Emisioni “Alert”, i moderuar nga Granit Sokolaj, këtë të premte iu përkushtua rastit të infeksionit me salmonelë në një kopësht në Gramsh, ku disa fëmijë u helmuan pas konsumit të ushqimit të kontaminuar. Ngjarja ka ngritur shqetësime të forta për sigurinë ushqimore dhe për mënyrën si reagojnë institucionet përgjegjëse në situata që prekin drejtpërdrejt shëndetin e fëmijëve.
Të ftuar për të analizuar rastin dhe për të diskutuar mbi sfidat në sistemin e sigurisë ushqimore ishin Kapllan Sulaj, Dekan i Bioteknologjisë dhe Ushqimit në UBT, mjeku veterinar Rushan Vrapi dhe Valbona Paluka, përfaqësuese e pikës së kontaktit me EFSA-n.
Kapllan Sulaj theksoi se nuk ka garanci të plotë për parandalimin e infeksioneve salmonelare, pasi bakteret mund të hyjnë në fermë nga shumë burime: ushqimi, ajri, toka, insektet apo zogjtë. Sipas tij, një kontroll i njëhershëm nuk mjafton për të garantuar pastërtinë, pasi infeksioni mund të përhapet në momente të ndryshme dhe në zona të ndryshme.
Rushan Vrapi ngriti shqetësimin për çedimet e vazhdueshme në sigurinë ushqimore në vend. Ai përmendi raste të përsëritura me pesticide, produkte të kthyera nga BE dhe shpërthime të mëparshme të salmonelës në mish. Ai theksoi se, ndonëse ngrohja mbi 70-75°C e shkatërron salmonelën, kjo nuk zëvendëson domosdoshmërinë për masa parandaluese, kontrolle të rregullta dhe koordinim më të mirë ndërinstitucional.
Valbona Paluka u ndal tek rëndësia e higjienës dhe përgatitjes së ushqimit. Ajo përmendi burimet më të zakonshme të salmonelës, si mishi i pagatuar mirë, vezët e buta, produktet e qumështit të pa pasterizuara dhe ambientet e papastra, si frigoriferët e pa higjienizuar. Sipas saj, mungesa e standardeve të thjeshta të higjienës rrit ndjeshëm rrezikun e kontaminimit, veçanërisht në ambiente të ndjeshme si institucionet për fëmijë.
Për të sqaruar më shumë detaje rreth ngjarjes dhe për të informuar opinionin publik mbi masat e marra, moderatori Granit Sokolaj kishte insistuar në mënyrë të përsëritur për prezencën e përfaqësuesve nga Autoriteti Kombëtar i Ushqimit dhe Ministria e Shëndetësisë. Ftesat ishin dërguar paraprakisht dhe gjatë emisionit u bë edhe një thirrje publike live për reagim zyrtar.
Megjithatë, institucionet përgjegjëse zgjodhën të mos reagojnë dhe nuk dërguan asnjë përfaqësues. Karrigia e rezervuar për Ministrinë e Shëndetësisë, e shoqëruar me sloganin “Me Ministrin e Shëndetësisë”, mbeti bosh, duke simbolizuar mungesën e transparencës dhe refuzimin për t’u përballur me publikun në një moment kritik, kur qytetarët prisnin përgjigje dhe sqarime.
Ekspertët nënvizuan se ky rast është një shembull i qartë i dobësive në sistemin e sigurisë ushqimore në Shqipëri. Ata kërkuan reagim institucional, kontrolle të vazhdueshme dhe një qasje më serioze për të mbrojtur shëndetin e konsumatorëve dhe, mbi të gjitha, të fëmijëve.https://www.youtube.com/watch?v=isRxY8TAUVk
