Menu

Konsumatori

Hepatiti A në produktin e hurmave të arabisë me origjinë nga Jordania

Zyrtarët australianë kanë raportuar për tre raste të infektimit me Hepatit A të hurmave të arabisë të importuara nga Jordania.

Infektimi është i njëjtë me rastet e zbuluara disa muaj më parë me Hepatitis A në Britaninë e Madhe.

Në Britani hurmat e arabisë u ndaluan nga market Sainsbury dhe Marks & Spencer.

Së paku 30 njerëz u infektuan me Hepatit A në pjesë të ndryshme të Anglisë dhe një person u sëmur në Uells. Ata kishin një moshë mesatare prej 60 vjec, dhe 25 prej tyre u shtruan në spital.

Gjatë asaj kohe, nuk u verifikuan raste të reja në vende të tjera, por rastet e reja në Australi konfirmojnë të kundërtën.

Autoritetet e Kontrollit të Ushqimit të këtyre vendeve po këshillojnë konsumatorët që kanë blerë hurma arabie nga Jordania të ndalojnë konsumimin e tyre, duke e depozituar atë në koshin e mbetjeve ose ta kthejnë në vendin që e kanë blerë për të marrë paratë e tyre mbrapa.

Hepatiti A është një virus që prek mëlcinë. Mund të shkaktojë simptoma të tilla si vjellje, ethe, zverdhje të lëkurës si dhe urinim me ngjyrë të errët. Simptomat e hepatitit A mund të shfaqen duke filluar nga 15 ditë pas konsumimit të ushqimit të kontaminuar me këtë virus deri në 50 ditë pas ngrënies së tij.

Personat e vaksinuar kundër Hepatitit A janë të mbrojtur nga infektimi nga ky virus ndërkohë që ata që nuk janë të sigurtë nëse janë vaksinuar apo jo, duhet të kontaktojnë me mjekët nëse kanë konsumuar produkte të tilla gjatë dy javëve të fundit.

 

Burimi: Food Safety News

Qendra Alert

alert.al

EUROPOL publikon raportin e operacionit Opson IX: ja çfarë u gjet në vajin e ullirit të bllokuar në Shqipëri

Europol ka publikuar të dhënat e operacionit të tij më të fundit OPSON IX në lidhje me sigurinë ushqimore. Sipas këtij raporti rastet e shkeljeve fiskale dhe të sigurisë ushqimore mbeten në nivelet më të larta, të ngjashme me vitet e mëparshme, por rastet e falsifikimit të dokumentave të origjinës së produkteve ushqimore janë sidomos në rritje.

Vaji i ullirit

Vendet pjesëmarrëse: Shqipëria, Kroacia, Franca, Gjermania, Greqia, Italia, Islanda, Jordania, Lituania, Norvegjia, Portugalia, Spanja

Një total prej rreth 149 ton vaj gatimi u kapën si rezultat i këtij aksioni të drejtuar nga Greqia. Rreth 88 tonë nga konfiskimet ishin vaj ulliri dhe u raportuan nga Shqipëria, Kroacia, Franca, Greqia, Italia, Jordania, Lituania, Portugalia dhe Spanja.

Në Itali, gjatë një kontrolli në një kompani që prodhonte vaj ulliri, inspektorët gjetën një tepricë të produktit, origjina e huaj e të cilit ishte e panjohur dhe nuk ishte regjistruar në dokumentet zyrtare të kompanisë, kështu që u kapën më shumë se 66 ton vaj ulliri.

Rezultatet e OPSON IX, tregojnë se rastet me mostra jonormale të vajit të ullirit ishin të shumta, ndoshta të ndikuara edhe nga pandemia, e cila nuk i lejoi autoritetet kompetente të bënin kontrolle dhe hetime të detajuara gjatë saj.

Pas bllokimit të parë në Greqi, kontrollet vazhduan, dhe Europol, ka zbuluar raste të vajit të ullirit të ngjyrosur me ngjyrë artificiale si dhe me origjinë të panjohur (shtuar me ngjyra kimike në mënyrë që të duket si vaj ulliri), i cili u paraqit në treg si vaj ulliri ekstra i virgjër që vjen nga zonat e famshme greke.

Në veçanti 3 persona u arrestuan dhe u sekuestruan 565 litra dhe 110 enë plastike vaj ulliri të falsifikuar, gjatë kontrolleve të kryera nga Policia Greke në tregun e brendshëm.

