ryshfet

Gjykata e Shkodrës vendosi të lërë në burg dy mjekët e spitalit të Traumës në Tiranë, Ervin Sulaj dhe Serdi Memini të akuzuar se morën para për trajtimin e 17 vjeçarit Elmidin Dyli, i mbetur të plagosur në përplasjen me armë  në Velipojë, ku katër persona humbën jetën.

Në seancën për rivlerësimin e masës së sigurisë u zbulua se në pranga është vënë edhe infermierja nga Shkodra, Diellë Macaj e cila po ashtu mbeti në qeli. Sipas dosjes hetimore, kjo e fundit është përgjuar në një bisedë telefonike me nënën e 17 vjeçarit, duke i thënë se do t’i çojnë dhuratë 500 mijë lekë të vjetra doktorit por pa përmendur emrin se cilit prej tyre.

Infermierja Macaj sipas transkriptit e ka mbështetur në atë bisedë duke i thënë se “është mirë t’ia dërgosh dhuratën”.

Kaq ka mjaftuar që policia e kishte familjen Dyli nën përgjim për përplasjen me armë,  të kërkojë arrestimin e dy mjekëve të Traumës dhe infermieren e Shkodrës për veprat penale “korrupsion pasiv i personave që ushtrojnë funksione publike”.

Mjeku Ervin Sulaj, I cili ishte në sallën mohoi akuzën për marrje rryshfeti, duke deklaruar se ai dhe kolegu i  tij janë marrë vetëm me operacionin e Elmidin Dylit. Ndërsa masa për mjekun kirurg Serdi Memini u zhvillua në mungesë, pasi ai ndodhet i shtruar në Spitalin e Traumës në Tiranë për probleme shëndetësore.

Në pranga  u vu edhe, Fatbardh Dyli babai i 17 vjecçarit hetimi ndaj të cilit do të vazhdojë në gjendje të lirë me kërkesë të Prokurorisë . Ai dyshohet se u dha mjekëve 377 mijë lekë dhe 55 euro, të cilat më pas janë sekuestruar në cilësinë e provës materiale.

Ndërkohë gjykata e Shkodrës rrëzoi kërkesën e prokurorisë së Shkodër që dosja ti kalojë SPAK për hetim të mëtejshme.

alert.al/

Dy mjekët, Serdi Memini dhe Ervin Sulaj janë arrestuar pasi kanë marrë ryshfet nga babai i njërit prej të plagosurve të Velipojës, i përfshirë në ngjarjen e rëndë ku u vranë 4 persona. Babai i E.D, të plagosurit në Velipojë pasi ka mbërritur i biri në Tiranë dhe i kanë bërë operacionin mjekët, dyshohet se u ka dhënë rryshfet mjekëve.

Mësohet se në datën 27 qershor, i ati i pacientit, shtetasi E. D. dyshohet se iu ka dhënë mjekut kirurg ortoped dhe mjekut anestezist 377.000 lekë të reja dhe 55 euro për kryerjen e operacionit. Gjithashtu është ndaluar për veprën penale “Korrupsion aktiv ndaj personave që ushtrojnë funksione publike”, 40-vjeçari Fatbardh Dyli.

Shkodër

Finalizohet operacioni policor i koduar “Bisturia”.  Vihen në pranga një mjek kirurg dhe një mjek anestezist, si dhe një shtetas që iu ka dhënë këtyre dy mjekëve, një shumë parash për të kryer operacionin e djalit.  Sekuestrohen në cilësinë e provës materiale paratë që kanë marrë mjekët për kryerjen e operacionit.  Strukturat Hetimore të DVP Shkodër dhe të Komisariatit të Policisë Shkodër, me mbështetjen e forcës së Posaçme “Shqiponjat” të Drejtorisë Vendore të Policisë  Tiranë, në bashkëpunim me Prokurorinë e Rrethit Gjyqësor Shkodër, organizuan dhe finalizuan operacionin policor të koduar “Bisturia”. Në kuadër të operacionit u bë ndalimi për veprën penale “Korrupsioni pasiv i personave që ushtrojnë funksione publike”, i shtetasve: S. M., 34 vjeç, me profesion mjek kirurg ortoped pranë Spitalit Universitar të Traumës Tiranë dhe E. S., 45 vjeç, me profesion mjek anestezist reanimator pranë Spitalit Universitar të Traumës Tiranë. Gjithashtu u bë ndalimi për veprën penale “Korrupsion aktiv i personave që ushtrojnë funksione publike”, i shtetasit F. D, 40 vjeç, banues në Shkodër.  Ndalimi i tyre u bë për arsye se në ambientet e një qendre spitalore në Tiranë, pas një operacioni mjekësor që kirurgu S. M. dhe anestezisti E. S. i kanë bërë shtetasit E. D., i plagosur mbrëmjen e datës 27 qershor, në Velipojë, i ati i pacientit, shtetasi F. D. dyshohet se iu ka dhënë të dy mjekëve një sasi parash për kryerjen e operacionit.  Pas kontrolleve të ushtruara, shërbimet e Policisë kanë gjetur dhe sekuestruar në cilësinë e provës materiale shumën 377.000 lekë të rinj dhe 55 euro. Materialet u referuan në Prokurorinë pranë Gjykates së Shkallës së Parë Shkodër.