Në emisionin “Alert” këtë të premte, më 18 korrik 2025, u trajtuan problematika kyçe që lidhen me sigurinë ushqimore, funksionimin e institucioneve dhe sfidat fiskale që prekin fermerët shqiptarë. Të ftuarit Fatos Çoçoli Ekonomist dhe gazetar, Drini Zusi Sipërmarrës në industrinë ushqimore dhe Kapllan Sulaj Dekan i Bioteknologjisë dhe Ushqimit, UBT ofruan analiza dhe propozime konkrete për përmirësimin e situatës, duke theksuar nevojën për ndërhyrje ligjore dhe institucionale urgjente.
Çoçoli solli në vëmendje një kontradiktë të hapur në ligjin e vitit 2019, që lejon fermerët të shesin dhe të blejnë pa faturë fiskale, edhe pse ata kanë NIPT dhe klasifikohen si biznese të vogla. “Ligji është në kontradiktë me vetveten – njëkohësisht e lejon dhe e ndalon faturimin për fermerin me NIPT. Kjo situatë duhet zgjidhur urgjentisht, ndoshta me një urdhëresë të shpejtë nga Ministri i Financave për të shmangur vonesa me VKM,” deklaroi Çoçoli.
Zusi ngriti shqetësimin për mungesën e vetëdijes kolektive në Shqipëri për sigurinë ushqimore. Ai vuri në dukje se qytetarët shpesh nuk kanë ndjeshmëri për cilësinë dhe origjinën e ushqimit që konsumojnë. “Shpesh mendojmë ende se mishi i sapo therur në rrugë është ‘më i freskët’. Kemi ende rrugë për të bërë për të kuptuar standardet moderne të sigurisë ushqimore,” theksoi ai.
Profesori Sulaj dha një paralajmërim të qartë kundër shkrirjes së Autoritetit Kombëtar të Ushqimit (AKU). “Të mendosh të shkrish një institucion si AKU është e rrezikshme. Nuk është një inspektorat i thjeshtë, por një autoritet kompleks që merret me vlerësimin dhe menaxhimin e rrezikut ushqimor. AKU i duhet këtij vendi – çdo veprim duhet të mendohet mirë,” deklaroi ai, duke shtuar se ndoshta kryeministri është i keqinformuar mbi rolin real të institucionit.
Të ftuarit në “Alert” sollën një tablo të qartë të boshllëqeve ligjore dhe mungesës së ndërgjegjësimit shoqëror për sigurinë ushqimore. Ata kërkuan veprime të menjëhershme për të korrigjuar kontradiktat në ligj dhe për të ruajtur institucionet kyçe të mbikëqyrjes ushqimore, si AKU.
