Në emisionin “Alert”, moderuar nga Granit Sokolaj, u publikuan edhe dokumente të tjera importi të mishit, të cilat sipas emisionit janë siguruar në mënyrë konfidenciale nga burime të ndryshme.
Sipas “Alert”, dokumentacioni përfshin të dhëna mbi numrat identifikues të stabilimenteve të përpunimit të mishit, të njohura si “plant”, të cilat përdoren për identifikimin dhe certifikimin e stabilimenteve të miratuara për eksport.
Në emision u theksua se janë verifikuar disa dokumente importi dhe një kontenier ku, sipas redaksisë, identifikohet qartë origjina e produktit dhe numrat e stabilimenteve nga ku është eksportuar mishi.
Granit Sokolaj deklaroi se pas verifikimeve të kryera në faqet zyrtare të Komisionit Europian dhe në listat e stabilimenteve të miratuara nga Bashkimi Europian për Brazilin, numrat e plant-eve të evidentuara në dokumente nuk rezultojnë të regjistruar si stabilimente të autorizuara nga BE-ja.
Sipas emisionit, verifikimi është kryer duke kontrolluar numrat identifikues të stabilimenteve në databazat zyrtare të Komisionit Europian, ku listohen subjektet e miratuara për eksport të produkteve ushqimore dhe produkteve me origjinë shtazore drejt vendeve të Bashkimit Europian.
“Alert” deklaroi se asnjë nga numrat e evidentuar në dokumentet e siguruara nuk rezulton në listat zyrtare të stabilimenteve të miratuara nga BE-ja për eksport nga Brazili, duke ngritur dyshime të forta mbi origjinën dhe standardet e mishit të importuar.
