Menu

Konsumatori

“Kërcënimi” nga qoftet e zgarave, me Salmonela dhe E.coli

Për të rritur sigurinë ushqimore por edhe në detyrimin që ka ndaj konsumatorit, emisioni “Alert” kreu një investigim në 5 zgarat kryesore të kryeqytetit, për produktet qofte për të analizuar nëse janë të infektuara me Salmonela apo E.coli. Pasi u morën 3 mostra të papërpunuara dhe 2 të pjekura u çuan për analizë në laboratorin e licencuar Noval. Në analiza rezultoi se 3 mostrat e papërpunuara kishin Salmonela dhe E.coli, ndërsa 2 mostrat e pjekura rezultuan negative ndaj këtyre baktereve. Investigimi u krye jo për të goditur subjektet, por për të ndihmuar konsumatorin që të konsumojë produkte të sigurta.

Qendra Alert/Alert.al

Rreziku nga qoftet, Prof.Dr. Kristaq Sini: Nëse s’gatuhen siç duhet shkaktojnë helmim, E.coli s’duhet të jetë mbi normat

I ftuar në emisionin “Alert” në News24 nga Granit Sokolaj, Prof.Dr. Kristaq Sini foli për infeksionin e salmonelës apo E.colit, i cili sipas tij merret dhe zhvillohet që tek procesi i therjes së kafshëve dhe deri tek nxjerrja e mishit nga frigoriferi. Sini tha se temperatura e sigurisë së ushqimeve është mbi 70 gradë, që fillon eleminimi i patogjenëve dhe nën 4 gradë që mos të lejohet të shtohet numri i tyre.

“Infeksioni me salmonela apo E.coli tek mishi mund të merret që në therjen e kafshës. Duke ngrirë mishin, infeksioni futet në brendësi dhe zhvillohet më shumë kur del nga frigoriferi. Kur nuk ekziston kultura higjenike, punonjësit bëhen përhapës të infeksionit. Këto produkte mbajnë patogjenë që në varësi të gatimit, gjysëm të pjekur apo krudo janë të rrezikshëm. Qoftet, mishi i grirë janë shumë të rrezikshme, kur ka gatim të pakët apo të përcalluar në sipërfaqe dhe jo pjekje në brendësi shkaktojnë helmim. Mishi i importit, kur manipulohet pëson infeksione dhe kur bëjmë analizat, duhet ajo e patogjenve, për të parë nëse ka patogjenë. Analizat për E.colin në ushqime nuk duhet të dalin mbi norma. Patogjenët eleminohen mbi 70 gradë dhe nëse nuk ruhen nën 4 gradë janë shumë të rrezikshme. Temperatura e sigurisë është mbi 70 gradë, pasterizimi që fillon eleminimi i patogjenëve dhe nën 4 gradë që mos të lejohet të shtohet numri i tyre. Në lidhje me zinxhirin ushqimor kam bërë një studim nëse Instituti i Shëndetit Publik merr të dhëna sidomos në spitalet rajonale, ku doli një jo përputhshmëri shumë e madhe. Nëse në spitalin Infektiv në Tiranë të regjistruar ishin rreth 3500 për periudhën 9-mujore, në Institutin e Shëndetit Publik ishin të regjistruar 759. Ndërkohë ka ankesa për mosmarrjen e informacionit për zonozat dhe gjithë problematikën që vjen përmes ushqimit, ndaj duhet një bashkëpunim i mirë i informacionit për të marrë masat e duhura. Të sëmurit duhet t’i bëhet analiza e feçes për të parë patogjenin që ia ka shkaktuar helmimin, gjë që tek ne nuk bëhen analiza të tilla. Edhe nga AKU, analizat mikrobiologjike janë të rralla, mungon baza materiale, reagentet dhe laboratorët, të cilët janë të mangët në lidhje me analizat mikrobiologjike. Që në marrjen e mostres, inspektori nuk kishte mjete sterile. Ndërkohë ka mungesë edhe të higjenës për gatimin e produkteve me origjinë shtazore, për t’u ruajtur nga infektimi i kryqëzuar. Në Gjermani, vite më parë u shënuan mbi 40 vdekje nga sallata jeshile, që ishte e infektuar nga plehu kimik i papërpunuar siç duhet.”-deklaroi Prof.Dr. Kristaq Sini.

