Menu

Teknologji

Këto maska kineze me standard të çertifikuar KN95 nuk iu mbrojnë

Maska për fytyrën me standard të çertifikuar KN95 mund të zbulojë dhe filtrojë deri në 95% të ndotësve nga ajri juaj. Ato janë shumë të kërkuara në treg posaçërisht prej këtyre vetive të cilat filtrojnë sa më shumë grimca të jetë e mundur për t’iu dhënë mbrojtje maksimale. Ato kanë një përdorim të gjerë, të tillë si për mbrojtje nga pluhuri, nga mikrobet, nga ndotësit e ajrit dhe natyrisht nga koronavirusi.

Por, ndërkohë, në sistemin e alerteve të Komisionit Europian për produkte jo-ushqimore janë publikuar maska të cilat mbajnë një emërtim të tillë por realisht nuk mbrojnë.  Kështu sipas verifikimeve paraprake ka rezultuar që për maskat e markës UNINOPE të prodhuara në Republikwn Popullore të Kinës  ‘mbajtja e grimcave/filtrit të materialit është e pamjaftueshme (vlerat e matura: deri në 62%). Rrjedhimisht, produkti nuk i plotëson kërkesat e shëndetit dhe sigurisë; kështu, edhe nëse kombinohet me masa të tjera të rekomanduara, mund të mos mbrojë siç duhet”. Sipas këtij publikimi ‘produkti nuk përputhet as me Rregulloren e Pajisjeve të Mbrojtjes Personale (PPE) dhe me standardin përkatës Evropian EN 149.

Denoncimi i bërë më së pari në Gjermani pohon që ky produkt i markës UNINOPE shitet më së shumti online me anë të faqes në internet të eBay dhe mund të identifikohet me kodin me numër:  #274871075226.

Autoritetet gjermane kanë urdhëruar tërheqjen e produktit nga tregu.

Burimi: Safety Gate 

Qendra Alert

alert.al

Efektet anësore të mbajtjes së maskave në shkollë

Guvernatori i Floridës, Ron deSantis, është një nga të paktën qeveritarë sot në botë që është kundër vendosjes së maskave në shkollë. Ai i ka bazuar argumentat e tij në besimin që prindërit janë ata që vendosin se çfarë është më e mirë për fëmijën. Gjithashtu deSantis ka shumë dyshime në lidhje me uljen e kurbës së Covid nga përdorimi i maskave. Po ashtu ai ka cituar dhe efektet negative të mbajtjes së maskave në shkollë: ‘ka efekte anësore shumë negative nga mbajtja e masked gjatë tetë orëve në ditë nga fëmijët, duke u bazuar në argumenta që kanë të bëjnë me zhvillimin e fëmijës, anës emocionale të tij, anës akademike si dhe nga pikëpamja mjekësore. Por shumë pak studime janë bërë për këtë gjë.

Sipas një studimi të bërë nga Universiteti Johns Hopkins ‘përdorimi i maskave mund të rrisë nivelet e dioksidit të karbonit në gjak’ dhe ‘mund të zhvillohen një sërë bakteresh patogjene nëse ka lagështirë dhe nëse maskat përdoren për një kohë të gjatë’. Studiues të tjerë kanë paralajmëruar për efektet negative përsa i përket komunikimit verbal dhe jo verbal. Madje ka edhe psikologë që pretendojnë që ‘vënia e maskës së fëmijëve përbën një abuzim psikologjik me to’.

Për studiuesit shkencorë është e provuar tashmë që vendosja e maskës te fëmijët mund të përbëjë një rrezik më të madh sesa vetë Covid-i. Por disa efekte anësore në lidhje me frymëmarrjen apo pengimin e frymëmarrjes nuk kanë baza shkencore dhe nuk mbështeten nga studiuesit. Ndërkohë që mbështeten argumentat që maska mund të shërbejë si një pengesë për socializimin në klasë.

