Në emisionin “Alert” në Ora News, moderuar nga Granit Sokolaj, Martin Mici, Drejtor i Përgjithshëm për Politikat Veterinare dhe Sigurinë Ushqimore në MBZHR, deklaroi se Shqipëria ka marrë masa parandaluese për të mbrojtur fermat nga Murtaja e Ruminantëve të Vegjël, një sëmundje virale shumë ngjitëse, e cila është konfirmuar në Greqi dhe Rumani.
Sëmundja prek rëndë prodhimin e qumështit dhe mishit, por nuk transmetohet te njerëzit.
Sipas Micit, është kërkuar ndalimi i lëvizjes së kafshëve dhe produkteve të rrezikuara nga vendet e prekura, si dhe forcimi i kontrolleve veterinare për të parandaluar përhapjen e sëmundjes. Ai theksoi se PPR prek delet dhe dhitë, por nuk përbën rrezik për njerëzit.
Autoritetet veterinare dhe AKU po monitorojnë situatën, duke garantuar që tregu vendas dhe importet të jenë të sigurta dhe të mbrojtura nga rreziku i përhapjes së sëmundjes.
