Menu

Kryesore

Varianti Delta i përhapur gjerësisht në Shqipëri

Komiteti Teknik i Ekspertëve njoftoi në mbledhjen e tij urgjente këtë mesditë që nuk ka ndryshim të masave kufizuese ndaj koronavirusit. Zv.ministrja e Shëndetësisë Mira Rakacolli, foli për situatën e pandemisë në vend dhe për variantin ‘Delta’ që tashmë është konfirmuar zyrtarisht në vendin tonë. Ajo tha se varianti Delta qarkullon gjerësisht në Shqipëri.

Komiteti gjithashtu njoftoi që aktualisht në spital janë të shtruar rreth 9 pacientë dhe që prej 30 ditësh nuk ka asnjë viktimë të regjistruar për shkak të Covid – 19.

‘Në vend ka një rritje të lehë të numrave të rasteve të reja ditore dhe incidencës një javore. Por pavarësisht kësaj, vendi vazhdon të mbetet në një situatë të qëndrueshme epidemiologjike. Në Rajon, Europë dhe botë vihet re një rritje  e konsiderueshme e rasteve të reja. Siç është bërë me dije, në Shqipëri është vërtetuar zyrtarisht dyshimi për praninë e variantit Delta të virusit në Shqipëri’, u shpreh Rakacolli.

alert.al

Autoriteti Europian i Sigurisë Ushqimore: Nuk mund të vendoset një limit apo kufizim për sheqernat

Një panel me ekspertë të Autoritetit Europian të Sigurisë Ushqimore (EFSA) ka përfunduar vlerësimin e tij paraprak në lidhje me sigurinë e sheqernave të marra nëpërmjet dietës ushqimore pas një rivlerësimi të përgjithshëm shkencor.

Shefi i Njësisë së Ushqimit të EFSA, Valeriu Curtui, tha që: “Kjo ka qenë një punë jashtëzakonisht sfiduese deri më tani, duke përfshirë vlerësimin e mbi 30,000 botimeve. Ekspertët dhe stafi ynë kanë bërë një përpjekje të madhe për të arritur në këtë pikë dhe kanë zbatuar standardet më të larta shkencore’

EFSA do të vazhdojë më konsultimet e hapura me publikun të cilat do të vazhdojnë deri më 30 shtator.

Pesë vende evropiane (Danimarka, Finlanda, Islanda, Norvegjia dhe Suedia) i kërkuan EFSA-së të përditësojë një vlerësim të vitit 2010 dhe të rishikojë literaturën më të fundit shkencore mbi lidhjet ndërmjet marrjes së sheqernave dhe sëmundjeve të ndryshme, si p.sh. obeziteti, diabeti tip II, sëmundjet kardiovaskulare, si dhe kariesi dentar.

Këto vende specifikisht kërkuan nëse do të ishte e mundur të vendosnin një limit  të ndërprerjes të marrjes së sheqerit të bazuar në të dhëna shkencore ― ose i quajtur ndryshe një “nivel i sipërm i tolerueshëm apo i pranueshëm” (UL) për lëndët ushqyese ― për sheqernat totale dietike, nën të cilat konsumi nuk do të shkaktonte probleme shëndetësore.

Por në draftin paraprak, EFSA ka dalë në përfundimin që duke shqyrtuar më shumë se 30,000 botime, shkencëtarët e tyre konkludojnë që tani për tani nuk është e mundur të vendoset një prag apo kufizim i tillë.

Sidoqoftë, opinioni shkencor konfirmon, me shkallë të caktuara sigurie, lidhje të ndryshme midis marrjes së kategorive të ndryshme të sheqernave dhe rrezikut të zhvillimit të sëmundjeve kronike metabolike dhe kariesit dentar. Por, ky informacion ka për qëllim të ndihmojë shtetet anëtare të BE-së në përcaktimin e qëllimeve për popullatat dhe / ose rekomandimet për individët në vendin e tyre.

Burimi: EFSA

Qendra Alert

alert.al

Cigaret Marlboro brenda dhjetë viteve do të zhduken nga tregu britanik

Marka ikonë e cigareve, Marlboro, do të zhduket nga tregu britanik brenda dhjetë viteve, është shprehur shefi ekzekutiv i kompanisë së duhanit Philip Morris. Kjo është bërë si një përpjekje për të diversifikuar strategjinë e konsumimit të duhanit sot në botë, nga përdorimi i cigareve elektrike, dhe jo vetëm. Kohët e fundit, kompania Philip Morris ka investuar fuqimisht në gjetjen e alternativave ndaj nikotinës, duke përfshirë dhe produktin IQOS, e cila e nxeh duhanin, pa e djegur atë, dhe e cila sot numëron rreth 20 milionë përdorues në të gjithë botën.

