Bizneset e dëmtuara gjatë protestave të fundit në Tiranë do të përfitojnë mbështetje financiare nga shteti, me dëmshpërblim që varion nga 70% deri në 100% të dëmeve materiale. Kryeministri Edi Rama prezantoi aktin normativ që parashikon kompensimin e dëmeve të shkaktuara nga thyerjet, grabitjet dhe zjarret, me synimin për të shmangur pritjen e gjatë të proceseve gjyqësore.
Sipas Ramës, masa do të zbatohet për bizneset me xhiro vjetore deri në 140 mijë euro, ndërsa përqindja e kompensimit do të përcaktohet në bazë të kritereve të miratuara. Bizneset që kanë dorëzuar tashmë aplikimet dhe dokumentacionin përkatës pranë Drejtorisë së Përgjithshme të Tatimeve do të mund të përfitojnë mbështetjen financiare pa pritur përfundimin e proceseve gjyqësore për dëmshpërblim.
Kreu i qeverisë deklaroi gjithashtu se personat që kanë shkaktuar dëmet do të mbajnë përgjegjësi financiare për pjesën përkatëse të tyre. Në rastet kur dëmet janë shkaktuar nga të miturit, sipas Ramës, përgjegjësia për mbulimin e kësaj pjese do t’u kalojë prindërve.
Më herët, Drejtoria e Përgjithshme e Tatimeve kishte identifikuar 127 biznese të dëmtuara gjatë protestave në Tiranë, me një vlerë totale dëmesh të raportuara prej 2.15 milionë eurosh. Mbetet për t’u parë se sa shpejt do të nisë procesi i kompensimit dhe si do të zbatohet në praktikë skema e parashikuar nga akti normativ.
Qendra Alert/Alert.al
