Laurat Mulliqi, përfaqësues i Shoqatës së Eksportuesve të Fruta-Perimeve, ka ngritur shqetësimin se një bllokim i mundshëm i produkteve shqiptare nga Serbia apo Kroacia do të kishte pasoja të rënda për eksportuesit dhe tregun vendas.

Ai thekson se Serbia, Kroacia, Kosova dhe Mali i Zi janë tregjet kryesore për eksportet shqiptare të fruta-perimeve, përpara se produktet të hyjnë në tregjet europiane. Një bllokim në këto vende mund të shkaktojë një kaos të vërtetë për sektorin.

Sipas Mulliqit, ende ka kompani që operojnë jashtë standardeve të kërkuara, duke eksportuar produkte me nivele pesticidesh mbi normat e lejuara. Edhe nëse këto kompani nuk furnizojnë eksportuesit e rregullt, ato mund të shesin në tregjet e vogla, duke ndikuar negativisht në imazhin e përgjithshëm të produkteve shqiptare.

“Mungesa e kontrollit në magazina dhe certifikimeve të sakta dëmton gjithë zinxhirin e furnizimit, duke ndikuar edhe tek ne që mundohemi të kemi një produkt të sigurt dhe të certifikuar,” thekson Mulliqi.

Eksportuesit shqiptarë kërkojnë që institucionet përgjegjëse të forcojnë kontrollin dhe të ndalojnë operatorët që nuk respektojnë normat e sigurisë ushqimore, për të shmangur masa bllokuese nga vendet partnere tregtare.

Në emisionin “Alert” në Ora News, të moderuar nga Granit Sokolaj, u diskutua problematika e pesticideve dhe ndikimi i tyre në sektorin e bujqësisë dhe eksporteve shqiptare.

Fatmir Shero, eksportues agrumesh nga “Agrokonispoli”, u shpreh se këtë vit në zonë parashikohen 50 mijë tonë mandarina, duke e kthyer Shqipërinë në një konkurrent të fortë në tregun europian, veçanërisht ndaj Greqisë. Ai i bëri thirrje fermerëve të ndalojnë përdorimin e pesticideve të ndaluara, pasi në fund pasojat bien mbi ta. “Duke prodhuar 50 mijë tonë, ne krijuam një treg dhe tani po i marrim tregtarët grekë,” tha ai, duke theksuar rëndësinë e standardeve të cilësisë për eksport.

Nga ana tjetër, Agim Rameta, Kryetar i Bordit të AFADA, theksoi se pesticidet e regjistruara kalojnë përmes kontrolleve të Ministrisë së Bujqësisë dhe janë brenda rregullave ligjore. Sipas tij, produktet që rezultojnë me mbetje të larta pesticide janë shpesh të paautorizuara dhe nuk janë regjistruar në Shqipëri, por fermerët kanë gjetur mënyra për t’i përdorur ato.

Në një lidhje me “Skype”, Laurat Mulliqi nga Shoqata e Eksportuesve të Fruta-Perimeve e cilësoi shtetin si hallkën kryesore të problematikës me pesticidet. Ai tha se, ndonëse gjatë dy viteve të fundit situata është përmirësuar dhe nuk lejohet më futja e produkteve të paregjistruara, ka ende rrugë ilegale për hyrjen e tyre në treg. Sipas tij, kontrollet e forta që po bëhen tani duhej të ishin ndërmarrë më herët për të shmangur këtë problem.

Ekspertët theksuan se ndërgjegjësimi i fermerëve dhe kontrollet më të ashpra janë thelbësore për të garantuar sigurinë ushqimore dhe për të ruajtur besueshmërinë e produkteve shqiptare në tregun ndërkombëtar.https://www.youtube.com/watch?v=gLxrWAEkzm8

Laurat Mulliqi, Shoqata e Eksportuesve të Fruta-Perimeve në një lidhje me ‘’Skype’’ në emisionin ‘’Alert’’ në Ora News u shpreh se zinxhiri i problematikave me pesticidet është shteti.

Mulliqi: Ne si kompani private kemi bërë shumë tentativa për ta ndryshuar këtë gjë, për ti orientuar fermerët për ti drejtuar në drejtimin e duhur të këtyre problemeve.

Po të flasësh nga aspekti i ilaçeve që importohen në Shqipëri deri më tani po bëhen dy vite që është rregulluar shumë kjo çështje sepse asnjë produkt nuk futet pa u regjistruar ose pa kontroll.

Zinxhiri kryesor i këtyre problematikave më së shumti është shteti sepse shteti duhej të kishte marrë masa më herët me këto kontrollet që po bëhen tani.

Por unë them që është drejt përmirësimit dhe është drejt rregullimit në krahasim me vitet paraprake.Emisioni plotë

Alert – “Mëkatarët” e pesticideve (28 Mars 2025)https://www.youtube.com/watch?v=gLxrWAEkzm8