Qendra Alert/Alert.al

Prof. Dr. Arjan Harxhi: Sëmundjet që shkaktohen tek njeriu nga Salmonela apo E.coli në ushqim

I ftuar në emisionin “Alert” në News24 nga Granit Sokolaj, Prof. Dr. Arjan Harxhi mjek infeksionist ka folur për konsumimin e ushqimit të pasigurt që sjell për pasojë shfaqjen e simptomave të helmimit tek konsumatorët.

“Në lidhje me përmbajtjen e klorit në ujë nuk është direkt nën targetin e shkencës mjekësore, por kur është në tepricë jep problemet e veta. Vlerësohen tiparet e ujit në enë transparente dhe përmbajtja fiziko-kimike, ndërsa klorifikimi i ujit është element i rëndësishëm i sigurisë së ujit, për shkak të shkaktarëve të ndryshëm mikrobikë. Është në funksion të detyrës së autoriteteve për përmbajtjen e klorit në ujë. Siguria ushqimore përfshin disa problematika, të cilat transmetohet përmes ushqimit. Ushqimi i pasigurt përbën problem në drejtim të infeksioneve, sëmundjeve që shkaktojnë në organizëm, janë kryesisht trakte të aparatit tretës, pak a shumë si helmim ushqimor. Infeksionet që vijnë me origjinë nga ushqimi, si pasojë e kontaminimit: Janë mbi 250 sëmundje të traktit, 2 nga këto janë nga infeksioni nga salmonela apo E.coli. SHBA raporton mbi 1 milion raste të infeksioneve nga salmonela. Kontaminimet nisin që nga kafsha, nëse nuk respektohet higjena, si salmonela apo E.coli kontaminojnë mishin, nga personi në momentin e ruajtjes, transportit apo kur bëhet gati për konsumim. Janë në lojë shumë autoritete që ushtrojnë kontrolle. Jemi një vend me incidencë të lartë të sëmundjeve. Si salmonela apo E.coli janë shkaktarë të shumë sëmundjeve, si diarre, dhimbje barku etj. Ne akoma vazhdojmë të kemi incidencë të lartë të këtyre infeksioneve dhe për shumë arsye, te moshat pediatrike. Kur vjen sezoni i verës kemi shumë raste të paraqitjes së fëmijëve me diarre, të vjella, temperaturë sidomos infeksioni tek fëmijët, nga virusi që transmetohet nga ushqimi. Shumica e këtyre rasteve mund të mos kërkojnë asistencë, por situata e rritjes së temperaturave dhe kontaminimit të ushqimeve, këto produkte kontaminohen më shumë në pjesën fundore, jo në origjinë.  Për çdo individ, duhet që asnjëherë të moskonsumojnë produkte jo të gatuara mirë, pasi mbartin në vetëvete riskun e marrjes së infeksioneve. Ndaj kujdes ku hani dhe mos pini ujë të pasigurt, pasi risku i transmetimit të infeksioneve është i lartë”-u shpreh Prof. Dr. Arjan Harxhi.

Qendra Alert/Alert.al

Qoftet në zgara të rrezikshme, Alban Zusi: Salmonela s’duhet të ekzistojë as në produktet e papërpunuara

I ftuar në emisionin “Alert” në News24 nga Granit Sokolaj, Alban Zusi nga “Albania Food Industry” foli për ngarkesën bakteriale që gjendet në produkte, kur mund të kontaminohen dhe metodologjia sipas tij e gabuar e AKU në planin e analizës me bazë risku, duke mos verifikuar marketet që shpeshherë tregtojnë produkte pa etiketë, pra me mungesë gjurmueshmërie.

