Menu

Kryesore

Zbardhet vrasja në Bubq/ Jetonin në Tiranë, si e vrau kameramani gruan e tij në oborrin e stallës së lopëve

Zbardhet ngjarja e rëndë që ndodhi sot në Bubq, ku një burrë vrau me thikë bashkëshorten e tij dhe tentoi të vetëvritej. Ngjarja ndodhi në orën 10:45, në një magazinë në Bubq të Krujës.

Autori i dyshuar i krimit, 51-vjecari Artan Ismalaj, me profesion kameraman, teksa ishte në mjetin e tij tip “Ford” bashkë me gruan, Klaritën, 45 vjeçe, në rrethana ende të paqarta kanë hyrë brenda në magazinë.

Sipas policisë, çifti ka hyrë brenda territorit të objektit duke ndjekur një kamion, i cili është futur për të shkarkuar ushqim për lopët, pasi magazina është stalle lopësh. Ndërkohë, të paqarta janë motivet pasi policia e Krujës deklaron se nuk kanë asnjë dijeni pasi çifti prej vitesh jetonte në Tiranë. Mësohet se çifti në fjalë ka në pronësi të tyre një dyqan pranë fakultetit të Inxhinierisë.

“Fillimisht mendova se ishin në momente intime, dhe u afrova për t’i larguar, por më pas pash viktimën të mbuluar me gjak, atëherë njoftova policinë” – kështu është shprehur punonjësi i sigurisë në dëshminë e tij për policinë, lidhur me krimin e ndodhur mesditën e sotme në fshatin Bubq të Krujës.

Ka qenë pikërisht roja i magazinës që ka njoftuar policinë, pasi ka pikasur makinën tip ‘Ford”, në të cilën 51 vjecari Artan Ismalaja qëlloi për vdekje me thikë bashkëshorten e tij, 45-vjecare Klarita. “U afrova për t’i larguar” mësohet të jetë shprehur ai.

Po ashtu nga pohimet e familjarëve të tyre, mësohet se çifti nuk ka pasur probleme. Aktualisht 51-vjeçari ndodhet në spital, në gjendje të rëndë për jetën, pasi goditi disa herë me thikë edhe veten.

alert.al/

Kryebashkiaku Veliaj dhe homologu hungarez Karácsony përurojnë në Budapest bustin e Skënderbeut: “Përtej zhurmës dhe historisë, janë veprat ato që mbeten”

Kryetari i Bashkisë së Tiranës Erion Veliaj përuroi sot së bashku me homologun e tij të Budapestit, Gergely Karácsony, bustin e heroit tonë Kombëtar, Gjergj Kastriot Skënderbeu. Një dhuratë nga Bashkia Tiranë për qytetin e Budapestit, që është vendosur përballë bustit të bashkëkohësit të tij, heroit të Hungarisë, Janosh Huniadit.
Veliaj e cilësoi këtë të sotmen një ditë të shkëlqyer për marrëdhëniet mes Hungarisë dhe Shqipërisë.

“Një ditë e mirë për marrëdhëniet mes dy vendeve. Kombet që nuk dinë nga kanë ardhur, nuk dinë as se ku po shkojnë. Në finale, përtej zhurmës dhe historisë, janë veprat ato që mbeten. Sfida për gjeneratën tonë është të lëmë vepra, të mos merremi me llafe, të mos i bëjmë stërkëmbësha njeri-tjetrit, mos të pengojmë progresin por të lëmë pas diçka që do të mbetet. Është dashur 20 vite për të mbërritur te kjo ditë. Një iniciativë që ka nisur që në kohën e Edi Ramës në Bashkinë e Tiranës me kryetarin e Bashkisë së Budapestit atëherë. Më vjen mirë që Bashkia e Tiranës e lë një vepër që do të mbetet këtu në Budapest”, u shpreh Veliaj.

alert.al/

Pezullohen nga detyra prokurorët Edmond Karriqi dhe Maksim Sota, ja kush e merr drejtimin në Prokurorinë e Kukësit

Me 10 vota pro (në mungesë të anëtares Esmeralda Keshi), KLP pezullon nga detyra prokurorët Edmond Karriqi dhe Maksim Sota për shkak të masës së sigurisë personale “arrest me burg”, respektivisht “arrest në shtëpi”, vendosur nga Gjykata e Posaçme Kundër Korrupsionit dhe Krimit të Organizuar.