Kontejnerët kishin etiketa me mungesën e treguesve të detyrueshëm të prodhuesve të veçantë dhe karakteristikave të tjera të produktit që përmbante, i cili u paraqit si vaj ulliri ekstra i virgjër.

Nga analiza kimike e mostrave u zbulua se vaji nuk ishte vaj ulliri por vaj me ngjyrë artificiale, i papërshtatshëm për konsum dhe i rrezikshëm për shëndetin e njeriut.

Burimi: Europol, OPSON IX

Qendra Alert

alert.al

Embëlsirat dhe biskotat e gatshme: a janë vërtet kaq të dëmshme?

Në raftet e supermarketeve ndodhen qindra ëmbëlsira dhe biskota të gatshme, duke filluar që nga brioshët, kekët me shije të ndryshme dhe madje edhe tortat e gatshme dhe të paketuara. Disa prej tyre janë të mbushura me shtresa të ndryshme prej marmalate, reçeli, kakaoje ose të mbuluara sipër me çokollatë. Mbi të gjitha, janë praktike dhe komode për tu marrë me vete, por shpesh akuzohen edhe si produkte që ndikojnë negativisht për shëndetin. Nutricionistët nuk rekomandojnë shmangien plotësisht të tyre, por sugjerojnë që duhet që të zgjidhen me kujdes, pasi shpesh kanë sasi të mëdha sheqeri, yndyrnash dhe janë të varfëra përsa i përket vlerave ushqyese. Gjithashtu, ëmbëlsirat e gatshme kanë pak vitamina, minerale dhe fibra: kështu që nuk duhet ekzagjeruar me ngrënien e tyre dhe duhen alternuar me ushqime të tjera të cilat kanë vlera ushqyese të pasura.

Ëmbëlsirat e gatshme dhe fëmijët 

Këto lloj ëmbëlsirash janë një zgjidhje praktike dhe komode sidomos për fëmijët dhe të rinjtë. Sipas statistikave të ekspertëve, ëmbëlsirat e gatshme duhet të përfaqësojnë vetëm 5 deri në 8% të kalorive totale që ata marrin çdo ditë. Por nuk ka ndonjë tregues specifik për ëmbëlsirën e gatshme ideale për fëmijët apo për të rinjtë. Ajo që duhet të kihet parasysh është që:

  • Ëmbëlsirat deri në 130 kalori (kcal) janë të përshtatshme për fëmijët e shkollave fillore;
  • Ëmbëlsirat ndërmjet 130 – 180 kalorive (kcal) janë të përshtatshme për fëmijët nga klasa e 5 deri në klasën e 9-të.
  • Ëmbëlsirat e gatshme me më shumë se 180 (kcal) kalori janë të përshtatshme për më të rriturit.

Ëmbëlsira e gatshme ideale nuk ekziston, por megjithatë ekziston një rregull: përshtatja e këtyre ëmbëlsirave në bazë të moshës, dhe nevojave të momentit, duke zgjedhur ëmbëlsira më të lehta për ditët që nuk kanë shumë aktivitet fizik dhe ato me më shumë kalori të përdoren kur keni një aktivitet fizik më të madh.

Si të zgjedhim ëmbëlsirën e duhur të gatshme?

Duke i hedhur një sy listës së përbërësve apo tabelës së saj të vlerave ushqyese, aty ndodhen dhe vlerat kalorike, sheqernat dhe përbërësit e tjerë të produktit. Nuk ka një markë më të mirë sesa një tjetër përsa i përket ëmbëlsirave të gatshme, por gjithmonë duhen studiuar përbërësit e produktit për të bërë zgjedhjen e duhur.

Burimi: AltroConsumo 

Qendra Alert

alert.al 

Cilin krem mbrojtës për diell duhet të zgjidhni në varësi të moshës tuaj

Vera është këtu! Deti dhe dielli shqiptar janë këtu, duke na dhënë bujarisht mirëqenie fizike dhe veçanërisht mendore.

Edhe pse asgjë nuk duket të jetë negative, rrezet e dëmshme të diellit fshihen dhe do të jetë mirë ta keni gjithmonë në mendje. Dhe kur themi “gjithmonë “, nuk nënkuptojmë vetëm ato orë kur mbledhim vitaminë D në një plazh.