“Ka normë tjetër për produktet e gatuara për ngarkesa bakteriale dhe tjetër për produktet e freskëta. Salmonela mund të ketë në qofte apo edhe në pulë të freskët, e cila në dhomë frigoriferike nuk mund të qëndrojë me mishëra të tjerë pasi ua kalon salmonelën, duke qenë se këto mishra mund të konsumohen gjysmë të gatuara. Qoftja është produkti më delikat, kur është i freskët mund të ketë ngarkesa brenda limiteve, ndërsa te produkti i i gatuar s’duhet të ketë as në limite ose mos të ekzistojë fare. Në shumë vende janë zgara të vogla, pasi kryesoret furnizohen nga sallamëritë e mëdha, por salmonela eziston. Te produkti i freskët dhe gjysmë i gatshëm salmonela gjendet brenda limiteve. Edhe pas pjekjes gjen probleme, por salmonela s’duhet të ekzistojë as në produketet e papërpunuara. Jemi me fat që salmonelen nuk e kemi gjetur te produkti i gatshëm. Pikë kritike është pjekja. Ne jemi te kultura e qofteve dhe jo tek salçiçet, të cilat në fakt e kanë kaluar një proces zirje më përpara, pastaj e kalojmë në pjekje. Qoftja nëse nuk piqet mirë kthehet në produkt të rrezikshëm dhe të kontaminon”-tha Alban Zusi.

Zusi ngriti si shqetësim metodologjinë me të cilën AKU vepron, planin e analizës me bazë risku.

“Qoftja është një nga produktet më delikate të tregut. Metodologjia me të cilën AKU vepron është e gabuar. Pasi marketi verifikohet një herë në ditë, ndërsa tregton çdo ditë qumësht pa etiketë, pa origjinë dhe gjurmueshmëri. Fabrika vërtet ka më shumë konsumatorë, por kontrollohet çdo muaj, ndërsa marketet që shesin quëmshtin me shishe pa etiketë nuk paskan risk. Nuk konsiderohet me risk të lartë një subjekt që e kontrollon çdo muaj e nuk ka probleme, ndërkohë që subjekte të tjera po t’i kontrollosh 5 herë, 2 herë të del me probleme. Nuk kemi përcaktuar saktë sa here duhet të kontrollojmë dhe ku duhet të ushtrohen kontrolle. Etiketa në qofte, përbërja duhet të jetë e dukshme. Etiketa është A-ja, pasi pa të nuk ka as gjurmueshmëri, asgjë. Nëse nuk ka etiketë, do të thotë se nuk ka origjinë. Keni kapur një produkt vërtet problematik, janë subjekte që mbartin rreziqe të mëdha për konsumatorin”-deklaroi Zusi.

Qendra Alert/Alert.al

Azbi Arapi nga AKU: Kontrollet në terren, nga marrja e mostrave e deri tek asgjësimi dhe gjobat ndaj subjekteve

I ftuar në emisionin “Alert” në News24 nga Granit Sokolaj, Azbi Arapi drejtori i menaxhimit të riskut në AKU ka folur për inspektimet e AKU në plane me bazë risku dhe analizimi i mostrave deri në asgjësimin, bllokimin dhe masat administrative ndaj subjekteve që kanë rezultuar në shkelje.

