mëparshëm, pasi rritja e qëndrueshme në konsumin e familjeve dhe publike, si dhe kontributet më të moderuara të investimeve dhe inventarëve, u kompensuan nga kontributi negativ i eksporteve neto.

Në Kosovë, rritja reale e PBB-së u zbut në 2.1% me bazë vjetore në tremujorin e dytë të 2022, kryesisht për shkak të konsumit më të ulët të qeverisë dhe rënies së formimit bruto të kapitalit fiks, duke reflektuar tkurrjen e investimeve publike. Rritja është mbështetur në konsumin e familjeve dhe eksportet e mallrave, kombinuar me zgjerimin e fortë të eksporteve të shërbimeve.

Në të kundërt, rritja ekonomike në Mal të Zi u përshpejtua ndjeshëm në tremujorin e dytë të 2022 në 12.7% në vit, nga 7.1% në tremujorin e mëparshëm. Ai u nxit kryesisht nga konsumi privat, si rrjedhojë e rritjes së pagave neto reale pas heqjes së kontributeve shëndetësore dhe rritjes së pagës minimale si dhe nxitjes së mëtejshme të punësimit, që u ndikua nga rimëkëmbja e turizmit.

Gjithashtu në Maqedoninë e Veriut, ekonomia u rrit lehtë në 2.8% në vit, nga 2.4% në tre muajt e mëparshëm, e ndikuar nga një rritje e investimeve, pjesërisht për shkak të efekteve bazë, dhe përmirësimi i konsumit privat.

Në Bosnje dhe Hercegovinë, rritja reale e PBB-së u përshpejtua lehtë në krahasim me nga tre muajt e mëparshëm në 5.9%t, e nxitur kryesisht nga konsumi dhe investimet e familjeve. Në tërësi, PBB-ja e rajonit të Ballkanit Perëndimor u rrit me 4.2% në tremujorin e dytë të 2022, nga një normë mesatare rritjeje prej 4.8% në tre muajt e mëparshëm. (Monitor)

Qendra Alert/Alert.al

 

Prodhuesi gjerman i automjeteve elektrike Next.e.GO Mobile SE, sjell risi në panairin e automjeteve në Paris. Prezanton edhe automjetin të ri komercial me emetim zero, e.Xpress

– Next.e.GO Mobile SE njofton nisjen e shitjeve të modelit të ri e.wave X nga data 17 tetor, ekskluzivisht për klientët me rezervime
– Next E.GO Mobile SE do të prezantojë gjithashtu një automjet të ri komercial me emetim zero, e.Xpress
– Next.e.GO Mobile SE shpall partneritetin strategjik me Ample Inc. me bazë në Shtetet e Bashkuara për të prezantuar një shkëmbim të automatizuar unik, të shpejtë dhe të përshtatshëm të baterive
– Next.e.GO Mobile SE njofton një bashkëpunim strategjik me kompaninë gjermane Fintech OneFor Holding GmbH, për t’u siguruar klientëve akses në kredi të menjëhershme për makina personale deri në 25,000 euro

AACHEN, Gjermani dhe PARIS, 17 tetor 2022 – Prodhuesi i pavarur gjerman i automjeteve elektrike, Next.e.GO Mobile SE (“e.GO”), bëri disa njoftime dje në panairin e automjeteve në Paris, duke përfshirë nisjen e shitjeve per automjetin elektrik të modelit “e.wave X”. Automjetet e para, modeli “e.wave X” do të dedikohen për klientët që kanë bërë rezervime që nga fillimi i verës së këtij viti. Ngjyrat e reja dhe linjat e zbukurimit që tani të disponueshme përmes konfiguruesit e.GO, u mundësojnë këtyre klientëve të jenë të parët që konfigurojnë dhe bëjnë një porosi për automjetin e tyre individual gjatë kësaj periudhe ekskluzive. Pas përmbushjes së porosive të rezervimit, konfiguruesi dhe prodhuesi i e.GO do t’i ketë të disponueshme për publikun që nga 01 dhjetori 2022. Të gjitha detajet mbi të dhënat teknike, opsionet dhe pajisjet speciale dhe çmimet janë të disponueshme në katalogët e produkteve dhe konfiguruesin.

