Në kuadër të 15 Marsit, Ditës Botërore të të Drejtave të Konsumatorit, u zhvillua një tryezë diskutimi mbi sfidat e konsumatorëve dhe rëndësinë e rritjes së ndërgjegjësimit për sigurinë ushqimore.
Në këtë takim mori pjesë edhe Z. Andrea Ferrero, Shef i Seksionit të Zhvillimit Ekonomik dhe Social në Delegacionin e Bashkimit Europian në Shqipëri, i cili theksoi se harmonizimi i politikave dhe legjislacionit me Bashkimin Europian sjell përfitime konkrete për konsumatorët shqiptarë.
Ferrero u shpreh se në Bashkimin Europian konsumatori konsiderohet një nga shtyllat kryesore të funksionimit të tregut të përbashkët, pasi tregjet funksionojnë në mënyrë të drejtë dhe të qëndrueshme vetëm kur qytetarët kanë besim te produktet dhe shërbimet që blejnë.
Sipas tij, përafrimi me standardet europiane nuk përfaqëson vetëm miratimin e ligjeve të reja, por sjell ndryshime konkrete që ndikojnë drejtpërdrejt në jetën e përditshme të qytetarëve dhe në rritjen e mbrojtjes së konsumatorëve.
Diskutimi u zhvillua në kuadër të aktiviteteve që synojnë forcimin e ndërgjegjësimit publik për të drejtat e konsumatorëve dhe rëndësinë e standardeve të sigurisë ushqimore.
Kjo temë u trajtua edhe në emisionin “Alert”, të moderuar nga Granit Sokolaj në Ora News, ku u diskutua mbi sfidat me të cilat përballen konsumatorët dhe nevojën për rritjen e informimit dhe transparencës në treg.