“Inspektimet në minimarkete kryhen në bazë të planeve të riskut, por normalisht shishet me qumësht të vendosura në frigoriferë në këto subjekte nuk lejohen. Të gjitha bizneset e vogla nuk e kanë detyrim ligjor të regjistrohen, si minimarketi futet biznes me risk të mesëm dhe jo të lartë. I bie që një herë në vit të inspektohet nga AKU. Është e vërtetë që ka qumësht të tillë të palejuar në supermarkete apo rrugë që është e ndaluar të tregtohet, por mund të jetë porosi familjare referuar marrëdhënieve familjare, por i sigurt nuk është pasi ka mungesë gjurmueshmërie.  Edhe zgarat apo restorantet futen në risk të mesëm. AKU funksionon në bazë të një plani të miratur të ministrit, ku është planifikuar që në zgara 1 herë në vit të kontrollohen. Zgarat futen në biznes të vogël, nuk kanë detyrim të pajisen me licencë, por në momentin e hapjes kanë detyrim që brenda muajit të lajmërojnë AKU që zhvillohet ky aktivitet. Gjatë inspektimeve shikohen kushtet higjeno-sanitare, librezat shëndetësore, gjurmueshmëria e produktit, mbajtja frigoriferike, temperaturat konform legjislacionit, pra këto janë në fokus. Na kanë ardhur shpesh paralajmërime për mbarimin e dezinfektimit, librezat shëndetësore të parinovuara, apo kur nuk është evidentuar gjurmueshmëria. Është bërë asgjësimi i produktit dhe janë aplikuar masa administrative. Kemi patur dhe precedentë të marrjes së mostrave, që i dërgojnë në ISUV dhe laboratorë rajonalë, gjatë inspektimit bllokohet produkti deri në daljen e rezultatit. Kemi planin e marrjes së mostrave, në 2020 nuk kemi patur asnjë rast për shkak të pandemisë, ndërsa në 2021 kemi patur 6 raste, ku janë regjistruar me bllokim, asgjësim produkti dhe masa administrative, pasi nuk ka rezultuar aspak gjurmueshmëri. Në analiza nuk kemi raste që kanë dalë pozitive me Salmonela apo E.coli. Që në vitin 2009-2010 kur u krijua AKU kemi patur një projekt të BE për metodologjinë, mbi planin me bazë risku dhe marrjes së mostrave. Procesi i marrjes së mostrave është akt në vete, AKU ka një metodologji mbi planet për produktet me bazë risku. Janë përmirësuar kushtet në thertore, atje ku fillon salmonela në kushtet e prerjes, ka veterinerë. Është e vërtetë se ka vend për përmirësim, por jemi në përmirësim të vazhdueshëm. Atje ku mendoni që duhet marrë mostra, mund të na jepni sinjalizim dhe mund të kërkoni të merren mostra, do bëjmë transparente me autorizim dhe do merren këto mostrat dhe analizat se si do dalin”-tha Azbi Arapi.

Qendra Alert/Alert.al

Si të frenoni dëshirën për ushqime të shpejta

Ushqimet e shpejta mund të jenë të shijshme ama përveç se krijojnë varësi, janë të dëmshme për shëndetin në shumë mënyra. Përveç mbipeshës, ushqimet e shpejta shkaktojnë probleme jo vetëm me imunitetin por edhe nxisin sëmundjet e zemrës, veshkave, mëlçisë, trurit dhe stomakut. Si Të Frenoni Nepsin Për Ushqime Të Shpejta Një gjë e tillë kërkon vullnet dhe logjikë. Nëse ekspozoheni më pak ndaj këtyre ushqimeve do të jetë më e lehtë sepse fundja larg syrit, larg stomakut. Përveç ekspozimit, ju duhet të tregoni kujdes në ushqyerje duke zgjedhur ushqime të shëndetshme dhe planifikuar regjimin tuaj ushqimor për çdo javë. Në punë a në shkollë mund të merrni ushqim me vete nga shtëpia dhe kështu do të shmangni dëshirën për të ngrënë diçka të shpejtë. Stresi është një faktor që të shtyn drejt zgjedhjeve jo të shëndetshme. Nëse falë stresit keni ngrënë gjithmonë ushqime të shpejta, përpiquni dhe angazhohuni që të ndryshoni një qasje të tillë. Nëse kur jeni të stresuar dëshironi patate të skuqura, në vend të tyre mund të hani një perime siç është kastraveci që është jo vetëm hidratues por edhe shumë i shëndetshëm. Gjumi është një aspekt shumë i rëndësishëm i qasjes së shëndetshme ndaj ushqyerjes. Sigurohuni që të flini të paktën 7 deri në 8 orë çdo natë. Një rutinë e shëndetshme gjumi, do ju ndihmojë të jeni më të vullnetshëm por edhe të shmangni shumë nepse të pashëndetshme. Kujdes Me Emocionet Emocionet, edhe ato të nxitura nga stresi, na shtyjnë drejt zgjedhjeve impulsive dhe jo të shëndetshme. Kur jeni të zemëruar, të stresuar, apo të mërzitur, qëndroni larg vitrinave joshëse të restoranteve që ofrojnë ushqime të shpejta. Është në dorën tuaj të ndërroni drejtim dhe pavarësisht emocioneve të siguroheni që të hani më shumë sallata, fruta, perime, drithëra të plota, supa, fara dhe yndyrna të shëndetshme. Frutat mund t’i merrni me vete në punë a në shkollë dhe të merrni dozat e nevojshme për vitamina dhe minerale. Në vend të lëngjeve të gazuara, me sheqer dhe kafeinë, zgjidhni ujin, që ju hidraton dhe ju mban në formë. Mbi të gjitha, mos u demoralizoni nëse vëreni që ndonjëherë i dorëzoheni tundimit për një ushqim të shpejtë. Konsumi i një vakti të shpejtë në javë është një qasje e shëndetshme dhe mbi të gjitha jo drastike.(AgroWeb)
Qendra Alert/Alert.al