Pezullimi zgjat deri në rënien e shkakut për të cilin është vendosur, sikundër kundër këtij vendimi mund të bëhet ankim në Gjykatën Administrative të Apelit.

Përse akuzohet prokurori Sota?

Prokurori Maksim Sota u vu në pranga në kuadër të operacionit “Shpirti”. Ai akuzohet për shpërdorim detyre dhe sipas dosjes së prokurorisë, Sota kishte jetuar dhe në një shtëpi me një nga trafikantët e prangosur si dhe ka ndihmuar kreun e grupit, Ilirjan Ducellarin (Zaimi), që të eliminonte problemet me drejtësinë. Vetë prokurori ka ka mohuar përfshirjen e tij në grupin e strukturuar kriminal në fushën e trafikimit të lëndëve narkotike.

Sipas dosjes, roli i supozuar i prokurorit Maksim Sota rezulton nga deklarimet e bashkëpunëtorëve të drejtësisë Donial Droli dhe Maringlen Shusha, sipas të cilëve drejtuesi i grupit kriminal shqiptar Ilirjan Duçellari (Zaimi), arrestuar në Shqipëri në korrik 2020, kishte lidhje me prokurorin, madje i kishte siguruar një shtëpi me qira të cilën e paguante trafikanti, kur Maksim Sota jetonte bashkë me Maringlen Shushaj. Megjitjatë, ai i ka mohuar këto akuza duke thënë se ka jetuar te shtëpia e vëllait të tij në Vlorë. Mbi bazën e këtyre dëshmive, u krijua dyshimi për “infiltrimin e grupit kriminal në radhët e përfaqësuesve që ushtrojnë ndjekjen penale në emër të Shtetit me pasojë të drejtpërdrejtë vështirësi dhe pengesa shtesë në drejtim të parandalimit dhe luftimit të këtyre veprimtarive kriminale”. Gjykata mbi këto elemente ka bazuar akuzat ndaj prokurorit Maksim Sota për shpërdorim detyre.

Prokurori Kariqi

Gjykata e Posaçme Kundër Krimit të Organizuar dhe Korrupsionit dërgoi në qeli prokurorin e Kavajës, Edmond Karriqi, nën akuzë për korrupsion së bashku me shoferin Isuf Gega, që konsiderohet nga SPAK si personi që negocioi për të liruar pesë persona, të cilët u arrestuan nga policia me 4.5 gramë kanabis.

SPAK këmbëngul se dy të kërkuarit e tjerë Emrijan Dedja dhe Dritan Dedja komunikuan në telefon e më tej zhvilluan takime në qytetin e Kavajës, ku u fol për pagesën. Madje një kamera sigurie në një qendre tregtare tregon se si Dedja u paraqit ne një ‘exchange’ dhe konvertoi rreth 2 mijë euro. Pas ketij takimi, Dedja telefonon të atin duke e qetësuar e duke i thënë se pagesa u krye dhe se ai duhej të qetësohej pasi i vëllai do të dilte sa më shpejt.

Lita në vend të Kariqit

Për shkak të pezullimit nga detyra të prokurorit Edmond Karriqi, prokuror në Prokurorinë pranë Gjykatës së Shkallës së Parë Lushnje, i caktuar përkohësisht si Drejtues në Prokurorinë pranë Gjykatës së Shkallës së Parë Kukës, Këshilli vendosi transferimin përkohësisht, me pëlqimin e tij, të z. Xhevahir Lita, prokuror në Prokurorinë pranë Gjykatës së Shkallës së Parë Tiranë, në Prokurorinë pranë Gjykatës së Shkallës së Parë Kukës, i cili do të ushtrojë detyrën si prokuror në Prokurorinë pranë Gjykatës  së Shkallës së Parë Kukës, përkohësisht  nga data 05.07.2021 – 04.01.2022.