Ekspertët vazhdimisht theksojnë rëndësinë e përdorimit të kremrave kundër diellit sa më shpesh që mundemi gjatë ditës gjatë muajve të verës dhe ata dinë diçka më shumë…

Krem mbrojtës nga dielli çdo mëngjes dhe dalje në mesditë, pra, dhe jo vetëm në plazhe.

Duhet të bëhet zakon: Duhet të aplikoni krem kundër diellit në fytyrë para se të dilni nga shtëpia, pasi ekspozimi ndaj rrezatimit ultravjollcë mund të shkaktojë djegie të rënda të lëkurës, ndërsa për popullatën femërore ka një probabilitet të lartë të shfaqjes së njollave dhe plakjes së parakohshme.

Sidomos në mëngjes dhe në mesditë, rutina juaj duhet të përfshijë hidratimin e lëkurës dhe më pas aplikimin e kremit kundër diellit.

Dhe cilën krem ​​mbrojtës kundër fytyrës duhet të zgjedh?

Në varësi të llojit të lëkurës (të thatë ose të yndyrshëm) mund të gjeni krem ​​mbrojtës që i përshtatet nevojave tuaja. Ajo që është e sigurt është se për çdo dekadë kremi ynë i diellit duhet të plotësojë disa kushte. Kushtet e mëposhtme, në lidhje me personin:

Për moshat mbi 20 vjeç

Shumica e vajzave në grupmoshën 20+ mund të kenë puçrra, kështu që gjëja më e rëndësishme është që kremi kundër diellit të mos ketë një strukturë të yndyrshme, në mënyrë që të shmanget shkëlqimi i mundshëm. Ideale janë kremrat xhel dhe të hollë me ngjyrë për të mbuluar papërsosmëritë.

Ne ju sugjerojme krem kundër diellit me spf30 për lëkurën e errët dhe këtu për ato më të lehta. Mos harroni të rinovoni kremin tuaj të diellit shpesh pasi treguesi i mbrojtjes nuk premton mrekulli.

Për moshat mbi 30 vjeç

Ndërsa temperatura rritet lëkura jonë ka nevojë për hidratim shtesë. Edhe këtu, e njëjta gjë vlen për moshën 20+, megjithëse lëkura në këtë fazë të moshës ka nevojë për më shumë hidratim, prandaj sigurohuni që ta bazoni atë në kremin hidratues para kremit kundër diellit dhe më pas ta plotësoni me një tregues të mbrojtjes së fytyrës dhe buzëve.

Sipas shkencëtarëve, buzët kanë nevojë për mbrojtje adekuate pasi nuk përmbajnë melaninë, gjë që i bën ato të prirura ndaj shfaqjes së mundshme të kancerit të lëkurës. Shumë njerëz përdorin kremin e tyre të diellit në buzët e tyre ose thjesht aplikojnë buzëkuq për t’u mbrojtur. Gabim i madh … ka kremra ​​hidratues të fytyrës për diell shumë të lartë.

Për moshat mbi 40 vjeç

Padyshim që kjo periudhë ka nevojë për mbrojtje shtesë për shkak të humbjes së elasticitetit të lëkurës dhe dehidratimit nga nxehtësia dhe rrezet e diellit. Kremi kundër diellit këtu duhet të ketë agjentë anti-inflamatorë , antioksidantë dhe përbërës hidratues. Njollat, përveç përdorimit të kremrave me ngjyra, kanë nevojë edhe për një indeks të lartë mbrojtjeje, të paktën 30 e më lart. Duhet të merrni kremra që të kenë plus vaj argani, elastinë, kolagjen!

Për moshat mbi 50 vjeç

Lëkura e kësaj moshe më së shpeshti ka grumbulluar “dëmtime” të shkaktuara nga dielli në të gjitha vitet e mëparshme. Dhe në këtë rast kremi kundër diellit që duhet të zgjidhni duhet të ketë veti të zgjeruara. Ideale për këtë rast është kremi kundër diellit me acid hialuronik pasi ka një efekt hidratues dhe anti-plakje në lëkurë.

Këshillë: Sigurohuni që të mbuloni të gjithë fytyrën me produkt, madje edhe zonën nën sy me lëvizje të kujdesshme. Mos harroni syzet tuaja të diellit dhe me siguri një krem ​​kundër diellit me vitaminë C do të ndihmojë në zbutjen e inflamacioneve ose rrudhave të mundshme.

A kemi ndonjë gjë për mbrojtjen nga dielli të trupit?