Sa kohë mund të përdoret qumështi pasi ta keni hapur ambalazhin?

Ne lexojmë në etiketë kur qumështi është i paketuar dhe cila është data në të dhe sipas shijes për të kuptuar nëse është prishur apo jo, por prapë mund ta hedhim pa u prishur.

Sipas portalit Eat By Date, qumështi pasi hapet mund të përdoret 4-7 ditë pas datës së shtypur në ambalazh, dhe kur hapet, qumështi që ka shumë yndyrë mund të përdoret për 5-7 ditë dhe qumësht pa laktozë dhe pa yndyrë 7 ditë pas skadimit, por nëse ruhet në frigorifer.

Sa kohë mund të qëndrojë qumështi pa u prishur?

Ekziston një ndryshim i madh midis mbishkrimeve në ambalazh, të cilat mund të jenë: “më mirë është të përdoret deri më “, “të shitet deri më”, “skadon”.

Fraza e parë tregon vetëm cilësinë, dhe pas asaj date ushqimi është i sigurt për t’u ngrënë.

“Skadon deri më” zbulon ditën kur produkti fillon të prishet dhe nuk mund të jetë aq i mirë për t’u konsumuar.

“Të shitet deri më” tregon për shitësin se deri kur duhet ta shesë, dhe më pas e hedh poshtë.

Asnjë nga këto mbishkrime nuk zbulon kur qumështi do të prishet.

Natyrisht, ne gjithashtu duhet t’i kushtojmë vëmendje se çfarë lloj qumështi blejmë, nëse nuk është i mbrojtur, ai do të prishet më shpejt.

Si të zgjasni jetëgjatësinë e tij?

Ka mënyra për të zgjatur jetëgjatësinë dhe një truk është veçanërisht interesant, shtoni një majë kripe në qumësht sapo ta hapni. Mbylleni dhe tundeni, kështu që ju mund të zgjasni jetëgjatësinë e qumështit edhe për 4 ditë të tjera. (Telegrafi)

Qendra Alert/Alert.al

Ushqimet që iu bëjnë keq më shumë se cigaret

Dietat e pabalancuara vrasin më shumë njerëz sesa pirja e duhanit.

Shkencëtarët zbuluan se mungesa e lëndëve ushqyese të rëndësishme mund të dëmtojë shëndetin tuaj. Sidoqoftë, disa produkte, të cilat ne i përfshijmë në dietën tonë për të ashtuquajturat cilësi të dobishme, mund të jenë gjithashtu shkatërruese për trupin tonë.

Midis tyre janë lëngjet e frutave të freskëta që duken të shëndetshëm në krahasim me pije të tjera të gazuara, por në të vërtetë mund t’ju sjellin një hap më afër diabetit.

Sushi: Sushi vetë nuk është i dëmshëm. Sidoqoftë, janë përbërësit e ndryshëm në Sushi që shkaktojnë problemin kryesor. Shumë sushi në ditët e sotme përmbajnë majonezë, djathë krem, salca dhe produkte të tjera të diskutueshme që rrisin vlerën ushqyese të Sushit dhe kanë shumë kalori.

