Agjencia e Ushqimit dhe Veterinarisë së Kosovës njofton se ka kthyer në Shqipëri një grup prej 485 deles dhe 25 qingjash, të cilat ishin futur ilegalisht në territorin e Republikës së Kosovës. Vendimi është marrë pas ndalimit të tufës më 16 nëntor 2025 në Prizren, gjatë një kontrolli të përbashkët të Policisë Kufitare, Doganes dhe Shërbimit Veterinar.
Sipas autoriteteve kosovare, kafshët e llojit dele dhe dhi kishin hyrë nga Shqipëria në mënyrë të paautorizuar dhe nuk posedonin certifikata shëndetësore veterinare, dokument i domosdoshëm për transport ndërkufitar. Mungesa e tyre paraqiste rrezik për përhapjen e sëmundjeve ngjitëse, ndaj Agjencia e Ushqimit dhe Veterinarisë vendosi kthimin e menjëhershëm të kafshëve në vendin e origjinës.
AUV bën të ditur se veprimet janë kryer në bashkëpunim të ngushtë me Policinë e Kosovës, Policinë Kufitare, Doganen dhe Prokurorinë e Shtetit, duke respektuar të gjitha procedurat veterinare dhe ligjore për raste të tilla.
Institucioni thekson se vijon monitorimin e rreptë të gjendjes shëndetësore të kafshëve dhe lëvizjeve brenda territorit, me qëllim parandalimin e futjes dhe përhapjes së sëmundjeve ngjitëse që mund të rrezikojnë fondin blegtoral dhe ekonominë bujqësore.
Po ashtu, AUV rikujton se importi i kafshëve të gjalla lejohet vetëm në pikat kufitare të autorizuara, ku zbatohen kontrollet e detyrueshme dokumentare, identifikuese dhe veterinare, për të garantuar sigurinë ushqimore, shëndetin e kafshëve dhe mbrojtjen e shëndetit publik.
