Sipas njoftimit zyrtar, ky çmim përfaqëson një vlerësim për angazhimin institucional dhe kontributin në forcimin e marrëdhënieve mes Shqipërisë dhe Italisë, duke theksuar bashkëpunimin e qëndrueshëm ndërmjet dy vendeve.
Ministri reagoi edhe në rrjetin e tij social Facebook, ku ndau mesazhin e tij pas ceremonisë. “Me nder dhe përgjegjësi pranova vlerësimin me çmimin ‘Luani i Artë’, i akorduar nga Komiteti ‘Leone d’Oro’ i Venecias, në një ceremoni të zhvilluar në ambientet e Senatit të Republikës Italiane,” shkroi ai.
Në postimin e tij, Salla e cilësoi çmimin si simbol të punës së përbashkët në afrimin e Shqipërisë me familjen europiane, duke theksuar se çdo arritje merr kuptim vetëm kur përkthehet në më shumë standarde dhe rezultate për qytetarët. Ai e përshkroi vlerësimin edhe si dëshmi të miqësisë së fortë mes Italisë dhe Shqipërisë, një marrëdhënie e ndërtuar mbi respekt dhe lidhje të qëndrueshme njerëzore.
Në fund të mesazhit të publikuar në Facebook, ministri shprehu mirënjohje për familjen e tij për mbështetjen dhe përkushtimin e vazhdueshëm.