Burimi: Yahoo Life

Qendra Alert

alert.al

Ruajini fëmijët nga ftalatet, të cilat gjenden në shumë pajisje shkollore

Muaji shtator njihet edhe si muaji i fillimit të shkollës, dhe pjesa më e bukur e fillimit të saj janë parapërgatitjet dhe blerjet e materialeve mësimore. Një nga pjesët më të rëndësishme, si për djemtë ashtu dhe për vajzat, është blerja e kuletës e cila mban lapsat apo stilolapsat që do të përdoren gjatë mësimit.

Autoritetet europiane kanë publikuar së fundmi informacione për rrezikun që paraqesin kuletat apo portofolat plastikë të prodhuar në Kinë për shëndetin e fëmijëve. Këto lloj produktesh janë gjerësisht të përhapur dhe në Shqipëri.

Bëhet fjalë për një këllëf shkolle me zinxhir, pa ndarës brenda dhe me ngjyrë të rozë më shkëlqim, por autoritetet njoftojnë që mund të ketë ngjyra të ndryshme. Zakonisht përdoret nga nxënësit e shkollës fillore si dhe adoleshentët.

Vetëm kjo pajisje e shkollës përmban disa elementë kimikë të tillë si di (2-etilheksil) ftalete (DEHP), vlera e matur e të cilit është deri në 7.8% të peshës. Ftalatet mund të dëmtojnë rëndë shëndetin e fëmijëve tuaj, duke ju shkaktuar dëmtim të organeve të riprodhimit.

Ftalatet janë kimikate të zakonshme, të cilat përdoren për ti bërë objektet plastike më të buta dhe më elastike. Ata gjenden në shumë produkte si ato kozmetike, të kujdesit për fëmijët e vegjël, materialet e ndërtimit, makina, materiale pastrimi dhe ato shkollore. Ftalatet përthithen nga lëkura dhe hyjnë në organizëm përmes frymëmarrjes. Ato njihen si lëndë që çrregullojnë veprimin e hormoneve të trupit.

Në mënyrë që të shmangni rrezikun e ftaleteve, të cilat gjenden kryesisht tek pajisjet plastike, zgjidhni kuleta të përbëra nga materiale të tjera të tilla si copë apo poliestër.

Burimi: Safety Gate

Qendra Alert

Alert.al

NASA llogarit datën në të cilën një asteroid mund do të godasë Tokën

Quhet asteroidi Bennu, dhe është një trup qiellor që i përket grupit Apollo, të asteriodeve që rrotullohen rreth Diellit, dhe që kanë orbitë të përafërt me atë të Tokës. Ata janë zbuluar në vitin 1999 dhe kanë marrë kaq shumë vëmendje për shkak të mundësisë që ai mund të godasë një ditë Tokën. Sipas një studimi të ri, asteroidi Benuu, me një diametër rreth 490 metra mund të përplaset me tokën. Sipas studimeve, fillimisht ai do të fillojë që të afrohet e Tokën rreth vitit 2135. Pas këtij momenti, gjërat do të ndërlikohen sepse varet sesi do të ndikojë forca e gravitetit e planetit tonë.

Sipas modeleve matematikore të vëna na zbatim, mundësia për përplasje rreth vitit 2300 është 1 në 1750 mundësi ose thënë ndryshe 0.057 %. Ndërkohë që data më e mundshme që mund të ndodhë shpërthimi është 24 shtator 2182 ku probabiliteti i goditjes është më i madh.

Megjithëse mundësitë që ky asteroid të përplaset me Tokën janë shumë të vogla, ai mbetet një nga asteroided më të rrezikshëm të sistemit tonë diellor. Në këtë mënyrë, orbita e tij po vazhdon të monitorohet në mënyrë të vazhdueshme nga NASA. Ashtu sic po monitorohet edhe orbita e një asteroidi tjetër 1950 DA, i cili i përket grupit Apollo, dhe që ka po ashtu mundësi që të përplaset një ditë në Tokë.