Sigurisht që kemi! Në rastin e kremrave kundër diellit për trupin tonë, gjërat janë më të thjeshta. Ju duhet t’i kushtoni vëmendje të veçantë vizitave të para në plazh dhe të preferoni një indeks të lartë mbrojtjeje. Lëkura juaj ka nevojë për kohë për të aktivizuar melaninën e saj.

Për një shtesë ju mund të kombinoni me kremin tuaj mbrojtës nga dielli (jo vetëm), të aplikoni një sasi të vajit për nxirje nga dielli. Provoni pak vaj me përbërës si kokosi për ta miksuar gjatë verës!

Për pas dushit, tregohet përdorimi i produkteve pas diellit, të cilat nga njëra anë rrisin nxirjen, por nga ana tjetër ofrojnë hidratim të thellë dhe lehtësim nga dielli i nxehtë dhe kripa.

PS: Mos harroni se lëkura juaj është ind i gjallë, merr frymë dhe ka nevojë për kujdes që të jetë rinore dhe e freskët. Më themelorja është uji gjatë ditës! Pini shumë në kombinim me ushqimin e duhur dhe lëkura juaj do t’ju ​​falënderojë!

Pershtatur nga revista greke “Daynight”

Qendra Alert

alert.al

AKU, këshilla për sigurinë ushqimore në shtëpi: Lani lëkurën e shalqirit!

Është pikërisht stina e këtij fruti të kuq. Lani lëkuren e shalqirit para se ta konsumoni, këshillon AKU. Ka disa pikëpyetje mbi larjen apo jo të tij përpara se ta prisni.

Ju si veproni? Në foton e dytë mund të mësoni përgjigjen e saktë.

 

Qendra Alert

alert.al/

EKSKLUZIVE/ Raporti i KLSH 2018-2020: DRAKU Tiranë, pjesë e mashtrimit të fermerëve me fara që nuk mbijnë

Fermerët mashtrohen me farat që blejnë duke pësuar miliona lekë investime të shkuara dëm. Pjesë e mashtrimit është bërë edhe AKU, e cila nuk njofton në asnjë rast fermerët, kur analizat dalin nën normë. Kjo ndodh sepse tregtarët e farave dhe të fidanëve bujqësorë abuzojnë duke i pasur shpatullat të mbrojtura inspektorët e DRAKU Tiranë.

Për inspektimin  e MMSHB (materiali mbjellës dhe shumëzues bimor) janë kryer 274 inspektime nga të cilat janë asgjësuar 11.229 ton dhe janë marrë masa administrative me vlerë 120.000 lekë. Janë marrë 36 mostra për MMSHB, 2 prej të cilave janë pa përgjigje.

Por, raporti i KLSH zbulon se në shumë raste, mijëra kilogramë fara të skaduara lejohet të përfundojnë tek fermerët, edhe pse analizat e tyre tregojnë fuqi mbirëse të dobët.

Misri hibrid nuk bllokohet, analiza pa përgjigje

Nga shqyrtimi i praktikës së inspektimit datë 25janar 2018  në subjektin X është konstatuar një sasi prej 7 ton farë misri hibrid për të cilin subjektit i është lënë detyrë të ri analizojë treguesit e fuqisë mbirëse. Raporti zbulon se DRAKU nuk ka bërë akt-bllokimin për farën deri në momentin e daljes së analizës. Sipas raportit të auditimit, DRAKU Tiranë nuk ka kryer më asnjë inspektim për këtë çështje.

Nga shqyrtimi i praktikës së inspektimit më datë 28 shkurt 2018 për ri-inspektimin e detyrave të lëna më datë 25 janar 2018 për ri-analizimin e farës së misrit hibrid, konstatohet se ende nuk janë marrë përgjigjet e analizës. Në  proces-verbalin dhe vendimin përfundimtar DRAKU Tiranë ka vendosur që subjekti të mos e tregtojë farën deri në daljen e analizës, por përsëri nuk ka bërë akt-bllokimin e farës.

