Pika e Kontaktit

Në emisionin “Alert” në Ora News, i dedikuar sigurisë ushqimore, u prezantuan gjetjet e fundit të Eurobarometrit të EFSA-s, që për herë të parë përfshiu edhe Shqipërinë e Kosovën në matjen e perceptimit të konsumatorëve për ushqimin.

Polikseni Drazho, Koordinatore Kombëtare EFSA/AKU, theksoi se për Autoritetin Kombëtar të Ushqimit ky sondazh “merr një vlerë shumë të veçantë”, pasi dëshmon rritjen e ndërgjegjësimit të qytetarëve jo vetëm për sigurinë, por edhe për cilësinë e produkteve ushqimore. Sipas saj, puna e institucioneve, organizatave jofitimprurëse dhe mediave ka ndihmuar në krijimin e një konsumatori më kritik e më të informuar.

Ndërsa Valbona Paluka, pika e kontaktit e EFSA-s në Shqipëri, kujtoi se Eurobarometri nisi në vitin 2010 në Bashkimin Evropian, pas krizave të ushqimit si “Lopa e çmendur” apo “dioksinat”, ndërsa Shqipëria u përfshi në sondazh për herë të parë në vitin 2019. Ajo tha se qëllimi është të kuptohet besimi që konsumatorët kanë ndaj autoriteteve dhe mënyrat si informohen për ushqimin.

Flamur Kadriu, Drejtor i Shëndetit Publik, e cilësoi Eurobarometrin “një mjet jashtëzakonisht të rëndësishëm” që u jep autoriteteve të dhëna të vlefshme mbi mënyrën se si perceptohen nga publiku dhe industria ushqimore.

Nga Prishtina, Yllka Dibrani, Koordinatore e EFSA-s në Kosovë, vuri në dukje se sondazhi për vitin 2025 tregon se konsumatorët kosovarë po afrohen ndjeshëm me standardet e Bashkimit Evropian, duke reflektuar një rritje të vetëdijes për ushqimin e sigurt dhe të cilësisë së lartë.

Emisioni “Alert” i kësaj të premteje solli kështu një panoramë rajonale të perceptimit publik për sigurinë ushqimore, duke dëshmuar se shqiptarët po bëhen çdo ditë e më shumë konsumatorë europianë.

Në një lidhje të drejtpërdrejtë në emisionin “Alert” në “Ora News”, Koordinatorja e EFSA-s në Kosovë, Yllka Dibrani, u shpreh se rezultatet e Eurobarometrit tregojnë një përmirësim të ndjeshëm në vetëdijen e konsumatorëve kosovarë dhe afrimin e tyre me bindjet dhe standardet e Bashkimit Evropian në fushën e sigurisë ushqimore. ” Përsa i përket Kosovës, është viti i dytë që po bëhet Eurobarometri. Është bërë një herë në vitin 2022 dhe tashmë në vitin 2025.

Shikohet që është një rritje që është mjaft e kënaqshme për Kosovën që paraqet goxha vlera të njëjta me BE-në, kështu që konsumatori kosovarë është duke shkuar drejt bindjeve të BE-së dhe është duke u ngritur vetëdija e konsumatorit shqiptar lidhur me sigurinë ushqimore”, u shpreh ndër të tera Dibrani.

Valbona Paluka, Pika e Kontaktit, EFSA, Shqipëri e ftuar në emisionin ‘’Alert’’ në Ora News u shpreh se EFSA për herë të parë në BE ka filluar në vitin 2010 ndërsa në vitin 2019 është përfshirë edhe Shqipëria.

Paluka: Së pari ka filluar në vitin 2010.

Dihet që vitet 90’, 99’, 2000, sëmundja e Lopës së çmendur, dioksina të gjitha këto kanë qenë probleme të cilat kanë tronditur BE.

Për herë të parë në BE ka nisur në 2010.

Çështja ishte për të patur një perceptim të konsumatorëve përsa i përket sigurisë ushqimore, përsa i përket mënyrave të informimit të konsumatorëve dhe çfarë besimi kanë ato tek autoritetet.

Dhe në vitin 2019 kur vërtet shumë gjëra ndryshuan edhe në strategjinë e komunikimit të EFSA në sajë të Eurobarometrit të parë, në 2019 krahas vendeve të BE është përfshirë edhe Shqipëria.