Burimi: Corriere della Sera

Qendra Alert

alert.al

Punonjësit e pavaksinuar të IKEA detyrohen të drekojnë jashtë

Një foto e punonjësve të IKEA në Piacenza të Italisë është bërë virale në median sociale për shkak të ndarjes së punonjësve, në punonjës që kanë pasaportën e gjelbër dhe të cilët janë të vaksinuar, dhe atyre që nuk janë të vaksinuar apo të cilët  nuk kanë një pasaportë të gjelbër.

Punonjësit që nuk zotëronin pasaportën e gjelbër, e cila tani është bërë e detyrueshme në shumë vende anëtare të BE, i ka detyruar ata që gjatë pushimit të drekës të drekojnë jashtë ambienteve të kompanisë IKEA dhe me tabakatë e ushqimit të vendosura përtokë.

Në fakt, në magazinën e gjigantit suedez, është vendosur që të ndalohet pushimi dhe konsumimi i ushqimit në hapësirat e kompanisë, përfshirë zonat e pushimit, për ata që nuk kanë një certifikatë vaksinimi.

Brenda ambienteve mund të konsumohet kafe, por nuk mund të ndaleni që ta pini aty. As për disa sekonda, as për një ngrënie super të shpejtë. Për më tepër, prej disa muajsh tashmë, çdo punonjës në mensë ka qenë i zënë me higjienizimin e vendit të tij të ushqimit.

Autoritetet italiane kanë imponuar pasaportën e gjelbër në vendet në të cilat ekziston një administratë, dhe kompania IKEA e ka zgjeruar këtë interpretim edhe për punonjësit e saj. Gjithashtu kompania ka zvogëluar kohën e aksesimit të mensës për punonjësit. Nëse më parë punonjësit mund të zgjidhnin kohën e pushimit të drekës nga ora 11:00 deri në 14:00, tani ata mund ta aksesojnë mensën vetëm në orarin 12:00 – 13:00. Sidoqoftë, menaxherët e logjistikës pranë kësaj kompanie kanë bërë të ditur se po organizojnë diçka më elastike dhe dinjitoze për punonjësit e saj. Po ashtu ata duan që të vendosin edhe qendra vaksinimi brenda pikave të tyre të shitjes.

Ditët e fundit, çështja e Pasaportave të Gjelbra dhe qasja në mensa ka shkaktuar debate jo vetëm me autoritetet që merren me kontrollin ndaj tyre, por edhe brenda vetë kompanive. Hanon, një kompani automobilistike koreane me qendër në Torino, u përfshi nga grevat e punonjësve pasi njoftoi që do të vendoste paraqitjen e Pasaportave të Gjelbra për të aksesuar mensën. Greva pushoi vetëm pasi kompania u tërhoq nga ky vendim. Ndërkohë që punonjësit e Electrolux në zonën e Trevisos janë shprehur që vendosja e mensës në ambientet e jashtme është një “shkelje serioze e rregullave të shëndetit dhe higjienës”.

Sindikatat kanë bëre thirrje për rregulla të qarta nga kompanitë dhe autoritetet duke kërcënuar me greva në rast të mosplotësimit të kushteve minimale në punë.

alert.al

BE: Të gjitha shishet, edhe ato plastike, duhet kthehen tek shitësit

Vendet e BE-së po miratojnë njëra pas tjetrës direktivën e Komisionit Europian për kufizimin e ambalazheve plastike dhe për riciklimin e tyre. Institucionet e BE-së dhe vendeve anëtare kanë vendosur që të ndalojnë praktikën e deritanishme me shishe të lëna kudo, kanaçe të hedhura në rrugë, si dhe një mjedis ujor dhe tokësor të ndotur plot me mbetje plastike, si dhe do të ndalojë edhe 9 artikuj plastik njëpërdorishëm, të tilla si pjatat, gotat apo lugët plastike.

Bëhet fjalë për një rikthim tek praktikat e vjetra të dikurshme, të kohës kur blerësit detyroheshin të kthenin shishet e qelqit të birrës, të qumështit apo të kosit. Drejt një praktike të tillë po shkojnë edhe vendet europiane, praktikë e cila pritet të hyjë në fuqi duke filluar që nga 1 janar 2022.