Gjithashtu, me propozim të Komisionit të Zhvillimit të Karrierës, Këshilli vendosi me votë unanime, që prokurori Xhevahir Lita të caktohet përkohësisht të ushtrojë edhe funksionin e Drejtuesit të Prokurorisë pranë Gjykatës së Shkallës së Parë Kukës, për një afat tremujor, nga data 05.07.2021 – 04.10.2021, pasi ai i plotëson kushtet e përcaktuara në ligj dhe në Rregulloren përkatëse të Këshillit.

alert.al/

Del ekspertiza e ISHTI, shpërthimi në hotelin Enriko, "gabim njerëzor, bombola ishte lënë hapur gjatë natës"

Del ekspertiza e shpërthimit te bombolave të gazit në Hotel “Enriko” me pronar Arben Gjoka në Velipojë, ku mbetën 4 familjarët të plagosur nga djegiet. Sipas ISHTI, shkaku i zjarrit është një gabim njerëzor, pra është lënë bombola hapur dhe shpërthimi erdhi nga rrjedhja e gazit të lëngshëm.

Njoftimi nga Inspektorati Shtetëror Teknik dhe Industrial:

Në zbatim të Ligjit 10 433 datë 16.06.2011, “Për Inspektimin në Republikën e Shqipërisë” dhe Ligjit 32/2016 “Për Garantimin e Sigurisë së Punës të Pajisjeve dhe Instalimeve Nën Presion”, lidhur me ngjarjen e ndodhur në fshatin Pulaj, rrugës hyrëse Sektor- Vilun, Velipojë, Shkodër, ju informojmë si më poshtë: Më dt 04.07.2021 rreth orës 08.00 të mëngjesit është marrë informacioni se në Hotel “Enriko” me pronar Arben Gjoka me adresë në fshatin Pulaj, rruga hyrëse Sektor-Vilun, Velipojë, Shkodër ka pasur shpërthim dhe zjarr me pasoja dhe dëmtime të rënda të objektit si dhe familjarëve që kanë në pronësi objektin.

Grupi i punës i përbërë nga inspektorët e sektorit Verior të Drejtorisë së Inspektimit të Enëve nën Presion pranë ISHTI është paraqitur në vendngjarje dhe kanë konstatuar se ngjarja ka ndodhur në një objekt me 3 kate që ka shërbyer si hotel sezonal per periudhën e verës. Shpërthimi dhe zjarri kanë ndodhur në katin e parë të objektit në pjesen jugore të tij në një ambient të mbyllur që dyshohet se ka shërbyer si magazinë ose ambient shërbimi për familjarët. Në pjesën e jashme të objektit janë gjetur 6 bombola gazi kampingu 3 – 5 kg të destinuara për përdorim në ambient të jashtëm dhe të hapur, me të dhëna të pa identifikueshme si pasojë e mbetjeve të zjarrit dhe blozës.

Bombolat nuk kanë pësuar shpërthim dhe nuk kanë dëmtime në trupin e tyre por vetëm efekte të jashtme të shkaktuara nga shtresat e tymit dhe blozës. Personeli PMNZSH Shkodër ka sqaruar se 6 bombolat janë gjetur në ambientet e brendshme dhe janë nxjerrë jashtë nga ana e tyre. Gjithashtu në pjesën e jashtme të objektit pranë murit rrethues në pjesën e pasme, gjendet një rezervuar gazi me kapacitet 1000 Litra i cili është i mbyllur dhe bosh. Dyshohet se ky rezervuar është përdorur për vënien në punë të kaldajave të ujit të ngrohtë në dhomat e hotelit gjatë sezonit të verës së kaluar.