Misri i bllokuar del në shitje

Nga  shqyrtimi  i  praktikës  së datës 30 prill 2018 me objekt inspektimin, ndjekjen e gjurmueshmërisë, referuar evidencës së marrë nga subjekti mbi shpërndarjen e farës së misrit më 27 prill 2018. Subjekti është furnizuar me farë misri nga importuesi i LG 30600 prej 5632.3 kg e ardhur në janar 2018, në sasinë 1000 kg prej dhe nga e cila në momentin e inspektimit kanë ngelur 30 kg për të cilat është bërë bllokimi. Pjesa tjetër është u është shitur fermerëve të zonës së Kavajës, ku bashkëlidhur me praktikën e inspektimit është lista e blerësve.

Ndërkohë ka edhe raste të tjera që të bëjnë të dyshosh në veprimet e DRAKU Tiranë. Kështu, nga shqyrtimi i praktikës së inspektimit datë 26 prill 2018 për ndjekjen e gjurmueshmërisë, referuar rezultatit të analizave të fuqisë mbirëse, nga mostrat e marra në një subjekt tjetër, tek i cili ishte furnizuar subjekti X, është konstatuar se sasia e farës së misrit LG 30600, afro 5632.3 kg e ardhur në janar 2018 është shitur e gjitha.

“DRAKU nuk ka bërë marrjen e mostrës, kjo në kundërshtim me ligjin “Për materialin mbjellës dhe shumëzues bimor”, thekson raporti.

Me këtë ngarkesë fare misri lidhet edhe praktika e inspektimit më 30 prill 2018 me objekt ndjekjen e gjurmueshmërisë, referuar evidencës së marrë nga subjekti furnizues mbi shpërndarjen e farës së misrit më  27 prill 2018. Subjekti është furnizuar me farë misri nga LG 30600 prej 5632.3 kg e ardhur në janar 2018, në sasinë 1000 kg. Nga kjo sasi në momentin e inspektimit kanë ngelur 304 kg për të cilat është bërë bllokimi. Pjesa tjetër u është shitur fermerëve të zonës së Kavajës.

Mashtrim me analizat e mostrave

Nga shqyrtimi i praktikës se inspektimit datë 10 maj 2018 rezulton një mashtrim nga ana e inspektorëve të DRAKU Tiranë. Kontrolli kishte objekt inspektimin, zhbllokimin e farës së misrit referuar përgjigjes së analizave. Konstatohet se inspektorët kanë bërë zhbllokimin e sasisë prej 30 kg të bllokuar në subjekt pas përgjigjes së analizës  së datës 7 maj 2018 për farën VAR.LG  30600 (LANDERO) LOT F0964B0215855SM(120kg) dhe VAR LG 30600 LOT F0964B021583SM(5000KG).

Sasia e cila është zhbllokuar nuk është e të njëjtit LOT nga e cila ka dalë analiza, pasi në subjektin e furnizuar nuk është bërë marrja e mostrës për këtë farë, por për një tjetër LOT me të njëjtin varietet.

“DRAKU Tiranë nuk duhet të kishte bërë zhbllokimin  e sasisë së farës së misrit pasi “Kur nga inspektimi i kryer ose nga analizat e mostrave të marra rezulton se materiali mbjellës dhe shumëzues bimor nuk është analizuar furnizuesit i ndalohet nxjerrja në treg e tij”, konstaton KLSH.

Çfarë ndodhi me këtë sasi fare të dobët që erdhi nga jashtë?

Nga shqyrtimi i praktikës së inspektimit datë 29 mars 2018 për subjektin importues për veprimtarinë “importi dhe tregtimi me shumicë i MMSHB, konstatohet se kontrolli është kryer, referuar e-mail-it të ardhur nga sektori fitosanitar i PIK-ut Qafë-Thanë. Në magazinën e subjektit gjendet sasia prej 4456.95 kg farë misri e bllokuar nga PIK- Qafë-Thanë me Proces-verbal Bllokimi dhe Vendimi datë 27 mars 2018 deri në daljen e përgjigjes së analizave. Gjithashtu është bërë bllokimi i sasisë prej 19.853 kg e ardhur në datën 11 mars 2018 të cilat kanë rezultuar nën normë referuar përgjigjes së analizave të ardhura nga ESHFF. Nuk ka evidencë që këto sasi misri të bllokuara të jenë asgjësuar ose të jenë kthyer pas tek shteti nga erdhën.