Lëngje frutash dhe lëngjet e gazuara: Frutat konsiderohen jetësore dhe lëngjet e freskëta janë një mënyrë e thjeshtë për t’i shtuar ato në racionin tuaj të përditshëm. Sidoqoftë, në formë të lëngshme, frutat humbasin shumicën e elementeve të tyre të shëndetshëm, si fibra, e cila luan një rol të rëndësishëm në parandalimin e diabetit, sëmundjeve të zemrës dhe mbipeshës.

Buka e bardhë: Ndërsa fibra kontribuon në një peshë të shëndetshme, presion të mirë të gjakut dhe një rrezik më të ulët të diabetit dhe sëmundjeve kardiovaskulare, fakti që buka e bardhë nuk ka këto fibra mund të jetë arsyeja pse nuk duhet përdorur. (Express)

Qendra Alert/Alert.al

Hamburgerat me perime janë të ndryshëm nga njëri-tjetri, kushtojini vëmendje përbërësve

Hamburgerat me perime nuk janë më të shëndetshme se ato me produkte mishi, për më tepër ato përpunohen më shumë në nivel industrial. Është rezultat i një studimi i publikuar në faqen e internetit NutriMi, që vlerësohen produktet ushqimore duke marrë parasysh si aspektin ushqyes ashtu edhe procesin e prodhimit. Krahasimi bazohet në vlerat ushqyese të hamburgërave, ku qoftet e mishit të viçit do të ishin të preferueshme vetëm sepse janë më pak të yndyrshme dhe më natyrale, pasi nuk përfshijnë shtesa sheqeri, kripe ose përbërës të tjerë. Është e vërtetë se është një ushqim i thjeshtë, jo ultra i përpunuar, siç janë analogët e bimëve. Në fakt transformimi i sojës, bizeleve ose perimeve të tjera në një produkt të ngjashëm me mishin kërkon përbërës të ndryshëm dhe procese komplekse industriale. Megjithatë, nuk mund të thuhet se hamburgeri i viçit është gjithmonë i preferueshëm nga ai vegjetarian sepse ka produkte shumë të ndryshme me bazë bimore, me përbërës të ndryshëm dhe tavolina ushqyese. Mesatarja e 10 hamburgerave nuk është interesante për konsumatorin, i cili duhet të bëjë një zgjedhje midis produkteve gjithnjë e më të shumta dhe të diferencuara.

Ne krahasuam hamburgerin e mishit të viçit, 100% mish, markën Coop Origine, me disa hamburgerë me perime që i gjejmë në raftet e supermarketeve. 100 gramë hamburgerë me mish viçi sigurojnë 181 kcal, 11 g yndyrë, nga të cilat 5.5 yndyrna të ngopura dhe 20 g proteina. Produkti nuk përmban karbohidrate, as fibra dhe shumë pak kripë. Shumica e alternativave të perimeve prodhohen nga sojë, por edhe nga bizele, kjo e fundit është një përbërës më i qëndrueshëm se soja dhe gjithnjë e më shumë përdoret. Si yndyrë shpesh mund të gjeni vaj luledielli, por edhe vaj kokosi (më i pasur me yndyrna të ngopura) dhe rrallë vajin e shëndetshëm ekstra të virgjër të ullirit. Shumë receta përfshijnë qepë, domate ose perime të tjera dhe erëzat janë gjithmonë të pranishme për të shijuar përzierjen. Në disa raste shfaqen aditivë të tillë si aromatizuesit ose konservuesit.

Përbërja: Vlera ushqyese e produkteve ndryshon: 100 g sigurojnë mesatarisht rreth 200 kcal, një vlerë e afërt me atë të hamburgerit me mish viçi. Yndyrnat e ngopura, ato të cilave duhet t’u kushtojmë më shumë vëmendje, sepse janë të lidhura me sëmundjet kardiovaskulare, zakonisht mbeten rreth 1% në prodhimet bimore, kundrejt 5.5% të mishit që kemi marrë në krahasim me to. Kini kujdes, megjithatë sepse sasia mund të rritet në varësi të yndyrës së përdorur: Ju merrni në 6.5% në hamburger, i cili përdor vajin e kokosit mes përbërësve. Prodhimet bimore përmbajnë edhe një sasi të caktuar të karbohidrateve komplekse (që mungojnë në mish) dhe fibra perimesh. Në vend të kësaj, mungojnë mikronutrientë të rëndësishëm, si hekuri dhe vitaminat, të cilat i gjejmë te mishi. Kujdes nga kripa: Mungon në hamburgerat vetëm me mish.