Kjo do të thotë që kompania po investon që të dalë jashtë tregut të cigareve. Aktivistët kundër përdorimit të duhanit e kanë parë me skepticizëm këto përpjekje të kompanive të duhanit, dhe vënë në dukje që alternativat ndaj pirjes së cigareve janë po aq të dëmshme sa konsumimi i tyre.

Angazhimi për të hequr cigaret tradicionale në Britaninë e Madhe është e nxitur pjesërisht nga konsumatorët dhe sjellja e investitorit, si dhe nga politikat qeveritare. Aktualisht, shkalla e duhanpirjes në Britani është relativisht e ulët dhe cigaret taksohen shumë, dhe që nga viti 2016 shiten me një paketim shumë të thjeshtë.

Në vitin 2019, qeveria britanike u angazhua që deri në vitin 2030, numri i duhanpirësve të ulej në 5 përqind, rreth 1/3 e numrit aktual.

Burimi: Financial Times

alert.al

Hapet bujtina e parë në fshatin Labovë e Kryqit me financimin e AZHBR

Kryeministri Rama së bashku me drejtoreshën e përgjithshme të Agjencisë për Zhvillim Bujqësor dhe Rural, Frida Krifca, dhe ish ministren e kultures Mirela Kumbaro kanë inaguruar së fundmi një bujtinë që është e hapur për turistët në fshatin Labovë e Kryqit në Gjirokastër. Bujtina “Maria”, është shtëpia e parë që hapet për turistët në këtë fshat, falë mbështetjes nga Skema Kombëtare e Financimit prej AZHBR, për ngritjen e bujtinave turistike dhe agroturizmave në fshatin shqiptar, ku ndërthuren tradita dhe modernia, në funksion të zhvillimit të ekonomisë familjare, lokale dhe kombëtare.

AZHBR si një institucion i akredituar për administrimin e fondeve nga BE, është fokusuar në zhvillimin e një Bujqësie të qëndrueshme dhe diversifikimin e ekonomisë Rurale, nëpërmjet granteve që përftohen nga Buxheti i Shtetit, Bashkimi Evropian, Banka Botërore dhe Qeveria Suedeze.

Sipas asaj që drejtoriesha e Përgjithshme e AZHBR Frida Krifca ka publikuar në median sociale, kjo është e para bujtinë në zonë që hap dyert për shërbime akomoduese dhe gastronomike.

Bujtina është ngritur mbi themelet e shtëpisë së vjetër, të rrënuar, ku janë shtuar tetë dhoma pritëse që janë mobiluar me kushte tepër të rehatshme. “Vizitorë ka shumë, por skanë ku flenë, dhe largohen”, thotë Maria që do të gatuajë supë me lëng mishi, lakror, qullopita dhe gliko kajsie me barbarozë për vizitorët. Produktet do tja marre fermerëve në fshat që prodhojnë plot të mira.

Mbështetja e këtij investimi do lejojë që vizitorët të kenë mundësinë të qëndrojnë e ta njohin këtë fshat me histori. Ata tashmë jo vetëm do vijnë të vizitojnë kishën, por do shpenzojnë kohë e financa për të pushuar disa netë në kushte optimale, të degustojnë prodhimet, të blejnë me vete, e të vizitojnë kalanë e të tjera vende tërheqëse.

alert.al

Deputeti i parë shqiptar i Hamburgut, vizitë në zyrat e Ecolog. Takohet dhe me filantropin Lazim Destani: Do të loboj për diasporën shqiptare

Deputeti i Partisë Socialdemokrate (SPD) gjermane, me origjinë nga Pozharani i Vitisë në Kosovë dhe aktualisht deputeti i parë me origjinë shqiptare në Parlamentin e Hamburgut, Z. Sami Musa, ka vizituar filantropin e mirënjohur shqiptar Z. Lazim Destani në Tetovë. Z. Destani është Anëtar i Këshillit Koordinues të Diasporës dhe President Nderi i Dhomës së Biznesit të Diasporës Shqiptare. Lajmin e ka bërë të ditur vetë deputeti Musa në faqen e tij në Facebook duke u shprehur për pasditen e këndshme dhe shkëmbimet e vyera jëtësore.