Mostrat merren jashtë rregullave

KLSH evidenton edhe një fenomen të përsëritur në marrjen e mostrave të farave. Nga shqyrtimi i praktikës së inspektimit datë 16 shkurt 2018 me objekt inspektimi marrje mostre për farën e misrit LG-30325-LOT-599SM(3013KG) e ndarë në 251 thasë x 12.004 kg, del se mostrat janë dërguar për analizim në datën 19 shkurt 2018. Kjo sipas auditivit është në kundërshtim me udhëzimin “për krijimin, shumëzimin, përpunimin, tregtimin, kontrollin, vlerësimin e farave dhe fidanëve dhe mbajtjen e trajtimin e materialit gjenetik bimor”.

DRAKU pjesë e zinxhirit të mashtrimit të fermerëve

Nga shqyrtimi i praktikës së inspektimit datë 18 prill 2018, konstatohet se është bërë marrja e mostrës së misrit për 3 lote; LG 3350 me sasinë 861.8kg/; LG 3395 me sasinë 7893.6 kg/; ANTIS me sasinë 12123.3kg.

Nga analiza, mostrat e marra  rezultuan me fuqi mbirëse nën normë. Nga verifikimi i bërë nga inspektorët e  DRAKU Tiranë, është konstatuar se në magazinën e subjektit nga 3 lotet e mësipërme ndodheshin: LG 3350 me sasinë 55.6 kg; LG 0166 me sasinë 66kg; ANTIS me sasinë 69kg.

Pjesa tjetër është shitur nga ana e subjektit tek tregtarët. Ne proces-verbal inspektimi dhe vendimin përfundimtar DRAKU ka lënë detyrë të bëhet njoftimi i të tretëve për rreziqet e mundshme dhe tërheqjen e menjëhershme nga tregu të sasisë së shitur. Ndërkaq, DRAKU Tiranë nuk kanë marrë masë administrative për shkeljen e ligjit nga subjekti.

Në vazhdim, më 25 prill 2018 inspektorët u kthyen për “detyrat” e lëna nga inspektimi i datës 18 prill 2018. Me proces-verbal inspektimi dhe vendim përfundimtar konstatohet se në magazinën e subjektit është rikthyer sasia prej 6059.8 kg farë misri VAR ANTIS dhe 719.2 kg kg farë misri VAR DIBRA LG 3350. Nga sasia e VAR ANTIS e kthyer mungojnë 5995.3 kg dhe nga sasia e VAR DIBRA LOT 3350 mungojnë edhe 87 kg të cilat duhet të riktheheshin në magazinën e subjektit. Per LOT-in LG 3395 me sasinë 7893.6 kg nga e cila në magazinën e subjektit ishin gjetur vetëm 66 kg, nuk është bërë tërheqja e sasisë. Bashkëlidhur praktikës janë foto tek te cilat janë të paqarta për të dalluar sasinë.

Pavarësisht se farës i ishte bërë njëherë analizimi, DRAKU Tiranë e vazhdon komedinë duke marrë përsëri mostër për analizim dhe ka bërë bllokimin e farës me Akt­ Bllokim deri në daljen e rezultatit të laboratorit. Kështu DRAKU vazhdoi të bëhet pjesë e abuzimit ndaj fermerëve.

Bizelet nuk mbijnë, DRAKU nuk i asgjëson

Nga shqyrtimi i praktikes së inspektimit me datë 13 mars 2018 pas rezultateve të analizës së ardhur nga ESHFF-ja, me Flete-Analizën datë 19 shkurt 2018, rezultojnë se fara e bizeles kishte fuqi mbirëse nën normë.

Subjektit i është dhënë dënim administrativ me gjobë në vlerën 40.000 lekë. Sipas auditimit, DRAKU Tiranë nuk ka vepruar në përputhje me ligjin, pasi duhet të bënte sekuestrimin, asgjësimin ose kthimin në vendin e origjinës të produktit që ka dalë me fuqi mbirëse jashtë normës. Gjithashtu, DRAKU Tiranë ka vonuar njoftimin për dhënien e rezultatit

Kështu është vepruar edhe më vonë. Nga shqyrtimi i praktikës së inspektimit të datës 25 prill 2018, pasi analizat laboratorike rezultojnë pozitive, nga përgjigja e ardhur nga ESHFF, rezulton se fuqia mbirëse e mostrës është nën normë. DRAKU ka marrë masën dënim administrativ me gjobë me vlerën 40.000 lek për shkeljen e konstatuar dhe ka bërë bllokimin e farës prej 30.6 kg e ndarë në dy thasë

“DRAKU Tiranë nuk ka vepruar në përputhje me ligjin, pasi duhet të bënte sekuestrimin, asgjësimin ose kthimin në vendin e origjinës të produktit që ka dalë me fuqi mbirëse jashtë normës”, thekson KLSH.