Një hamburger, në vakt është zakonisht pjata më e pasur në proteina dhe produkti i mishit të viçit, prej 20% ka një përmbajtje të shkëlqyer proteinike. Kjo pjesë, nga ana tjetër, ndryshon shumë në produktet e perimeve. Prandaj është e qartë se gjithmonë duhet t’i lexojmë etiketat me kujdes, duke marrë parasysh yndyrnat, proteinat, kripën dhe gjithashtu praninë e additivëve të tillë si konservuesit. Kjo vlen edhe për produktet e mishit të viçit, sepse hamburgerët me mish 100% janë të rrallë, pasi shpesh përfshijnë shtesa, të tilla si patate, barëra dhe kripë. Përveç kësaj, përmbajtja e ngopur e yndyrës ndryshon shumë në varësi të prerjes së përdorur. (IlFattoAlimentare)

Qendra Alert/Alert.al

Rapex publikon raportin e radhës: Produktet e rrezikshme joushqimore

Rapex ka publikuar raportin për produket e rrezikshme joushqimore. Në raportin e Rapex është publikuar lista me produktet e rrezikshme, nga karrocat dhe lodrat për fëmijë, rrezelazer dhe deri tek shapkat.

Karrocë për fëmijë

Lloji i rrezikut: Lëndime

Vendi njoftues: Sllovakia

Numri i alarmit: A12/01417/21

Karroca për fëmijë ka vetëm një bravë sigurie dhe nuk është mjaftueshme ndaj ngarkesës. Për pasojë, fëmija mund të rrëzohet lehtësisht nëse është duke luajtur ose ulur në karrocë, duke bërë që fëmija të bjerë në tokë ose të dëmtojë gishtat ose gjymtyrët.

Produkti nuk përputhet me kërkesat e Direktivës për Sigurinë e Lodrave dhe standardin Evropian përkatës EN 71-1.

 

Rrezelazer

Lloji i rrezikut: Dëmtimi i shikimit

Vendi njoftues: Sllovakia

Numri i alarmit: A12/01411/21

Rrezelazeri është shumë i fuqishëm. Shikimi i drejtpërdrejtë i rrezelazer mund të shkaktojë dëmtim të shikimit. Produkti nuk përputhet me kërkesat e Direktivës së Përgjithshme të Sigurisë së Produktit dhe standardit përkatës Evropian EN 60825-1.

 

Arush për fëmijë

Lloji i rrezikut: Mbytja

Vendi njoftues: Kroacia

Numri i alarmit: A11/00088/21

Për shkak të dobësisë së qepjeve, materiali fijor i mbushjes së lodrës është lehtësisht i arritshëm. Një fëmijë mund ta fusë në gojë dhe të mbytet. Produkti nuk përputhet me kërkesat e Direktivës për Sigurinë e Lodrave dhe standardin Evropian EN 71-1.

 

Shapka

Lloji i rrezikut: Kimike

Vendi njoftues: Gjermani

Numri i alarmit: A12/01435/21

Materiali plastik i produktit përmban një sasi të tepërt të dibutilfalatit (DBP) (vlera e matur: 12.3 % ndaj peshës). Ky ftalat mund të dëmtojë shëndetin duke shkaktuar dëme të mundshme në sistemin riprodhues. Produkti nuk përputhet me Rregulloren REACH.

Njoftimi i plote me te gjitha produktet e rrezikshme:

https://ec.europa.eu/safety-gate-alerts/screen/search?token=17349998034B4BF2A21828F4797C05DD

Qendra Alert – Alert.al