Direktiva merret kryesisht me paketimin dhe sidomos paketimin plastik. Nuk do të ketë një ndalim të shisheve plastike, por do të ketë një kontroll dhe grumbullim të rreptë të tyre. Ligje të caktuara të vendeve anëtare flasin edhe për stimuj dhe shpërblime ekonomike për shitësit me pakicë që do të përdorin këto metoda.

Deri tani është i njohur riciklimi i shisheve të qelqit, dhe madje në disa vende të zhvilluara riciklohet rreth 50% e shisheve plastike. Por direktiva e re europiane kërkon që të mbledhë të gjitha shishet plastike në mënyrë që ato të mos përhapen në mjedis. E njëjta gjë vlen dhe për paketimet dhe ambalazhet e tjera plastike, të tilla si qeset, përdorimi i të cilave do të jetë shumë i kufizuar. Sipas parashikimeve të Komisionit Europian, deri në vitin 2024 pritet që të riciklohen rreth 90 përqind e shisheve plastike në vendet e BE-së.

Burimi: EU Single-Use Plastics Directive

Qendra Alert

alert.al

‘Nuk jeni ‘lopë’ apo ‘kuaj’ që të përdorni këtë medikament kundër Covid-19’, rekomandon Agjencia Amerikane për Ushqimin dhe Barnat

Agjencia Amerikane për Ushqimin dhe Barnat (FDA), me anë të një twitter-i ironik, ka paralajmëruar pacientët që të mos përdorin trajtime të pa autorizuara apo të pa miratuara nga autoritetet shëndetësore. Megjithëse kjo agjenci është e ndërgjegjshme dhe mirëkuptuese që qytetarët janë të frikësuar nga Covid – 19, për shkak të numrit të lartë të vdekjeve që ky virus ka shkaktuar, sërish FDA ka paralajmëruar që përdorimi i medikamenteve të paautorizuara mund të rrezikojë rëndë jetën e tyre.

Në veçanti, Agjencia Amerikane për Ushqimin dhe Barnat i referohet medikamentit Ivermectin, i cili nuk është aprovuar si një mjekim që mund të përdoret për trajtimin apo parandalimin e Covid -19 tek njerëzit.

Deri tani tabletat Ivermectin janë miratuar në doza shumë specifike për disa krimba parazitë, dhe për parazitë të tjerë që qëndrojnë në lëkurë të tilla si rosacea. Sipas FDA, Ivermectin nuk është një anti-viral (një ilaç për trajtimin e viruseve). Marrja e dozave të mëdha të këtij ilaçi është e rrezikshme dhe mund të shkaktojë dëm serioz.

‘Asnjëherë mos përdorni për veten tuaj ilaçe të cilat janë të destinuara për kafshët. Përgatitjet e Ivermectin për kafshët janë shumë të ndryshme nga ato të miratuara për njerëzit’, shprehet Agjencia Amerikane për Ushqimin dhe Barnat në njoftimin e saj.

Sipas këtij njoftimi, FDA nuk ka rishikuar të dhëna për të mbështetur përdorimin e ivermectin në pacientët me COVID-19 apo për të trajtuar dhe parandaluar COVID-19; megjithatë, disa kërkime fillestare për përdorimin e tij janë duke u zhvilluar. Marrja e një ilaçi për përdorim pa u miratuar nga kjo agjenci  mund të jetë shumë e rrezikshme dhe kjo gjë është e vërtetë edhe për medikamentin ivermectin.

Agjencia gjithashtu shton që ka shumë informacione të pavërteta rreth këtij medikamenti, dhe ju mund të keni dëgjuar se është në rregull të merrni doza të mëdha të ivermektinës, por kjo gjë është e gabuar.