‘U ndjeva tejet i nderuar nga mikpritja e lartë që gjeta te ky njeri me zemër bujare, i njohur si njëri ndër shqiptarët më të nderuar dhe i respektuar anembanë botës. Përvojat e tij jetësore dhe ato të punës, përplot me vlera të larta njerëzore, janë një shkollë më vete nga e cila shumëkush mund të mësojë gëra të reja’ shprehet deputeti më i ri i Hamburgut. Përveçse deputet, 35-vjeçari Sami Musa është gjithashtu një afarist dhe biznesmen i njohur në Hamburg.

Takimi u realizua në një nga hapësirat e bizneseve të familjes Destani, në ‘Ecolog International’, e cila shquhet për konceptet vizionare biznesore dhe tashmë operon në më shumë se 40 vende të botës. Njëra nga kompanitë e tjera të Grupacionit të bizneseve të familjes Destani është dhe ‘Eco-Care’ e angazhuar në menaxhimin e krizës së pandemisë dhe që operon në disa vende europiane përfshirë dhe Gjermaninë. Po ashtu kompania ‘e.Go Mobile’, që gjithashtu është një biznes i familjes Destani, vepron në industrinë e gjelbër automobilistike.

Deputeti i Hamburgut Sami Musa shprehet i impresionuar në median sociale dhe shpreson që takimi i radhës të jetë në Hamburg, për të vazhduar bashkëpunimin në mënyrë që kontributi i gjithsecilit prej nesh, si në shoqëri ashtu dhe në trojet tona, të vijë gjithnjë duke u rritur e shumëfishuar.

Qendra Alert
alert.al

Dhjetë të vdekur pas daljes së autobusit nga rruga në Kroaci

Dhjetë persona kanë vdekur dhe dhjetëra të tjerë janë plagosur, si pasojë e daljes nga rruga të një autobusi me targa të Kosovës në Sllavonski Brod në Kroaci, ka thënë policia kroate e asaj zone.

Autoritetet ende nuk kanë bërë të ditur shtetësinë e viktimave.

“Gjatë hetimit, policia ka konstatuar se bëhet fjalë për një autobus me tabela të Kosovës dhe sipas informacionit që kemi aktualisht, dhjetë persona kanë vdekur dhe dhjetëra të tjerë janë dërguar në spitalin në Sllavonski Brod për trajtim mjekësor”, ka thënë zëdhënësi i Policisë në Brod Posavina, Damir Breziq, për Radio-Televizionin Kroat (HRT).

Sipas tij, situata është shumë e vështirë dhe se shumë persona janë në rrezik për jetën.

Shefi i policisë së trafikut në Sllavonski Brod, Franjo Galiq, u ka thënë gazetarëve se policia ka marrë raportime më 25 korrik në orën 6:20, se një autobus ka dalë nga rruga.

“Pas mbërritjes në vendin e ngjarjes, është përcaktuar se ishte një autobus me targa të regjistrimit të Kosovës, i cili po udhëtonte në linjë të rregullt Frankfurt-Prishtinë. Hetimi është duke vazhduar, ne e dimë me siguri se disa njerëz kanë vdekur, më shumë se 30 persona janë transportuar në spital”, ka thënë Galiq.

Aksidenti ka ndodhur afër shtëpizës për pagesë të rrugës.

Presidentja e Kosovës, Vjosa Osmani, e ka quajtur tragjik, lajmin për aksident.

“Me zemër e me shpirt sot jemi me familjet që humbën më të dashurit në këtë tragjedi. Dhimbja është e papërshkrueshme e humbja shumë e madhe. Ngushëllime të sinqerta për të gjithë!

Shteti i Kosovës do të jetë në krah të familjeve të atyre që humbën jetën, sikurse edhe të të lënduarve, të cilëve ju dëshiroj shërim të shpejtë”, ka thënë Osmani.

Kryeministri i Kosovës, Albin Kurti ka thënë se ende nuk ka konfirmime zyrtare për detajet e aksidentit.

