E ftuar në emisionin Alert në Ora News, i moderuar nga Granit Sokolaj, Venera Xhillari, Zv. Drejtoreshë e Përgjithshme e kompanisë së sigurimeve Atlantik , komentoi ligjin për fondin e katastrofave dhe përzgjedhjen e operatorit teknik ndërkombëtar.
Ajo theksoi se ligji parashikon që operatori teknik që do të menaxhojë fondin duhet të plotësojë të paktën kriteret e vendeve anëtare të OECD-së. Megjithatë, Xhillari shprehu shqetësimin se nëse tregu i sigurimeve në Shqipëri është i konsoliduar dhe ka kaluar të gjitha sprovat duke dëshmuar aftësinë për të përballuar çdo katastrofë, nuk ka nevojë të kërkohet operator jashtë kufijve.
“Sipas saj, në Shqipëri ekzistojnë ekspertë të licencuar nga autoritetet, të cilët janë më të mirët në fushat përkatëse. Marrja e ekspertëve të huaj do të sillte kosto shtesë që do të paguheshin nga fondi i katastrofave,” u shpreh Xhillari.
Zv. Drejtoresha shtoi se 80% e fondit do të shkojë për të paguar këto kosto, ndërsa risigurimi menaxhohet prej 30 vitesh nga kompanitë e sigurimit, duke qenë më i qëndrueshëm dhe me çmime më të favorshme sesa nëse do të menaxhohej drejtpërdrejt nga shteti.
Ajo komentoi gjithashtu se një projektligj për fondin e katastrofave, i paraqitur në vitin 2023, nuk u realizua si duhet, pasi ishte pa kontributin e kompanive të sigurimit dhe pa mbështetjen e autoriteteve përkatëse. Sipas saj, ligji aktual është pothuajse i njëjtë me atë të mëparshmin dhe përjashton autoritetin mbikëqyrës financiar, duke qenë objekt i kontestimeve nga industria e sigurimeve.