Edhe nivelet e ivermektinës për përdorime të miratuara mund të ndërveprojnë me ilaçe të tjera, si për shembull holluesit e gjakut. Ju gjithashtu mund të merrni një dozë më të madhe sesa nevojitet të ivermectin, i cili mund të shkaktojë të vjella, diarre, hipotension (presion të ulët të gjakut), reaksione alergjike (kruajtje dhe urtikarie), marramendje, ataksi (probleme me ekuilibrin), asfiksi, koma dhe madje edhe humbje të jetës.

Produktet Ivermectin për kafshët janë të ndryshme nga produktet Ivermectin për njerëzit

Së pari, medikamentet për kafshë shpesh janë shumë të koncentruara sepse përdoren për kafshë të mëdha si kuajt dhe lopët, të cilat mund të peshojnë shumë më tepër se ne – një ton ose më shumë. Doza të tilla të larta mund të jenë shumë toksike për njerëzit.

Për më tepër, FDA rishikon ilaçet, jo vetëm për sigurinë dhe efektivitetin e përbërësve aktivë, por edhe për përbërësit joaktivë. Shumë përbërës joaktivë që gjenden në produktet për kafshë nuk vlerësohen për përdorim te njerëzit. Ose ato përfshihen në një sasi shumë më të madhe sesa ato që përdoren tek njerëzit. Në disa raste, nuk dihet se si ata përbërës joaktivë do të ndikojnë në mënyrën se si ivermektina përthithet në trupin e njeriut.

Ndërkohë, FDA sugjeron që mënyrat më efektive për të parandaluar dhe kufizuar përhapjen e COVID-19 vazhdojnë të jenë: maska, të qëndroni të paktën 6 metra nga të tjerët që nuk jetojnë me ju, të lani duart shpesh dhe të shmangni turmat.

Burimi: Food & drug Administration

Qendra Alert

alert.al

BE ndalon karikuesit e telefonave të prodhuar në Kinë të markës JOYROOM

Hungaria ka ndaluar përdorimin e karikuesve të telefonit të markës JOYROOM të prodhuara në Kinë për shkak të rreziqeve që ata paraqesin për jetën e përdoruesve të tyre. Sipas përshkrimit të bërë për këtë produkt nga autoritetet hungareze ‘dimensionet e prizës elektrike janë shumë më të vogla se sa kërkohet. Izolimi i produktit është i papërshtatshëm. Përdoruesi mund të marrë një goditje elektrike nga pjesët e arritshme të drejtpërdrejta’.

Produkti është tërhequr edhe nga tregu europian për shkak se nuk është në përputhje me Direktivën Europiane të Voltazhit të Ulët si dhe rregulloreve të tjera shtesë të Komisionit Europian.

Modeli kinez, barkodi i të cilit është L-M226, nuk mendohet se është një produkt i falsifikuar, por thjesht ai nuk përmbush kriteret e sigurisë për konsumatorin.

Marka JOYROOM është një markë e përhapur edhe në Shqipëri dhe që shitet gjerësisht në tregje të hapura apo në pika të tjera shitjeje.

Jo të paktë kanë qenë aksidentet e ndryshme me mjetet e karikimit të telefonave të cilat shpeshherë kanë shkaktuar zjarre apo kanë marrë edhe jetën e njerëzve.

Përdorimi i kabllove ose karikuesve të dëmtuar ose karikimi aty ku ka lagështirë mund të shkaktojë zjarr, goditje elektrike, lëndime, ose dëmtim të telefonit apo sendeve të tjera.

Zakonisht kompanitë e mëdha telefonike bëjnë thirrje për të shmangur kontaktin e zgjatur të kabllos së karikimit dhe bashkuesit me lëkurën kur kablloja e karikimit është e lidhur me një burim rryme, sepse mund të shkaktojë shqetësime ose lëndime. Duhet shmangur fjetja ose ulja mbi kabllon e karikimit ose bashkuesin.

Gjatë procesit të karikimit, smartphoni dhe karikuesi mund të gjenerojnë nxehtësi. Megjithëse kjo gjë është normale, nëse telefoni nxehet tej normales gjatë karikimit, shkëputeni nga karikuesi dhe prisni që të ftohet. Më vonë mund të vazhdoni përsëri me karikimin. Por, nëse përsëri shihni që po krijohet nxehtësi e madhe atëherë duhet të mendoni për një karikues të ri, i cili të plotësojë kriteret për sigurinë e konsumatorëve.