“Me pikëllim të thellë e morëm lajmin për aksidentin tragjik në Kroaci, të një autobusi me targa të Kosovës. Ndonëse ende nuk kemi konfirmime zyrtare për detajet, lutemi të ketë sa më pak të vdekur e sa më shpejt të shërohen të lënduarit. Ministri ynë i Punëve të Brendshme po niset për Kroaci, ndërkaq drejt vendit të aksidentit te autostrada e Sllavonski Brodit tashmë është nisur ambasadori ynë në Zagreb”, ka thënë Kurti përmes një postimi në Facebook.

 

Ndërkohë kryeministri i Krocisë, Andrej Plenkoviq, ka thënë në Twitter se me trishtim të madh e ka pranuar lajmin për incidentin me autobus, me targa të Kosovës.

“Bashkëndjejmë me familjet e viktimave, autoritetet dhe popullin e Kosovës, të cilëve u shprehim ngushëllime të thella. Shpresoj që pasagjerët e plagosur të shërohen”.

Ndërkohë ministri i Jashtëm kroat, Gordan Gërliq Radman, ka thënë se ka biseduar me ministren për Punë të Jashtme dhe Diasporë në Qeverinë e Kosovës, Donika Gërvalla, për t’i shprehur ngushëllime popullit të Kosovës dhe familjeve të viktimave.

Burimi: Radio Evropa e Lirë

alert.al/

EKSKLUZIVE/ Raporti i KLSH: Abuzimi me karburantin, 1 makinë e DRAKU-së bën 414 km në ditë në Tiranë, u dyfishua konsumi brenda vitit

Abuzimi me konsumin e karburantit të makinave është “korrupsioni i vogël” që ndodh rëndom në çdo institucion, por tek DRAKU ka një rritje eksponenciale. A e dini se DRAKU çdo vit e rrit me 150 % konsumin e naftës, ndërsa numri i makinave është i njëjtë?

KLSH në auditimin e bërë për tre vitet e fundit në DRAKU*, zbulon se konsumi i karburantit, nga 1200 litra në vitin 2018, arriti në 4170 litra në vitin 2020!

Rritja e konsumit të karburantit

Blerja e karburantit është kryer nga AKU Qendër, ndërsa sipas planit dhe nevojave, është shpërndarë në drejtoritë rajonale. Sipas të dhënave të akt-rakordimeve të karburantit të magazinieres X, rezulton se: në vitin 2018 institucioni kishte 1 mjet Land Rover Defender me targa AA720NS, ku janë bërë hyrje 1,200  litra dhe janë bërë dalje 1,084 litra. Diferenca gjendje 116 litra naftë ka kaluar dhe përdorur në vitin 2019.

Një vit më pas, institucioni kishte në përdorim 7 automjete të reja dhe 1 furgon, ku janë bërë hyrje 2,660  litra naftë dhe janë bërë dalje 2,630 litra. Diferenca  gjendje 146 litra nafte ka kaluar dhe është përdorur në vitin pasardhës.

Bumi i harxhimit të karburantit ka ndodhur në vitin 2020. Institucioni kishte në përdorim 8 automjete, pra po aq sa një vit më parë, por janë bërë hyrje 4,170 litra naftë dhe janë bërë dalje 4,166 litra karburant. Tepruan vetëm 150 litra naftë.

Rritja e konsumit të karburantit për të njëjtin numër mjetesh dhe përfafërsisht të njëjtin volum pune të inspektorëve, nuk ka nevojë për koment.

414 km brenda Tiranës një makinë për një ditë!    

DRAKU Tiranë ka hartuar dhe miratuar me komision normativat e konsumit të karburantit për automjetet e veta, sipas aktit teknik nr.3114/6  datë 11.03.2019.      – Janë mbajtur procesverbale të shoqëruara me autorizimet e inspektimit për justifikimin e karburantit të përdorur sipas automjeteve dhe inspektorëve.

Nga auditimi i dokumentacionit të karburantit, KLSH konstaton se: Në fletë-udhëtimet ose përmbledhëset sipas muajve e datave përkatëse, pasqyrohen km e kryera në mënyrë të pasaktë, pasi shtohen km në distancat e linjave  brenda qytetit Tiranë dhe jashtë saj, duke mos u mbështetur në tabelën e miratuar nga DPSHTRR, konkretisht:

– 414 km Tiranë-Tiranë për datën 02.09.2019 me makinën AA937VV,  ku për çdo ditë, maksimumi kryhen 2 inspektime me nga gjysmë dite punë.

-129 km Tiranë-Tiranë për datën 29.11.2019 me makinën AA872VV, ku për çdo ditë maksimumi kryhen 2 inspektime me nga gjysmë dite.

