Platforma digjitale “Pasqyra e Çmimeve” është tashmë online, duke u dhënë qytetarëve mundësinë të kontrollojnë çmimet e produkteve të shportës bazë dhe të krahasojnë ofertat e rrjeteve të supermarketeve përpara se të kryejnë blerjet.
Përmes faqes zyrtare pasqyraecmimeve.al, konsumatorët mund të konsultojnë të dhënat për produktet e përfshira në platformë, ku publikohen emri, marka, gramatura, çmimi i deklaruar, furnitori dhe rrjetet tregtare ku shiten. Informacioni mund të aksesohet si nga telefoni, ashtu edhe nga kompjuteri, ndërsa çmimet paraqiten me TVSH të përfshirë.
Nisma synon të rrisë transparencën në treg dhe t’u mundësojë qytetarëve të informohen më mirë për shpenzimet e përditshme, në një kohë kur çmimet e produkteve ushqimore zënë një pjesë të rëndësishme të buxhetit familjar. Krahasimi i çmimeve mund t’i ndihmojë konsumatorët të identifikojnë se ku mund t’i blejnë produktet e përzgjedhura.
Platforma mbështetet në paktin vullnetar “KURSE”, ku janë përfshirë rreth pesë rrjete të mëdha supermarketesh dhe 22 furnitorë kryesorë. Subjektet pjesëmarrëse janë angazhuar të mbajnë të pandryshuara çmimet e një liste të caktuar produktesh, me synimin për të lehtësuar shpenzimet e familjeve.
Megjithatë, marrëveshja nuk parashikon vendosjen e çmimeve tavan me ligj, por mbështetet në angazhimin vullnetar të bizneseve. Për këtë arsye, një element i rëndësishëm mbetet përputhja e çmimeve të publikuara në platformë me ato që aplikohen realisht në dyqane.
Në rast se çmimi i shfaqur online ndryshon nga ai që i kërkohet konsumatorit në arkë, ndaj subjektit mund të merren masa sipas rregullave në fuqi. Zbatimi i këtyre angazhimeve dhe verifikimi i informacionit të publikuar do të jenë thelbësorë për të garantuar që platforma të shërbejë jo vetëm si burim informacioni, por edhe si një instrument praktik në mbrojtje të konsumatorit.
Qendra Alert/Alert.al