Nisur nga kontrolli i objektit në fjalë dhe deklarimet e PMNZSH Shkodër, shpërthimi dhe zjarri dyshohet të ketë ndodhur nga rrjedhja e gazit G L N nga një nga bombolat e kampingut e cila mund të jetë lënë e hapur gjatë natës si pasojë e një gabimi njerezor. Sasia e gazit të rrjedhur dhe hermeticiteti i ambientit ka krijuar kushte për shpërthim dhe zjarr në prezencë të faktoreve të jashtëm si ndezja e dritave në këtë ambient ose përdorimi i burimeve të tjera të zjarrit nga pakujdesi njerëzore. Në prezencë të Inspektoreve të ISHTI është përgatitur nga ana PMNZSH Shkodër akti i konstatimit nga ky Institucion si dhe nga ana e përfaqësuesve të Prokurorisë së rrethit Shkodër është përgatitur Procesverbali i këqyrjes të vendit të ngjarjes.

alert.al/

"Ristrukturim" në Policinë e Shtetit, drejtorët që ndërrojnë vendet me njëri tjetrin, ja emërimet zyrtare

Siç edhe u paralajmërua nga mbledhja e fundit e kryepolicit Ardi Veliu me të gjithë strukturën blu, janë bërë ndryshime në kupolën e Policisë së Shtetit. Gjovalin Loka, i cili u lirua nga detyra si drejtori i Sigurisë Publike, një javë më parë, është emëruar drejtor i Policisë së Elbasanit. Mësohet se Edmont Targaj eshte drejtor i policisë Berat.

Ndërsa, Drejtori i Policisë Kukës Erigert Mitri, është liruar nga detyra dhe vendin e tij e ka marrë Hamdi Fiore. Eshtë shkarkuar drejtori i Policisë Shkodër, Niko Brahmaj, ku janë regjistruar një numër shumë i lartë vrasjesh, dhe në vend të tij shkon Nëndrejtori i Policisë së Gjirokastrës, Skënder Hita.

NJOFTIMI I POLICISE
Ndryshime në nivel drejtues në strukturat vendore të Policisë së Shtetit. Në kuadër të ristrukturimit për rritjen e forcës goditëse dhe parametrave të sigurisë në vend, Drejtori i Përgjithshëm i Policisë së Shtetit ka firmosur ndryshime në nivel vendor e qendror.

Zëvendësdrejtori i Drejtorisë Vendore të Policisë Gjirokastër Skënder Hita transferohet dhe emërohet Drejtor i Drejtorisë Vendore të Policisë Shkodër.

Drejtori i Drejtorisë Vendore të Policisë Fier Bledar Çeliku transferohet dhe emërohet Drejtor i Drejtorisë Vendore të Policisë Vlorë.

Drejtor i Drejtorisë Vendore të Policisë Korçë Ferdinant Mara transferohet dhe emërohet Drejtor i Drejtorisë Vendore të Policisë Fier.

Gjovalin Loka ish-Drejtori i Departamentit për Sigurinë emërohet Drejtor i Drejtorisë Vendore të Policisë Elbasan.

Drejtori i Drejtorisë Vendore të Policisë Durrës Lorenc Shehu transferohet dhe emërohet Drejtor i Drejtorisë Vendore të Policisë Lezhë.

Shefi i Komisariatit të Policisë Nr 2 në Tiranë Oltion Bistri transferohet dhe emërohet Drejtor i Drejtorisë Vendore të Policisë Durrës.

Ardian Çipa deri tani në Akademinë e Sigurisë transferohet dhe emërohet Drejtor i Drejtorisë Vendore të Policisë Korçë.

Hamdi Fjore deri tani zv.dr i DVP Korçë transferohet dhe emërohet drejtor i Drejtorisë Vendore të Policisë Kukës.

Edmond Tarkaj deri tani drejtor i Policisë Rrugore, transferohet dhe emërohet drejtor i Drejtorisë Vendore të Policisë Berat.

Dhimitraq Ziu deri tani zv.drejtor për sigurinë në DVP Tiranë , transferohet dhe emërohet Drejtor i Policisë Rrugore.

Luigj Vathi drejtor i Drejtorisë Vendore për Kufirin dhe Migracionin Vlorë deri tani transferohet dhe emërohet Zv.drejtor për sigurinë ne DVP Tiranë.