-141 km Tiranë-Kavajë-Tiranë, date 05.11.2019, makina AA912VV, ku për çdo ditë, maksimumi kryhen 2 inspektime me nga gjysmë ditë.

-133 km Tiranë-Kavajë-Tiranë, datë 19.11.2019,  makina AA912VV, ku distanca Tiranë-Kavajë është 50 km (vajtje ardhje 100 km),

-102 km DRAK.U- Njësia 2 dhe 5 Tiranë, datë 12.12.2019, makina AA912VV,

– 960 km Tiranë-Tiranë, muaji korrik 2020, makina TR 3226L.

Dokumentet shkel e shko

Fletëdaljet e naftës paraqiten në disa raste të parregullta,  pasi nuk janë të lexueshme, kanë korrigjime dhe shtesa, mungesë nënshkrimi nga marrësi, mungese urdhër-dalje nga titullari etj.

KLSH rendit në raport disa nga këto fatura me korrigjime. “Fletë dalja nr.163, datë 13.08.2019 për 212 litra naftë nuk ka nënshkrimin e marrësit. Fletë-dalja nr.133, datë  28.06.2019 për 30 litra nafte nuk ka nënshkrimin e marrësit; fletë dalja nr.188 datë 01.10.2019 për 297 litra naftë ka korrigjime në sasi (nga 197, bërë 297 litra) dhe në vlerë. Fletë dalja nr. 268, datë 20.12.2019 për 50 dhe 44 litra naftë ka korrigjime në sasi (nga 40 dhe 30, bërë 50 dhe 44 litra).

Fletë dalja nr. 112, datë 30.06.2019 ka shtesë për 100 litra naftë dhe korrigjime”. Sa sipër, vazhdon raporti i KLSH, evidentimi i lëvizjes, menaxhimit dhe konsumit të karburantit mbi bazën e një dokumentacioni mbështetës të parregullt, të paplotë dhe të paqartë si dhe të pambështetur në dokumente të tjera vërtetuese dhe plotësuese për harxhimin e karburantit si dhe mos argumentimi i rritjes së konsumit  të karburantit është në kundërshtim me: ligjin nr. 10296 date 8.7.2010 “Për menaxhimin financiar dhe kontrollin”.

Tender për transportin e reagentëve dhe perdeve

Sikur të mos mjaftonte abuzimi me karburantin e makinave, DRAKU paguan transport me makina të marra me tender. Më poshtë është shembulli kur DRAKU paguan 720 mijë lekë për të transportuar një raft dhe disa arka me reagent nga Siri Kodra tek DRAKU në rrugën “Hamdi Pepa”.

Sipas urdhër shpenzimit datë 24.07.2019, DRAKU  Tiranë ka likuiduar me procedurë prokurimi me vlera të vogla subjektin Y, në vlerën 72,000 lekë të reja, shpenzime transporti për 4 rrugë, për materiale e reagentë 510 kg, 1 raft, ambalazhe, bombola gazi, perde, abazhur, në linjën Siri Kodra deri tek DRAKU Tiranë,  rruga Hamdi Pepa.

Thuhet se materialet u transportuan me 4 rrugë, por nuk citohet lloji i automjetit dhe targa e tij në asnjë dokument të kësaj praktike.

“Fatura e subjektit nr.  60597242,  datë  03.07.2019  është e parregullt, pasi nuk të plotë përshkrimin e mallit, nuk është pasqyruar sasia dhe çmimi pa TVSH, mungon nënshkrimi i transportuesit dhe linja e përshkruar, mungon pasqyrimi i lloji të automjetit dhe targa e tij”, përshkruan raporti i KLSH këtë dokument.

Por, KLSH zbulon edhe një falsifikim në këtë transaksion.

“Fatura nr. 60597242, date 03.07.2019 nuk është e formatit tatimor, sepse shifrat e serive të kopjes së parë të faturës janë me ngjyre blu, në vend që të jenë të kuqe siç janë standardet.

Në këto kushte nga mos lëshimi nga OE i kësaj fature tatimore të regjistruar për shërbime të kryera, ka krijuar evazion fiskal. Blerja e shërbimeve nga furnitori me këtë lloj fature është e kundërligjshme. Për këtë faturë të parregullt nuk është  aplikuar gjoba mbi vlerën e saj si masë dënimi për krijimin e evazionit fiskal nga fumizuesit. Vlera e evazionit fiskal është 12,000 lekë të reja”, raportin KLSH.