e.GO njoftoi gjithashtu prezantimin e një automjeti të ri komercial kompakt elektrik për shpërndarje urbane, “e.Xpress” në panairin e automjeteve në Paris, i krijuar për të adresuar kërkesën në rritje për dërgesa urbane me emetim zero dhe flotë komerciale.
E.Xpress synon të trajtojë fushat kryesore të fokusit për menaxherët e flotës komerciale, duke përfshirë kohën e funksionimit, shpejtësinë e karikimit, duke ofruar një zgjidhje unike dhe universale të ndërrimit të baterive, që synohet të jetë po aq e shpejtë dhe e përshtatshme sa karburanti i automjeteve të vjetra. Zgjidhja është rezultat i një bashkëpunimi strategjik midis e.GO dhe Ample, një ofrues amerikan i zgjidhjeve teknologjike dhe energjetike që përdor robotikë autonome dhe strukturë modulare të baterisë për të përmirësuar shpërndarjen e energjisë për transportin elektrik.

E.Xpress vjen me një lëkurë polimerike të qëndrueshme që synon të reduktojë koston dhe kohën e riparimit të ciklit jetësor. Ofron një vëllim ngarkese deri në 940 litra, në varësi të konfigurimit të zgjedhur, me ngarkesë bruto deri në 240 kg. Ai do të jetë i disponueshëm me baterinë e këmbyeshme dhe në varësi të konfigurimit të zgjedhur pritet të ofrojë një distancë urbane deri në 230 km dhe një kohë shkëmbimi baterie prej vetëm disa minutash. Ai do t’u ofrohet klientëve, bizneseve dhe operatorëve të flotës si me baterinë të përfshirë në blerjen e tyre, ashtu edhe me një model abonimi, ku klienti nuk ka nevojë të blejë baterinë, në vend që të jetë abonuar për dërgimin dhe shfrytëzimin e energjisë. Fillimi i rezervimeve për e.Xpress është planifikuar për 02 Nëntor 2022.

Përveç kësaj, e.GO njofton fillimin e një bashkëpunimi strategjik me OneFor – një kompani inovative gjermane Fintech, e fokusuar në financat dhe pagesat dixhitale të konsumatorëve, me qëllim që t’u ofrojë klientëve akses në kredi të menjëhershme për makina personale deri në 25,000 euro. Kreditë për vetura personale përpunohen shpejt dhe vijnë me norma interesi fikse dhe një periudhë shlyerjeje deri në 84 muaj.
“Tek e.GO ne kemi bërë që thjeshtësia, praktike dhe cikli i mbyllur të jenë misioni ynë dhe zgjidhja për disa nga sfidat me të cilat përballeet sot njerëzimi. Kjo është arsyeja pse ne përdorim inovacionin dhe teknologjinë për të fuqizuar njerëzit gjatë udhëtimit të tyre të qëndrueshëm. Ofrimi një shërbimi të tillë urban me një zgjidhje karikimi që është po aq i shpejtë dhe i përshtatshëm sa karburanti tradicional, por jo aq i rëndë për burimet e kufizuara të planetit ose infrastrukturën energjetike, ose duke u ofruar klientëve akses në zgjidhje financiare inovative që mund të fuqizojnë zgjedhjen e tyre të lëvizshmërisë së qëndrueshme, janë reflektim i atij angazhimi”, shpjegon Ali Vezvaei, Drejtor i Përgjithshëm i “e.GO”.

Rreth Ample: Me qendër në San Francisko – SHBA, Ample Inc. është një ofrues i zgjidhjeve teknologjike që përdor robotikë autonome dhe teknologji inteligjente modulare të baterive për të përmirësuar shpërndarjen e energjisë për transportin elektrik. Ai krijoi një platformë ekonomike, që mund të shpërndahet shpejt dhe gjerësisht e aksesueshme, që ofron një karikim të plotë për automjetet elektrike në pak minuta. (www.ample.com)

Rreth OneFor: OneFor Holding GmbH me bazë në Gjermani është një kompani Fintech që ofron aplikacione dhe shërbime të ndryshme të parave dixhitale, duke përfshirë llogaritë pa kufij, shërbimet e pagesave dhe kartave, si dhe kreditë e investimet personale. Zgjidhja e kartave mbështetet nga Mastercard International. OneFor mundëson një llogari familjare pa kufi, duke i kthyer transaksionet e vetme në momente lidhjeje, duke krijuar përvoja të përbashkëta dhe duke rritur përfshirjen financiare që nxit zhvillimin ekonomik. (www.onefor.com)

Burimi: www.prnewswire.com

Dr. Arqile Mato agronom: Ka interes në rritje për kultivimin e grurit

I ftuar në emisionin “Alert” në News24 nga Granit Sokolaj, Dr. Arqile Mato agronom deklaroi se në zonën e Korçës, ku ai është vetë në terren tha se ka një interes në rritje për kultivimin e grurit edhe pse çmimet këtë vit janë më të larta.