Neritan Nallbati deri tani drejtor i DVP Berat transferohet dhe emërohet Drejtor i Departamentit për Sigurinë në Drejtorinë e Përgjithshme të Policisë së Shtetit.

Drejtori i Drejtorisë Vendore të Policisë Shkodër Niko Brahimaj transferohet dhe emërohet Drejtor i Institutit të Policisë Shkencore.

Policia e Shtetit siguron qytetarët se është tërësisht e angazhuar për të luftuar maksimalisht krimin e organizuar dhe për të krijuar një ambient sa më të sigurt për qytetarët.

alert.al/

Kancelarja Angela Merkel, konferencë sot me liderët e Ballkanit Perëndimor

Kancelarja gjermane, Angela Merkel, pritet që sot të zhvillojë konferencën e saj të fundit me liderët e Ballkanit Perëndimor.

Takimi u paralajmërua ditën e djeshme nga vetë Merkel, e cila gjatë një konference tha se edhe pse takimi do të zhvillohet online, ajo është e gëzuar që do të vijojë bashkëpunimi me kryetarët e shteteve dhe qeverive nga gjashtë vendet e Ballkanit Perëndimor.

Merkel kujtoi ditën e djeshme përgjegjësinë e BE-së dhe të Gjermanisë ndaj Ballkanit Perëndimor, duke thënë se vendet e BP janë pjesë e Europës.

“Ballkani Perëndimor është një pjesë e Evropës, ku nuk janë shëruar ende plagët e luftrave të viteve 90-të, e dhunës ndër grupet etnike. Por: Në Gjermani jetojnë edhe shumë shtetas, që i kanë rrënjët e tyre në vendet e Ballkanit Perëndimor, kujtoi kancelarja Angela Merkel.

“Për mua është mëse e qartë: Ne, shtetet anëtare të BE-së, jemi shumë të interesuara për një zhvillim paqësor dhe të mirë të Ballkanit Perëndimor. Dhe ne kemi një përgjegjësi që të angazhohemi faktikisht për këtë“, shtoi Merkel ditën e djeshme.

alert.al/

U arrestua nga operacioni "Shpirti", prokurori Maksim Sota sot në KLP, pritet pezullimi nga detyra

Këshilli i Lartë i Prokurorisë do të vendosë sot për prokurorin e Vlorës, Maksim Sota, i cili ndodhet në masën “arrest shtëpie”, pas operacionit të koduar “Shpirti”. KLP është njohur me vendimin e Prokurorisë së Posaçme dhe sot pritet që të pezullojë Sotën, deri në përfundim të hetimeve, ashtu siç e parashikon ligji. Ka qenë vetë Sota, ai i cili ka paraqitur kërkesë në KLP për pezullimin e tij nga ushtrimi i detyrës, pasi konstatoi se është subjekt i një procedimi penal dhe këtë herë jo si prokuror, por si person nën hetim.

Dosja

Prokurori Maksim Sota u vu në pranga në kuadër të operacionit “Shpirti”. Ai akuzohet për shpërdorim detyre dhe sipas dosjes së prokurorisë, Sota kishte jetuar dhe në një shtëpi me një nga trafikantët e prangosur si dhe ka ndihmuar kreun e grupit, Ilirjan Ducellarin (Zaimi), që të eliminonte problemet me drejtësinë. Vetë prokurori ka ka mohuar përfshirjen e tij në grupin e strukturuar kriminal në fushën e trafikimit të lëndëve narkotike.

Sipas dosjes, roli i supozuar i prokurorit Maksim Sota rezulton nga deklarimet e bashkëpunëtorëve të drejtësisë Donial Droli dhe Maringlen Shusha, sipas të cilëve drejtuesi i grupit kriminal shqiptar Ilirjan Duçellari (Zaimi), arrestuar në Shqipëri në korrik 2020, kishte lidhje me prokurorin, madje i kishte siguruar një shtëpi me qira të cilën e paguante trafikanti, kur Maksim Sota jetonte bashkë me Maringlen Shushaj. Megjitjatë, ai i ka mohuar këto akuza duke thënë se ka jetuar te shtëpia e vëllait të tij në Vlorë. Mbi bazën e këtyre dëshmive, u krijua dyshimi për “infiltrimin e grupit kriminal në radhët e përfaqësuesve që ushtrojnë ndjekjen penale në emër të Shtetit me pasojë të drejtpërdrejtë vështirësi dhe pengesa shtesë në drejtim të parandalimit dhe luftimit të këtyre veprimtarive kriminale”. Gjykata mbi këto elemente ka bazuar akuzat ndaj prokurorit Maksim Sota për shpërdorim detyre.

