Në emisionin “Alert”, moderuar nga Granit Sokolaj në Ora News, këtë të premte u trajtua tema “Turizmi mes pritshmërive dhe luftës”, ku e ftuar në studio ishte Flora Xhemani Baba, gazetare dhe eksperte turizmi.
Duke folur për problematikat që has turizmi në Shqipëri në prag të sezonit, ajo theksoi se nuk mbështetet plotësisht te statistikat zyrtare, pasi sipas saj ato nuk arrijnë të pasqyrojnë të gjithë lëvizjen reale të turizmit të brendshëm.
Xhemani Baba u shpreh se në Tiranë ka rreth 1.2 milionë banorë informalë, një pjesë e të cilëve lëvizin çdo fundjavë drejt destinacioneve të ndryshme turistike brenda vendit, për një ose dy ditë pushim.
Sipas saj, këta qytetarë udhëtojnë drejt zonave si Valbona, Vlora dhe destinacione të tjera, ku konsumojnë dhe shpenzojnë para, duke gjeneruar të ardhura për ekonominë lokale, por pa u reflektuar në shifrat zyrtare.
Ekspertja theksoi se kjo tregon nevojën për një qasje më të saktë në matjen e turizmit të brendshëm, në mënyrë që të kuptohet më mirë pesha reale që ai ka në ekonominë e vendit.
