Emisioni “Alert” në “Ora News” këtë të premte u fokusua te raporti global i FAO-s 2025 dhe ndikimi i tij në sektorin agro-ushqimor në Shqipëri dhe rajon. Ekspertët e ftuar analizuan prodhimin bujqësor, çmimet, trendet globale dhe sfidat e tregut.
Ilir Pilku theksoi se raporti i FAO-s ka një perspektivë globale, ndërsa Shqipëria është më e orientuar drejt integrimit në tregun europian. Ai kujtoi parashikimin e Bankës Botërore se deri në vitin 2050 kërkesa botërore për ushqim do të rritet me 60%, për shkak të ngrohjes globale, tkurrjes së tokave bujqësore dhe rritjes së jetëgjatësisë. Pilku nënvizoi se Shqipëria duhet të fokusohet te çmimet e produkteve që nuk i prodhon vetë, si sheqeri dhe orizi, pasi këto ndikojnë drejtpërdrejt tek konsumatori.
Fatmir Selimi, ekspert ndërkombëtar i bujqësisë, vlerësoi raportin “Perspektiva ushqimore” si një dokument me të dhëna të domosdoshme për planifikimin e së ardhmes. Ai tha se produktet me rëndësi për Shqipërinë dhe Kosovën mbeten drithërat, mishi dhe qumështi, ndërsa vëmendja globale për produkte të tjera i përket më shumë tregjeve të Azisë. Selimi shtoi se në Kosovë rendimentet janë rritur falë kushteve klimatike, dhe shpreson që prodhimi vendas të rritet më tej për të siguruar nevojat kombëtare.
Artan Gjergji, ekspert ekonomie, foli për luhatjet e çmimeve të mallrave të konsumit, të cilat varen nga faktorë klimatikë, ekonomikë dhe gjeopolitikë. Ai theksoi se prodhimi dhe siguria ushqimore janë prioriteti kryesor, përpara kostove të shpërndarjes apo të tjera. Sipas tij, raporti i FAO-s tregon një stabilizim të çmimeve globale gjatë 2–3 viteve të fundit.
Emisioni solli një analizë të qartë të sfidave dhe mundësive që sektorët bujqësorë të Shqipërisë dhe Kosovës pritet të përballen në vitet e ardhshme, në një treg global në ndryshim të vazhdueshëm.https://www.youtube.com/watch?v=p-bWZvcRr08&embeds_referring_euri=https%3A%2F%2Fwww.oranews.tv%2F&source_ve_path=MjM4NTE