Nga ana tjetër, nuk ka arsyetim ligjor mbi pagesën 72,000 lekë. “Kryerja e shërbimit të transportit në mënyre të ndarë (4 rrugë dhe jo vetëm 1, me qëllim uljen e kostos së shërbimit të transportit dhe respektuar parimin e ekonomicitetit) me nga 18,000 lekë/rruga, pasi nuk e justifikon ngarkesa prej 510 kg e cila është e vogël, edhe për një rrugë si dhe nuk justifikohet me këtë distance të shkurtër nga rruga “Siri Kodra” deri tek rruga “Hamdi Pepa”, nënvizon raporti i KLSH. Shpenzimi për qiramarrje mjeti transporti prej 72,000 lekë ka qene jo efektiv, jo i argumentuar dhe i pa nevojshëm, pasi DRAKU Tiranë disponon 10 automjete e veta. “Kjo do të thotë se janë shpenzuar 72,000 lekë, ndërkohë që ky shpenzim mund të ishte shmangur nga DRAKU Tirane, duke e kryer transportin me mjetet e veta”, konkludon KLSH.

Por, jo vetëm kaq, dokumentacioni i kësaj praktike pagese paraqet mangësi. “Procesverbali datë 03.07.2019 i komisionit  (krijuar sipas  urdhrit të drejtorit datë 03.07.2019 dhe tre punonjësve) nuk përcakton llojin dhe targën e automjetit si dhe kilometrat e pershkuara”, shkruhet më tej në këtë raport.

Perfundimisht, nuk ka pasur as konkurrencë ky shpenzim transporti dhe nuk është realizuar qëllimi i prokurimit, sepse ka fituar subjekti me vlerën e barabartë me fondin limit, madje dhe i paargumentuar ky fond.

Pangopësia e disa nëpunësve të këtij institucioni i ka çuar ata të abuzojnë edhe në një rast të tillë flagrant. Megjithëse është një rast qesharak për nga mënyra e realizimit dhe vlera, abuzimi me këto 720 mijë lekë, i përmbush elementët e kryerjes së disa veprave penale si “shpërdorim i detyrës”, “evazion fiskal”, “falsifikim dokumentesh”. (vijon)

KLSH ka kryer një  konktroll në Drejtorinë Rajonale të Autoritetit Kombëtar të Ushqimit Tiranë (DRAKU) për periudhën nga data 1 janar 2018 deri 30 dhjetor 2020. Nga kontrolli rezultojnë shkelje të rënda financiare, të Ligjit për ushqimin dhe vendimeve të qeverisë për kontrollin e cilësisë së produkteve ushqimore, duke mos mbrojtur interesin e konsumatorit.

 

Qendra Alert

alert.al/        

EKSKLUZIVE/ Raporti i KLSH: Morën gjoba nga DRAKU, vetëm 1 në 10 pagoi, një pjesë i shfuqizoi AKU

Drejtoria rajonale DRAKU nuk mbledh as 10% të gjobave që vendosin, madje një pjesë të

konsiderueshme i shfuqizojnë vetë. Pra, nëse tregton ushqime të rrezikshme për shëndetin e konsumatorit dhe kapet në shkelje, risku për tregtarin është i vlogël, si pasojë e mungesës së ndëshkimit.

Auditimi i kryer nga KLSH, raportin e të cilit, Qendra Alert* e diponon, zbulon se niveli i arkëtimit të këtyre gjobave është fare i papërfillshëm.

Kështu, për vitin 2018 janë vendosur 380 gjoba në vlerën 91,100,000 lekë, nga të cilat janë shfuqizuar 800,000 lekë, pra detyrimi është 90,300,000 lekë. Nga këto janë arkëtuar vetëm 51 gjoba në vlerën 6,934,000 lekë, ose rreth 8% të totalit të tyre.

Për vitin 2019 niveli i arkëtimit është skandaloz. Janë vendosur 193 gjoba në vlerën 131,920,000 lekë, nga të cilat është shfuqizuar 1 gjobë në vlerën 1,000,000 lekë, pra detyrimi është 130,920,000 lekë. Nga këto janë arkëtuar vetëm 12 gjoba në vlerën 1,840,000 lekë, ose 1.3%.

