Në emisionin “Alert” të datës 1 maj, me temë “Turshitë me pesticide, AKU thellon skandalin”, moderuar nga Granit Sokolaj në Ora News, diskutimi u hap me deklaratën e kryeministrit Edi Rama për sigurinë ushqimore dhe luftën kundër informalitetit në zinxhirin ushqimor.
Rama theksoi se ligji, sado i mirë të jetë, nuk mjafton pa njerëzit që e zbatojnë atë, ndërsa informaliteti në tregun ushqimor nuk është vetëm çështje ekonomie apo cilësie, por lidhet drejtpërdrejt me të drejtat e konsumatorëve, fermerëve dhe sipërmarrësve të ndershëm. Kryeministri vlerësoi gjithashtu punën e drejtoreshës së AKU-së, Belinda Gjylameti, duke e cilësuar reformimin e Agjencisë Kombëtare të Ushqimit si një sfidë madhore në prag të negociatave të Shqipërisë me Bashkimin Europian.