Por edhe kur bëhet asgjësimi, sipas letrave, DRAKU të lë të dyshosh se nuk ka e kryer. Në praktikën e inspektimit 23 maj 2018, pas kërkesës së subjektit për asgjësimin e dy produkteve (fara qepujka dhe patate), në proces­verbalin e inspektimit dhe vendimin përfundimtar, thuhet se asgjësimi është bërë konform kërkesave ligjore, por mungojnë evidencat nga momenti i asgjësimit.

Në këto kushte, fermerët duket ta marrin raportin e KLSH-së dhe të shkojnë gjykatë të kërkojnë zhdëmtimin për dëmin e shkaktuar dhe fitimin munguar nga blerja e farave me fuqi të dobët mbirëse. Jo vetëm kaq, por mund të bëjnë edhe kallëzim për mashtrim dhe shpërdorim detyre nga zyrtarët e DRAKU-Tiranë, që në dijeni të plotë kanë lejuar të dalin në treg fara të tilla.

*KLSH ka kryer një  kontroll në Drejtorinë Rajonale të Autoritetit Kombëtar të Ushqimit Tiranë (DRAKU) për periudhën nga data 1 janar 2018 deri 30 dhjetor 2020. Nga kontrolli rezultojnë shkelje të rënda financiare, të Ligjit për ushqimin dhe vendimeve të qeverisë për kontrollin e cilësisë së produkteve ushqimore, duke mos mbrojtur interesin e konsumatorit.

Qendra Alert

alert.al/

 

Rritet çmimi i kafesë, shkak moti i ftohtë në Brazil

Çmimi i kafesë arabike ka arritur në nivelet më të larta gjatë shtatë viteve të fundit për shkak të dëmtimit të këtij produkti nga ngricat e rënda që pushtuan një nga prodhuesit më të mëdhenj në botë, Brazilit.

Moti më i ftohtë gjatë 30 viteve të fundit, do të dëmtojë jo vetëm prodhimin e sivjetshëm, por edhe së paku prodhimin e dy viteve të ardhshëm.

Ngrica është konsideruar si armiku kryesor i prodhimit të kafesë, që kur ajo u mboll për herë të parë në Brazil në shekullin e 18-të.

Disa rajone në Brazil janë më të prekshme nga ngricat sesa vende të tjera prodhuese të kafesë, të tilla si Kolumbia apo Etiopia.

Kafeja është një bimë tropikale, dhe si e tillë nuk mund të mbijetojë në temperatura të ulta, veçanërisht nëse ato bien poshtë 5 gradë celcius.

Temperaturat nën zero, rreth -3 ose -4 gradë janë vdekjeprurëse për lulet e kësaj bime, si dhe për frutat, duke shkaktuar djegie në gjethe, gjë e cila sjell edhe rënien e tyre.

Dëmtimi më i rëndë është atëherë kur formohen kristalet e akullit, të cilat mund të ndikojnë të gjithë bimën ose pjesë të saj, duke e bërë që të nxihet dhe ajo të mos prodhojë më asgjë.

Në disa raste, mund të duhen 1 ose 2 vite që bimët e kafesë të marrin veten por nëse ato duhet që të zëvendësohen atëherë mund të duhen 4 ose 5 vite.

E gjithë kjo ka ardhur si pasojë e ndryshimit të motit në Brazil, duke bërë që klima e tij të jetë më e lagësht dhe gjithashtu më e ngrohtë.

Burimi: Reuters

Qendra Alert

alert.al

Bullgaria ndalon portokallet turke: të kontaminuara me pesticidin që dëmton shëndetin riprodhues të grave

Në fillim të gushtit, në Bullgari janë raportuar raste të ndalimit të portokalleve të kontaminuara nga Turqia me pesticidin prokloraz.

Proklorazi  është një fungicid që i përket familjes së eterit të fenolit. Kimikati është prezantuar për herë të parë në vitin 1977 dhe përdoret kudo, në të gjithë botën, duke përfshirë Europën, Azinë, Afrikën dhe Amerikën Latine. Përdoret vecanërisht në kopshtari si dhe në sektorët bujqësorë. Ai mund të përdoret vetëm ose i kombinuar me kimikate të tjera për të eleminuar infektimin me kërpudha të drithërave. Por është i përdorur gjithashtu edhe për oriz, kafe si dhe për fruta të tilla si agrumet.