I njëjti grup i ka paguar edhe shtëpinë ku ka qëndruar me familjen në Romë të Italisë ku kanë kuruar fëmijën e tyre të sëmurë. Sota ka qenë kandidat për t’u bërë pjesëtar i SPAK, por nuk arriti ta realizonte ëndrrën e tij, përkundrazi është prangosur nga ky institucion.

Ai vu në krye të të Prokurorisë së Vlorës në vitin 2010 dhe ka qëndruar aty deri në vitin 2019. Prokuroi Sota ende nuk e ka kaluar vettingun. Ai po hetohej prej viti, por ende nuk ka dalë në seancë dëgjimore, pasi në 2019 u shkëput me leje të KPK-së për t’u kthyer sërish në 2020-ën.

alert.al/

Të penduarit/ Kush janë dy skafistët Ferhat Ajdini dhe Fiqiret Seferi që fundosën nënkomisarin e Policisë

Në 21 dhjetor 2016, DIA në Bari në bashkëpunim me ushtarakët e Repartit Detar të Guardia di Finanza në Bari, sekuestronte 1.016,40 kg marijuana dhe arrestonte në flagrance, Ferhat Ajdini e Fiqiret Seferi të kapur në bordin e një mjeti lundrues që vinte nga Shqipëria.

Pikërisht këta dy persona më vonë do të ktheheshin në bashkëpunëtorët e drejtësisë, që momentalisht thuhet se janë 4 të tillë, por në fakt janë më shumë se kaq, pasi në listën e personave që kanë pranuar të tregojnë episodet e trafikimit të drogës, janë Aurel Lazaj, Mariglen Shusha, Elton Hamzai dhe Donial Drolli.

Bisedat e shumta të përgjuara, ndarja e roleve, figurat kryesore të individualizuara në personin e Mariglen Shusha e Fiqiret Seferi e Ferhat Ajdini, bëjnë të qartë ekzistencën e dy organizatave me lidhje të qëndrueshme në territorin shqiptar, vend i origjinës të shumë personave anëtarë të saj, ku krerët organizues shkojnë me rregullsi.

Nga bisedat telefonike të përgjuara nga DIA në Bari është e qartë që të hetuarit, edhe nga territori shqiptar, koordinojnë edhe japin urdhra operative anëtarëve të saj, të cilët shpesh kërkojnë edhe prezencën e tyre fizike për zgjidhjen e problemeve operative, zakonisht në lidhje me rikuperimin e shumave të lekëve me prejardhje dhënien e sasive të lëndës në detaj në zona të ndryshme të jugut të Italisë, ashtu si është treguar në çdo aktakuzë.

Vazhdimësia, për një gjatësi kohore të rëndësishme për gjithë vitin 2016, të kontakteve organizuese të qëndrueshme ndërmjet anëtarëve, sasitë shumë të mëdha të lëndës narkotike herë pas here të konfiskuar dy organizatave, kapaciteti për të ndikuar edhe në dhunë ndaj atyre që nuk plotësonin detyrimet personale ekonomike ndaj furnizuesve, bën këtë të thuhet që ekziston një prezencë kriminale tashmë e qëndrueshme në territorin italian, me baza logjistike në Bari e në provincë (Bari, Gravina e Rutigliano) të njohura dhe të besueshme për anëtarët e grupit të organizuar, ku perceptohet në mënyrë të qartë edhe ndërgjegjshmëria që veprohet brenda një grupi stabël dhe të organizuar, me subjekte që kanë role kryesore organizuese dhe subjekte të dedikuara magazinimit dhe transportimit të sasive që do të shpërndahen në gjithë jugun e Italisë.

