Tashmë lodrat për fëmijë gjenden kudo, në dyqane të posaçme për to, në shitës të vegjël ambulantë në rrugë, në qendra tregtare dhe madje kohët e fundit po shiten dhe në supermarkete. Çmimet variojnë, nga më të lirat dhe deri tek më të shtrenjtat, dhe prindërit jo gjithmonë janë të ndërgjegjshëm për rreziqet që ato mund të përbëjnë për shëndetin e fëmijëve. Më poshtë do të paraqesim disa raste të cilat janë denoncuar si raste rreziku në portalin e Komisionit Evropian, Safety Gate.
Top plastik për fëmijë
Topa plastikë të vegjël më ngjyra të ndryshme që shiten kudo nëpër Shqipëri, me motive ose shkronja shumëngjyrëshe të frutave. Topat kanë zgjatime të buta dhe një mekanizëm bilbil, një kordon elastik fleksibël dhe një mekanizëm ndezës brenda topit.
Këtij produkti i shkëputen pjesët përbërëse të tij. Si pasojë, një fëmijë mund ti gëlltisë apo të mbytet me to. Produkti nuk është në përputhje me kërkesat e Direktivës Europiane për Sigurinë e Lodrave EN 71 -1.
Autoritetet europiane kanë vendosur tërheqjen e këtij produkti nga tregu që nga qershori i këtij viti.
Lodër Kukulll
Rreziku kryesor nga kukullat me çmim të lirë që shiten shpesh në rrugë, është rreziku kimik që ato paraqesin, dhe që shpeshherë mund të arrijë deri në 35% të masës së kukullës. Këto kimikate, që i përkasin kryesisht ftalateve mund të dëmtojnë shëndetin e fëmijëve, duke shkaktuar dëmtime të mundshme në sistemin e tyre riprodhues.
Zakonisht produkti përmban një kukull, një çantë, një kapele dhe çizme. Koka e kukullës është prej plastike të butë, trupi – prej plastike më të fortë. Flokët e fibrave sintetike të kukullës janë të lidhura me një brez gome, dhe kukulla është e veshur me një fustan. Edhe ky produkt që mban emërtimin ‘Glam Girl’ Nr. 695 dhe është tërhequr nga tregu europian.
Kostumi i zjarrfikësit
Kompleti i kostumeve të zjarrfikësve për fëmijë zakonisht përbëhen nga një kapelë sintetike, xhaketë dhe pajisje plastike për lodra (zjarrfikës, zorrë për ujin, radio CB, sëpatë, shufër dhe simbol). Kostumi i veshjes së zbukuruar është lehtësisht i ndezshëm dhe përhapja e flakës është shumë e lartë. Nëse merr flakë, fëmija mund të pësojë djegie. Produkti nuk përputhet me kërkesat e Direktivës për Sigurinë e Lodrave dhe standardin përkatës Evropian.
Bluza për fëmije të vegjël
Një tjetër rast i rrezikut që mund të vijë nga gëlltitja e dekorit të veshjeve për fëmijë dhe alarmi vjen nga një vend i integruar së fundmi në BE, Rumania. Bluza ka ngjyrë të kuqe me zemra vjollce, e destinuar për fëmijët 2 vjeç. Ka mbishkrimin “So Sweet” dhe një shtypje me zebër dhe me guralecë të ngjitur argjendi. Elementet e vogla dekorative në produkt (guralecët e ngjitur) mund të shkëputen lehtësisht. Një fëmijë i vogël mund t’i gëlltisë dhe të mbytet prej tyre. Produkti nuk përputhet me kërkesat e Direktivës së Përgjithshme të Sigurisë së Produktit dhe standardit Evropian. Në fund të qershorit të këtij viti, edhe ky produkt është tërhequr nga tregu europian.
Plastelinë
Plastelinat në përgjithësi janë të rrezikshme për fëmijët, por një lloj plasteline e re, më e lëngshme që qarkullon në treg, shquhet për përmbajtjen e lartë të elementit kimik të borit. Migrimi i borit nga plastelina është shumë i lartë (vlera e matur deri në 1953 mg/kg). Gëlltitja ose kontakti me një sasi të tepërt të borit mund të dëmtojë shëndetin e fëmijëve duke dëmtuar sistemin riprodhues të tyre.
Produkti nuk përputhet me Rregulloren REACH dhe kërkesat e Direktivës për Sigurinë e Lodrave dhe standardin përkatës Evropian, dhe për këtë arsye ai gjithashtu është tërhequr nga tregu.
Burimi: Safety Gate, Komisioni Europian
Qendra Alert
alert.al