Efektet anësore të tij janë të ndryshme në bazë edhe të mënyrës së përdorimit, qoftë me anë të gëlltitjes, prekjes së drejtpërdrejtë në lëkurë, rënies në kontakt me sytë dhe si pasojë mund të shkaktojë emergjenca të ndryshme mjekësore.

Si një lëndë kimike e fuqishme, proklorazi mund të shkaktojë irritimin e rrugëve të frymëmarrjes, dhe inflamacionin e hundës. Përkeqëson gjendjen respiratore të njerëzve që vuajnë edhe me parë nga sëmundje të frymëmarrjes të tilla si bronshiti kronik.

Gjithashtu, kjo lëndë kimike ndikon negativisht sistemin riprodhues të femrave. Ekspozimi ndaj këtij kimikati mund të sjellë ndryshimin e gjendjes së humorit, depresion, shtimin në peshë, afshet, gjakderdhje si dhe një menopauzë të hershme. Ekspozimi afatgjatë ndaj këtij pesticide mund të shkaktojë rritjen e mpiksjeve të gjakut, tension të ulët të gjakut si dhe vdekjen e qelizave të bardha të gjakut.

Qendra Alert

alert.al

Zbulohet kontaminimi me salmonelë i piperit të zi nga Brazili

Gjatë ditëve të fundit, në Sistemin e Alarmit të Shpejtë për Ushqimet (RAFSS) të Komisionit Europian, janë raportuar raste të kontaminimit me salmonelë të piperit të zi me origjinë nga Brazili.

Rasti më i fundit është raportuar gjatë datës 4 gusht në shtetin e Holandës, ku verifikimi i këtij kontaminimi është bërë në kufi, dhe produkti i piperit të zi nuk është lejuar që të futet në tregun holandez.

Më herët, katër raste të ngjashme ishin verifikuar edhe në shtetin gjerman, i cili gjithashtu kishte refuizuar pranimin e këtij produkti në kufi.

Simptomat e helmimit ushqimor të shkaktuara nga Salmonela zakonisht janë: diarre, shtrëngime stomaku, vjellje dhe temperaturë e lartë. Periudha e inkubacionit zgjat rreth 12-36 orë. Sëmundja, ndonjëherë është e rëndë, dhe të shkuarit në spital mund të jetë e domosdoshme.

Burimi: RAFSS

Qendra Alert

alert.al

Arrestohet shpërndarësi i qumështit, policia e ngatërron me një vjedhës

Një shpërndarës qumështi është arrestuar nga policia, megjithëse oficerët e policisë ishin të pranishëm ndërsa ai po linte shishe qumështi në derën e një shtëpie.

Burri është ndaluar në kontenë Durham në Angli të mërkurën në mëngjes.

Oficerët e policisë ishin vënë në ndjekje të një të kërkuari dhe sipas tyre shpërndarësi i qumështit përputhej me të dhënat që ata kishin.

Pronari i shpërndarësit të qumështit, Russ Gibson, është shprehur për policinë që punonjësi i tij e kishte marrë në telefon më parë për ta lajmëruar që po zhvillohej një operacion policor në atë zonë. Më pas e kishte marrë sërish për ta informuar që ishte ndaluar nga policia në orët e para të mëngjesit.

Sipas pronarit, Z. Gibson, policia e kishte parë punonjësin që po shpërndante qumësht, dhe madje ai i kishte treguar dhe qumështin si dhe shishet bosh, por ata e kishin ndaluar 15 minuta më vonë kur kishte ndaluar për një kafe. Sipas tij është një nga ato historitë ku nuk di sesi të veprosh ‘të qeshësh apo të jesh i zemëruar’.

Pronari Gibson, në orën 7 të mëngjesit vrapoi për në rajonin e policisë dhe me ndihmën e oficerëve të policisë arriti që ta merrte kamionin e tij, por qumështi që ai duhet të shpërndante ishte ngrohur dhe kështu që nuk mund të shitej dhe në këtë mënyrë duhej zëvendësuar.

Ndërkohë që shpërndarësi i qumështit u lirua pa iu ngritur një akuzë për tentativë vjedhjeje, por është nën hetim për pengimin e një oficeri policie.

Burimi: Sky News

Qendra Alert

alert.al