Një nga bashkëpunëtorët e drejtësisë që ka treguar veprimet kriminale të një episodi të trafikut të drogës është, Aurel Lazaj.

Ai ka pohuar në gjykatë se për një sasi të madhe droge, por që në fakt, droga kishte kaluar me sukses nga porti i Durrësit, por u bllokua në Ancona nga Italianët.

Dëshmitari i mbrojtur ka dëshmuar në Tiranë, për trafikimin e 2.5 tonë hashash që u bllokua në Ancona fillim vitin e 2017-ës.

“…ngarkesën e fshehëm në kamionin e ngarkuar me peletë dhe e nisëm nga Porti i Durrësit. Unë nuk i njoh doganierët që bashkëpunuan, por di të them që drogën do ta priste në Gjermani Ermir Hoti”-ka treguar dëshmitari.

Ai shpjegoi se plani nuk shkoi si duhet dhe për pasojë lindën problem, për grupin.

“…kamioni u bllokua në Ankona. Nuk po arrinim ta zhbllokonim, për mungesë dokumentacioni.

Ndaj u vendos që të nisnim një kamion të dytë. Drejt Italisë u nis Demo Progonati. Me të mbërritur atje, Progonati i dorëzoi dokumentet Dhimo Korajt, i cili arriti të ndërronte targat e kamionëve për t’ju shmangur kontrollit dhe arriti ta merrte ngarkesën”-ka treguar dëshmitari.

Ai tha se pavarësisht përpjekjeve të tyre, policia italiane sërisht ka mundur ta bllokojë drogën.

“…Unë u ktheva në Shqipëri dhe anëtarët e grupit dyshuan, se i kisha tradhtuar. Më morën peng tri ditë. Më mbajtën të lidhur këmbë e duar në një fshat në Fushë Krujë…”-ka treguar Lazaj.

Pasi mundi të shpëtonte ai tentoi të zhdukej pa gjurmë, por telefonoi e tradhtoi dhe përfundoi në prangat e policisë.

Mes shumë dilemash, ai vendosi të bashkëpunonte me drejtësinë.

E për herë të parë në sallën e gjyqit, rrëfeu se që prej viti 2011, vepronte për llogari të ish oficerit të policisë Festim Lelaj, duke trafikuar drogë. “…për çdo ngarkesë që nisej nga Porti i Vlorës…, tregoi Lazaj “…paguhesha nga 400 apo 500 euro…”.

 

(VIDEO) Aksidenti në Lezhë, informacioni i policisë: Katër të plagosur, mes tyre një fëmijë

Detaje të reja për aksidentin në Lezhë. 4 makina janë përplasur me njëra-tjetrën, duke lënë 4 të plagosur, mes tyre edhe fëmijë. Kjo ngjarje e rëndë është regjistruar pasditen e kësaj të shtunë në autostradën Lezhë-Milot, pranë fshatit Mabë.

Këto janë pamje nga vendi i ngjarjes ku shihet që përplasja ka qenë shumë e fortë, por nuk dihen ende gjendja të plagosurve. Ato janë dërguar me urgjencë në spital. Nuk dihen shkaqet e këtij aksidenti, por kjo ngjarje ka shkaktuar trafik të rënduar në këtë aks.

Njoftimi paraprak i Policisë

“Rreth orës 17:25, në aksin rrugor Shkodër-Lezhë, në fshatin Mabë, ka ndodhur një përplasje automjetesh ,ku për pasojë kanë marrë dëmtime 4 shtetas, të cilët janë transportuar në spitalin Rajonal Shkodër dhe Lezhë. Grupi hetimor ndodhet në vendngjarje dhe po punon për sqarimin e plotë të shkakut dhe rrethanave të ngjarjes”, njofton policia.

