Author Archives: Admin3

Qeveria synon të ndryshojë mënyrën e kryerjes dhe monitorimit të prokurimeve publike, duke vendosur në qendër përdorimin e inteligjencës artificiale dhe një sistem më të centralizuar. Ministrja e Ekonomisë dhe Inovacionit, Delina Ibrahimaj tha se po punohet për finalizimin e një modeli që synon rritjen e transparencës dhe gjurmueshmërisë së fondeve publike.

Gjatë mbledhjes së Këshillit të Ministrave është diskutuar për mënyrën e organizimit të prokurimeve publike dhe nevojën për një sistem më të përqendruar. Sipas Ibrahimajt, vendosja në funksion e sistemit të ri të inteligjencës artificiale është në fazat e fundit të përgatitjes dhe pritet që brenda vjeshtës së këtij viti të nisin procedurat për përdorimin e tij në prokurimet publike.

Ministrja theksoi se paralelisht me teknologjinë e re po rishikohet edhe mënyra se si zhvillohen procedurat, me synimin që informacioni mbi përdorimin e parave publike të jetë më i aksesueshëm dhe më i kuptueshëm për qytetarët.

Një pjesë e rëndësishme e modelit të ri lidhet me platformën “PasqyraAlbania”. Sipas Ibrahimajt, synimi është që qytetarët të mos kenë akses vetëm te informacioni mbi prokurimet e zhvilluara dhe rezultatet e tyre, por edhe te mënyra se si zbatohen kontratat pas përfundimit të procedurës së prokurimit.

Në këtë kuadër, Operatori i Blerjeve të Përqendruara pritet të ketë një rol më të madh në proceset e prokurimit publik. Modeli i prezantuar parashikon gjithashtu sinkronizimin e sistemeve të Ministrisë së Financave, Agjencisë së Prokurimit Publik dhe Operatorit të Blerjeve të Përqendruara me sistemet që lidhen me zbatimin e kontratave.

Sipas ministres, ky integrim do të shtrihet deri te sistemet e fiskalizimit, duke krijuar një zinxhir të lidhur informacioni nga momenti i prokurimit deri në zbatimin dhe pagesat që lidhen me kontratat.

Qendra Alert/Alert.al

Çmimet kanë marrë një frenim të lehtë në shtator, por presioni mbi konsumatorët mbetet i lartë. Inflacioni zbriti në 2.9%, nga 3.2% që ishte në gusht, i ndikuar kryesisht nga ulja e çmimeve të veshjeve dhe shërbimeve të komunikimit. Megjithatë, ushqimet dhe transporti vijojnë të jenë ndër faktorët kryesorë që mbajnë çmimet lart.

Sipas INSTAT, grupi “Ushqime dhe pije joalkoolike” dha kontributin më të madh në rritjen vjetore të çmimeve, me 0.96 pikë përqindje, ndërsa “Transporti” ndikoi me 0.81 pikë përqindje.

Pas tyre renditet grupi “Qira, ujë, energji elektrike, gaz dhe karburante të tjera”, me një ndikim prej 0.54 pikë përqindje. Ndërkohë, “Mobilje, pajisje shtëpie dhe mirëmbajtje e shtëpisë” kontribuoi me 0.16 pikë përqindje.

Edhe grupet “Pije alkoolike dhe duhan”, “Argëtim, sport dhe kulturë” dhe “Restorante dhe shërbime akomodimi” shtuan nga 0.12 pikë përqindje secili në rritjen e çmimeve.

Në kahun e kundërt, çmimet e “Veshje dhe këpucë” ulën inflacionin me 0.12 pikë përqindje, ndërsa “Informacioni dhe komunikimi” me 0.04 pikë përqindje.

Pavarësisht frenimit në shtator, inflacioni mbetet një çështje e ndjeshme për Bankën e Shqipërisë. Pas rritjes në muajt korrik-gusht, banka vendosi të mbajë të pandryshuar normën bazë të interesit në 2.5%, por sinjalizoi se rritja e normave në të ardhmen mbetet një mundësi.

Sipas Bankës së Shqipërisë, përshpejtimi i inflacionit gjatë verës u ndikua nga rritja e çmimeve të karburanteve dhe ushqimeve të papërpunuara, ndërsa presionet e huaja dhe rritja e çmimeve të produkteve bazë në tregjet ndërkombëtare kanë shtuar inflacionin e importuar.

Pra, edhe pse shifra e shtatorit tregon një ngadalësim, çmimet nuk janë larguar nga presioni. Ushqimet, karburantet dhe transporti vijojnë të mbajnë peshën kryesore në koston e jetesës.

Qendra Alert/Alert.al