Burimi: Safety Gate

Qendra Alert

alert.al

Cilat janë zonat më të rrezikuara nga zjarri në Shqipëri dhe në rajon gjatë ditëve në vazhdim?

Programi i Komisionit Europian, Copernicus EMS, ka publikuar gjatë ditës së sotme, zonat më të rrezikuara nga zjarret në Europën Jugore, midis të cilave është dhe Shqipëria. Harta është prodhuar në bazë të llogaritjeve kompjuterike të cilat bëjnë një kalkulim të kushteve të ndryshme klimaterike në Europë, si dhe duke krahasuar rezultatet historike të tyre së paku gjatë 30 viteve të fundit.

Parashikimet për zjarret mund të bëhen nga 1 ditë deri në 9 ditë dhe ky indeks është i ndarë në gjashtë kategori kryesore: si rrezik shumë i ulët, rrezikshmëri e ulët, mesatare, e lartë, shumë e lartë dhe rrezikshmëri ekstreme. Vlen të theksohet që Shqipëria në hartën e publikuar më 23 gusht përmban dy zona në jug dhe një zonë të veri, përkatësisht në Shkodër, të cilat janë të kategorizuara si një rrezikshmëri ekstreme e zjarreve gjatë ditëve në vazhdim.

Kushte të tjera për rrezik ekstrem të zjarrit përbëjnë ishulli i Korsikës në Francë, disa zona në Itali si Sardanja, Toskana, Bazilikata, Kampania, Pulia si dhe Siçilia. Në rajonin e Ballkanit, përveç Shqipërisë, me rrezik ekstrem nga zjarret janë dhe disa zona në Kroaci, Mali i Zi, Maqedonia e Veriut si dhe Greqia.

Kategoritë e rrezikut nga zjarri janë të njëjta për të gjitha vendet dhe hartat tregojnë një pamje të harmonizuar të shpërndarjes hapësinore të nivelit të rrezikut nga zjarri në të gjithë Evropën, Lindjen e Mesme dhe Afrikën e Veriut.

Duhet theksuar që kategoria ‘shumë ekstreme e rrezikut nga zjarri’ u prezantua për herë të parë gjatë qershorit të këtij viti, duke iu referuar rajonit të Mesdheut kryesisht gjatë muajve të verës.

Hartat e nivelit të parashikuar të rrezikut nga zjarri mund të konsultohen përmes ndërfaqes së hartës në internet të EFFIS dhe gjithashtu u dërgohen email çdo ditë përdoruesve.

Burimi: Copernicus EMS

alert.al

Vjedhjet e makinave në rritje: Fiat Panda modeli më i vjedhur në Itali

Pandemia nuk e ka ndaluar biznesin kriminal të vjedhjeve të makinave, përkundrazi mesa duket e ka nxitur më shumë atë. Autoritet e ministrisë së Transporteve në Itali kanë publikuar të dhënat më të fundit në lidhje me vjedhjet e makinave në këtë vend, të cilat tregojnë për shifra në rritje. Sipas statistikave kryesore, vjedhjet e makinave janë rritur me 25% gjatë vitit 2020, në krahasim me vitin 2019.

Ndër pesë market më të vjedhura janë:

1) Fiat Panda;

2) Fiat 500;

3) Fiat Punto;

4) Lancia Ypsilon; dhe

5) Volkswagen Golf.

Sipas ekspertëve, këto makina janë edhe ato që shiten më shumë, për këtë arsye rezultojnë edhe si më të vjedhurat. Ka një rritje të kërkesës për makina që i përkasin kategorisë ‘Sport Utility’, dhe vjedhësit e makinave mesa duket janë të informuar mirë dhe po i vënë gjithnjë e më shumë në shenjestër këto makina.

Burimi: Corriere della Sera

Qendra Alert

alert.al