Në emisionin Alert, moderuar nga Granit Sokolaj në Post TV, u diskutua mbi praninë e produkteve shqiptare në treg dhe sfidat e sektorit të bujqësisë. Laurent Mulliqi nga Shoqata e Eksportuesve të Fruta-Perimeve theksoi se mungesa e formalizimit të tregut është një nga problemet kryesore, duke e bërë të vështirë gjurmueshmërinë dhe kontrollin e produkteve.
Sipas tij, është e rëndësishme që produktet të tregtohen në pika të përshtatshme dhe me faturë përkatëse, në mënyrë që konsumatorët të kenë garanci për cilësinë dhe origjinën e tyre. Ai vuri theksin tek përgjegjësia e shtetit për të krijuar një treg të rregulluar, ku çdo operator të respektojë normat dhe standardet.
“Duhet të dimë se ku të trokasim në rast problemi,” u shpreh Mulliqi, duke kërkuar një sistem të qartë dhe të monitoruar për sigurinë ushqimore.