Ndërkaq, vitin 2020 janë vendosur 76 gjoba. Pra shumë më pak se viti paraardhës, megjithatë në vlerë ato mbeten përafërsisht sa viti i kaluar, 13,280,000 lekë. Nga këto janë shfuqizuar 1,700,000 lekë, pra detyrimi është 11,580,000 lekë. Arkëtimi si numër gjobash vijon të jetë më i ulët se viti parardhës. Janë arkëtuar vetëm 12 gjoba në vlerën 1,170,000 lekë, ose 10% e totalit të arkëtueshëm.

Pra, sa më sipër, rezulton se niveli i arkëtimit të gjobave të vendosura brenda vitit ushtrimor, është shumë i ulët.  Sipas raportit të auditimit “kjo tregon për mungesë efektiviteti të DRAKU-së Tiranë si dhe të DPAKU, në marrjen e masave për ekzekutimin e gjobave të vendosura”. (Vijon)

* KLSH ka kryer një  konktroll në Drejtorinë Rajonale të Autoritetit Kombëtar të Ushqimit Tiranë (DRAKU) për periudhën nga data 1 janar 2018 deri 30 dhjetor 2020. Nga kontrolli rezultojnë shkelje të rënda financiare, të Ligjit për ushqimin dhe vendimeve të qeverisë për kontrollin e cilësisë së produkteve ushqimore, duke mos mbrojtur interesin e konsumatorit.

Qendra Alert

alert.al/

Pesticide mbi normën tek pjeshkët dhe perimet? AKU merr 25 mostra për analizë

Në të gjithë vendin u morën dje 25 mostra për analizimin e pesticideve përkatësisht: domate, shalqinj, tranguj, pjeper, pjeshka, sallatë jeshile, karrote etj., njoftoi Autoriteti Kombëtar i Ushqimit. Drejtoritë Rajonale të AKU- së kanë ushtruar veprimtarinë e tyre në bazë të planit vjetor të inspektimit me bazë risku dhe mbi bazën e denoncimeve të ardhura nga qytetarët. AKU ka kryer 151 kontrolle zyrtare dhe monitorime brenda ditës në të gjithë vendin

Gjatë kontrolleve zyrtare në operatorët e biznesit ushqimor janë dhënë 23 masa me paralajmërim. Këto masa janë dhënë për shkak se nuk është kryer rinovim i librezës shëndetësore të personelit, ambienti është i pa sistemuar, përdoret ujë i pa analizuar dhe për mosrealizim te detyrave te lëna ne inspektimet e mëparshme.

Janë lënë detyra për operatorët e biznesit ushqimor për përmbushjen e detyrimeve të tyre përkundrejt bazës ligjore dhe garantimit të sigurisë ushqimore.

alert.al/

Mungesa e hekurit shkakton anemi, ja ushqimet me përmbajtjen më të lartë

Mungesa e hekurit është një simptomë që nuk duhet anashkaluar, pasi tek fëmijët shoqërohet me zhvillim të zvogëluar mendor dhe fizik, performancë të dobët në shkollë dhe sistem të dobët imunitar, ndërsa të rriturit kanë si shenja uljen e produktivitetit dhe lodhjen.

Sipas një studimi të fundit në vendin fqinjë Greqia, vlerësohet se një në katër gra në moshë riprodhuese dhe një në tre fëmijë të shkollës fillore shfaqin mungesë hekuri, pra nivele të ulëta hekuri në trup.

Mungesa e hekurit është për shkak të uljes së marrjes së ushqimeve që e përmbajnë dhe, nëse nuk trajtohet, mund të zhvillohet në anemi të mungesës së hekurit.

Marrja adekuate e hekurit që në vitet e para të jetës së një personi, përmes ushqimeve të tilla si mishi dhe peshku, është thelbësore për të parandaluar mungesën e tij.

Në mënyrë që të asimiloni siç duhet hekurin në trup, duhet të konsumoni ushqime të pasura me hekur me vitaminë C (nga ushqime të tilla si lëng portokalli, domate, lakër jeshile, mandarina, kivi dhe luleshtrydhe).

Ju gjithashtu mund të merrni shumë hekur nga ushqimet e përpunuara, të tilla si drithërat në mëngjes dhe qumështi.

Më të pasurat me hekur janë këto ushqime: Mish, mëlçia, fileto viçi, otktapod, kallamar, drithera, speci, domatja, etj.

Qendra Alert

alert.al/