“Jam çdo ditë në terren, në Korçë kam parë që ka interes në rritje dhe kjo duket në sipërfaqen e tokës së punuar. Në Korçë gruri mbillet më herët se në zona të tjera dhe ky interes pothujse është në të gjithë vendin. Tokat po punohen, njerëzit kanë interes ta mbjellin, çmimet ishin këtë vit më të larta, të disfavorshme kanë qenë çmimi i plehrave, grupi i plehrave që përdoren në bujqësi sot lëviz me 6-12 mijë lekë, relativisht më i lartë çmimi se 1 vit më parë. Përsa i takon farave, ka interes vit pas viti nga fermerët për fara të reja të grurit, të prodhuara nga vendet e BE, synohet të merren fara gruri të qëndrueshme ndaj sëmundjeve që hasen në Shqipëri. Pra, fara gruri me cikël të hershëm që i japin mundësi fermerëve që gruri të mbledhë kokrra para se të fillojnë temperaturat e larta, pasi ndryshimet klimaterike kanë sjellë penalizime nga temperaturat e larta në grurë. Shikohet ndaj variateteve me cikël të hershëm. Sivjet ka një interes në dukje më të lartë për fara dhe plehrat për grurin, duket se tregu shqiptar është i përgatitur për ta përballuar këtë situatë. Furnizimi me fara gruri nga importi është i lartë, furnizimi me plehra ka rritje të çmimit, por sasia është e mjaftueshme që të përballohet një fushatë e mbjelljes së grurit”-tha Arqile Mato.

Qendra Alert/Alert.al

Igli Tola: Sektori i bujqësisë sjell miliarda në buxhetin e shtetit, pa mbështetje financiare nga qeveria

I ftuar në emisionin “Alert” në News24 nga Granit Sokolaj, Igli Tola ekspert ekonomie ka folur për bujqësinë si sektor me të ardhura shumë të larta në buxhetin e shtetit dhe i pa përkrahur nga qeveria.

“Bujqësia nuk ka qenë sektori më i përkrahur në të gjithë këto vite edhe pse sjell më shumë të ardhura në buxhetin e shtetit. Sot, janë më shumë se 2.5-2.7 miliard euro që ky sektor sjell në buxhetin e shtetit. Vijon të jetë dega ekonomike me të ardhura më shumë për buxhetin e shtetit, por edhe për familjet e vendosura në zonat rurale. Është sektori që më së paku ka patur ndihmën e shtetit, si në mënyrë direkte përmes subvencioneve të shtetit, për grurin dhe misrin jemi të fundit në rajon, edhe Kosova është më mirë se ne për sa i përket subvencionit në bujqësi. Përveç pjesës direkte, qeveria mund të vendosë në funksion sistemin financiar, atë bankar ose jo bankar në funksion të bujqësisë. Sot, bujqësia është dega që merr më së paku kredi si nga sistemi financiar bankar ose jo bankar. Sepse shihet si sektor që riskon. Ka normë të lartë dështimi, ka risk të lartë të mos shlyerjes së kredisë, ndaj duhet të vihet në funksion buxheti i shtetit, si garant për marrjen e kredisë dhe shlyerjen e saj. Sektori bujqësor nuk është më i riskuari në strukturën ekonomike, pasi është turizmi, ndërtimi, por trajtimi dhe kujdesi ndaj bujqësisë është bërë që edhe banka dhe agjentë e kredive ta shohë me risk të lartë, që shoqërohet me norma interesi më të larta, duke e bërë jo përfituese për to, për t’ju drejtuar këtyre institucioneve për të financuar aktivitetin e tyre”-u shpreh eksperti Igli Tola.

Qendra Alert/Alert.al