 

(VIDEO) "Piloti" me 161 km/orë në Fier-Vlorë, arrestohet shoferi me patentë angleze false

Vijon aksioni i policisë së Shtetit nëpër rrugët e vendit për të bërë të mundur parandalimin e aksidenteve të mundshme rrugore. Janë vendosur mijëra gjoba dhe janë hequr dhjetëra patenta. Të rinj që lëvizin me shpejtësi “skëterrë” dhe në efektin e alkoolit.

Njoftimi i policisë

STOP drejtimit të mjetit nën efektin e alkoolit apo në gjendje të dehur dhe shpejtësisë vrastare të jetës në rrugë, respektoni rregullat e qarkullimit, për të mbrojtur jetën tuaj dhe të përdoruesve të tjerë të rrugës.

Policia Rrugore në të gjithë vendin, vijon kontrollet e pandërprera në të gjitha akset rrugore, nacionale dhe në qendrat urbane, me qëllim parandalimin e aksidenteve rrugore.

Si rezultat i rritjes së besimit të qytetarëve te Policia dhe falë reagimit të menjëhershëm të shërbimeve të Policisë Rrugore të Tiranës, u bë e mundur konstatimi dhe parandalimi i ndonje ngjarjeje të mundshme rrugore me pasoja për jetën, ku pas disa telefonatave të qyetarëve të ardhura në sallën operative të DVP Tiranë, se një mjet luksoz në rrugën interurbane Durrës-Tiranë, qarkullonte me shpejtësi të madhe dhe kryente manovra të rrezikshme në rrugë, shërbimet e Policisë Rrugore të Tiranës, kanë bërë të mundur bllokimin e automjetit dhe pas testimit të alkoolit rezultoi se drejtuesi i mjetit, shtetasi  J.V., 27 vjeç, drejtonte mjetin në gjëndje të dehur në masën 0.81/mg/l, i cili u arrestua në flagrancë dhe u ndëshkua edhe me masë administrative me 30.000 lekë te reja si dhe ju pezullua leja e drejtimit për një periudhë 20 mujore.

Ndërkohë në rrugën interurbane Tiranë -Elbasan, janë evidentuar nga radari  shpejtësi qe varionin nga 158 km/orë deri në 175 km/orë.

Ndërsa në rrugën intreurbane Fier – Vlorë, nga  njësia Operacionale e Policisë Rrugore është konstatuar një drejtues mjeti që drejtonte mjetin me shpejtësi 136 km/orë dhe drejtonte mjetin me patentë të pezulluar për pije alkoolike dhe përdorte një patentë angleze të falsifikuar. Drejtuesit të mjetit tip “Ford Focus”,  shtetasit K. S., 25 vjeç, banues në Tiranë, iu hoq patenta përfundimisht si dhe u procedua penalisht për falsifikim të dokumentave.

Gjithashtu, gjatë 24 orëve të fundit, janë arrestuar në flagrancë 14 drejtues mjetesh, nga të cilët 8 për drejtim mjeti në gjëndje të dehur dhe 6 për drejtim mjeti pa leje drejtimi.

Janë pezulluar 66 leje drejtimi, nga të cilat 48 për drejtim mjeti me shpejtësi tej normave të lejuara dhe 18 për drejtim mjeti nën efektin e alkoolit apo në gjëndje të dehur.

Gjithashtu, janë ndëshkuar me masë administrative 2356 drejtues mjetesh, për shkelje të Kodit Rrugor që përbëjnë rrezik potencial për përfshirje në ngjarje rrugore, konkretisht për parakalime të gabuara, shpejtësi mbi normat e lejuara, përdorim të celularit gjatë drejtimit të mjetit, mosrespektim të semaforit, mospërdorim të kaskës mbrojtëse dhe mosvendosje të rripit të sigurimit, si dhe për mosrregullim shpejtësie dhe manovra të rrezikshme në rrugë.

Policia Rrugore, apelon për të gjithë përdoruesit e rrugës në tërësi, veçanërisht drejtuesit e mjeteve, motomjeteve dhe çiklistët, që të tregojnë kujdes dhe të respektojnë rregullat e qarkullimit rrugor, si dhe fton qytetarët që të denoncojnë në Komisariatin Dixhital dhe në numrin e emergjencave 112, çdo paligjshmëri.