Edvin Prençe

ftuar në “Alert”, modertuar nga Granit Sokolaj në Ora News, Elisabeta Katiaj, Nënkryetare e DHBDSH dhe Eksperte Kontabël, diskutoi mbi problemet që ka hasur biznesi shqiptar gjatë vitit 2024. Ajo theksoi se sektorët e fasonëve, fermerëve dhe rikthimit të grumbulluesve dhe eksportuesve kanë kaluar një vit të vështirë, të cilin e përshkroi si një vit “mbijetesë”. Katiaj vlerësoi se viti 2025 do të jetë një vit konsolidimi për këto sektorë, duke u fokusuar në mundësitë për zhvillim, sidomos për produktet vendase.

Ajo paralajmëroi se sektori i fasonëve do të përballet me më shumë mbyllje, por gjithashtu pati shpresa për zhvillim në tregje të reja, si tregu amerikan, që mbetet ende i paeksploruar. Nga ana tjetër, Katiaj vuri në dukje zhvillimin e sektorit të bimëve mjekësore, që ka pasur më shumë sukses dhe mundësi eksporti. Megjithatë, ajo theksoi nevojën e mbështetjes financiare dhe likuiditetit, një çështje që ka ndikuar negativisht në rritjen e sektorit të fasonëve.

E ftuar në emisionin “Alert”, moderuar nga Granit Sokolaj në “Ora News”, lidhur me temën “Ekonomia në 1 vit, çfarë presin bizneset?”, Elisabeta Katiaj, Nënkryetare e DHBDSH dhe Eksperte Kontabël, diskutoi mbi pritshmëritë për vitin 2025 dhe rëndësinë e planit të integrimit.

Ajo theksoi se viti 2025 do të shënojë një fazë të re rritjeje për ekonominë, për shkak të implementimit të planit të rritjes, i cili ka përfshirë një dialog të suksesshëm me qeverinë gjatë vitit 2024.

Katiaj shtoi se, pavarësisht se 2025 do të jetë një vit elektoral, plani i rritjes do të ketë një ndikim të jashtëzakonshëm në ekonominë shqiptare, për shkak të fondeve të ofruara përmes granteve dhe kredive të buta. Ky plan fokusohet në tre prioritete: ekonominë e gjelbër, ndërkombëtarizimin e ndërmarrjeve të vogla dhe të mesme, dhe konsolidimin e ligjit për investimet e huaja dhe strategjinë e investimeve strategjike.

Ajo, gjithashtu përmendi rëndësinë e paketës së re për zonat e lira ekonomike dhe përpjekjet për planifikimin dhe orientimin e ndihmës ekonomike evropiane, që do të fillojë të zbatohet gjatë vitit 2025.

Në lidhje me sektorin e fasonëve, ajo shpjegoi se ndikimi i kredive sovrane nuk ka dhënë rezultate pozitive deri më tani.

Sektori i fasonëve ka një cikël të vlerës së shtuar që zgjat nga 3 deri në 5 vjet dhe për këtë arsye është e nevojshme të krijohet një cikël ri-investimi, sidomos në aspektin e teknologjisë dhe krijimit të markave vendase.

I ftuar në emisionin “Alert” të moderuar nga Granit Sokolaj në “Ora News”, Kryetari i Shoqatës së Industrisë së Bimëve Mjekësore dhe Aromatike (IBMA-AMAP), Filip Gjoka foli për situatën e industrisë së bimëve dhe erëzave mjekësore, duke theksuar vështirësitë që ka kaluar sektori.

“Industria e fasoneve është po aq e vështirë sa sektori i bimëve dhe erëzave mjekësore. Viti 2024 ka qenë shumë i vështirë për shkak të zhvlerësimit të euros dhe dollarit, si dhe largimit të fuqisë punëtore të grumbulluesve nga zonat rurale drejt zonave urbane. Më e keqja është se ky fenomen është drejtuar edhe drejt Bashkimit Evropian, çka ka sjellë mungesë grumbulluesish në zonat e thella malore dhe ka vështirësuar punësimin në fabrika”, tha ai.

Gjoka vazhdoi duke shtuar se: “Pavarësisht se në fabrika kemi marrë punëtorë nga India, tani presim të vijnë edhe nga Bangladeshi dhe Filipinet. Megjithatë, problemi i madh për industrinë tonë mbetet shitja e lëndës së parë dhe mungesa e investimeve. Kemi kosto shumë të larta në Shqipëri krahasuar me vendet e rajonit, për shkak të naftës, energjisë elektrike dhe krahut të punës”.

Ai përmendi, gjithashtu, se edhe pse ky vit ka qenë i vështirë, kompania e tij nuk ka mbyllur me rritje, siç ishte parashikuar. Ky është viti i dytë që kompania nuk arrin rezultatet e dy viteve të kaluara, kur kishte një rritje prej 3-4%.

“Në vitet e kaluara, kishim pasur rritje edhe deri në 12%, por këtë vit, situata ka qenë më e vështirë”, shtoi Gjoka.